እፕረው 8

1ሴመለ፥ ዋን ሃሰወነ ኦፐዬ ወ ኮኮከ ሴዴ አሬ ክቶ፦ ቄስተ ኩተ አሞንቴዬ፥ ሀርከ ዋቀሴ ዌ ፕሰ ቀረ ቀፖትይ፥ አክተ ኬለ ኩቴኤ፥ ሴዴ አሴ ፐሆን ቀፕነ። 2እሸ ትከሴ አቁልቁሎተ፥ ቱከነ ዱካተ ኮድቴ ኬለዬ ኮደ ኮን። ቱከኖሴ ኔፎ፥ ዋቀ ዳፔ ዲሼይ፥ ነመን ዳፕኔ። 3ቄስተ ኩተ ወ መለ ሹመመ፥ አከ ዳሰተ እሾ ከልሶተ ቀለምቶ ዋቀ ከልሾ መለ። ሴመለ፥ ቄስቶሴ ኔፎው፥ ወ ዋቀ ከልሸ ቀፕናተ እሸ ፋን። 4ቄስቶሴ ከድን ፒተ ቀረ ቸ ኪቴዬ፥ ቆተ ቄሴወ አሴረ ሙሴ ምነ ዳሰተ ከልነ ቻን መለ፥ ቄስተ ኮድንን ሄኔ። 5እሾተ ኮደይሾ አኮዴን ወ፥ ወ ሞንቴዬ ቻትእ ፐሀነ እሾ ከትለይተ ኮዴኤ ኮዴን። ሴዴ ኔፎ አክመ ሴ አሙሴ ቱከኖሴ ኮዴተ ሀርምሰዴዬ፥ አከ ሴ አዋቀ እሸ አጨጬ ከ ክዴ፥ «አክመ እሮተ ቀረ አክቴ ምነኤ፥ ዌ ፕሰ ቀንቀንሰ ኮዴ» ቀረኤ ኮድቴ። 6አመ ኾር፥ ኮደይቴተሴ አዬሱስ ኦፐዬ ኦተንትተ ኮዴ፥ ቆተ አኸተ ከፐዬ ኸሰ አጫሎን ኮድቴ መለ አክመ አኸተ ቀረ ጫልቶ ምነኤ፥ ኮደ ዬሱስ ዳሰሜ ኔፎ፥ አሴው ጫል። 7ከድን ኮደይቴተ ፐዮተኤ ቀጨን ቀፕንን ኪቴዬ፥ ሄለድ ኮደይቴተ ለመተ ፐርፓችስንን ሄኔ። 8ማነ መለ፥ ዋቀ አከ ኦራድ ቀረ ደፐ ቾ አክን ከ ኪን፥ «ሀ ፖቀለ እኪን፥ ኩያተ አንኦፐዬ ኦረ እስረኤል እሾ ኦረ ይሁደ ኦልይ ኮደይቴተ ሃረየ ኮደዶ ዴአ። 9ኮደይቴቶሴ ኔፎ፥ ኮደ���ቴተሴ አንፒተ ክፕስ ከረ እሾተ ሶክሰ መለ፥ እሾተ ቱፐ ሀርከ ቀፔዬ ኣፐዳሶ ኦል ኮደዴን ፐሀናቶ። ማነ መለ፥ እሾተ ኮደይቴትዮን ቶይትኔ አንከ እሾተ ቱፈዴይ። 10ሀ ፖቀለ እኪን፥ ኮደይቴተ አንአሬፐ ዴሰ ኦረ እስረኤል ኦል ኮደዶ ሴዴ፦ ሀ፥ ሴርዮን መተ ከረ እሾተ ኻየ፥ ከ ከርተ ከረ እሾተ ታፈ፥ ከ ዋቀይሾ ኮደ፥ እሾተከ ኦረዮ ኮደን። 11ነመ ኡመ ‹ዋቀ ኡፕናዶ› እንክዶ፥ ከ ኼልታድ ታክ እናሶኤን ኮልሾ። ማነ መለ፥ አሸከዬ ፐየቴ ሀከ አኩተት ነመ ፕሰ አነ ኡፕናደይ። 12አንትከ ደፐይሾ ፕሰ እሾተ ዲሸ፥ ኡመ አሬፐ ዴሰ ጩፖተይሾ መቴ አንኦርሰዶ።» 13ዋቀ፥ ቆተ ኮደይቴተ ሃረየት ዴሰ ሃሰወዴ ከ አኸተ ኮደይቴተ ኬርቴ ኮዴ። ወ ኬርነ ከ ኘፐለ ኔፎ፥ ፐቴተይሾ እዴሃቴ።

will be added

X\