እፕረው 5

1ቄሴወ ኩኩተ ፕሰ፥ አከ ፐከ ኦረ ኦፐ ኮዶ ከ፥ ኮደ ዋቀ ምነ ቶይኖ ኮዶ፥ ከ ሀሴንተ ጩፖተ መለ ዳሰተ እሾ ከልሶተ ዋቀ ከልሾ መለ፥ ኦሮፐዬ ሬኸም ከ ሹመም። 2ቄስቶሴ ቆተ እሸ መታድ ኑኩሉመ ቀፖ መለ፥ ኦረ አንኡፕንን መል ጩፖተ ኮኖ ከ ፓተን ደፕኖ ሱረይሰተ እኤተንን። 3ከ ቆተ እሸ መታድ ኑኩለይተ ኮዴ መለ፥ ጩፖተ ኦረ መለ ፐተኔ መ፥ ጩፖተ መታድ መለ ከልሶተ ዋቀ ከልን። 4ኡመ ነመ፥ ሀከ ዋቀ አአሮን ምነ እሸ ሀላዶ መልይ፥ ኡልፌኖሴ እስን ቴየንንቾ። 5አክሞሴ ምነኤው፥ ክርስቶስ ኡልፌኖሴ አቄስተ ኩተ ኮዴተ፥ እስንን ቴየኔ መ፥ ዋቀሴ እሽ ክዴ፥ «አት አእነዮ፥ አንከ አዌ ኬ ኻዬ» እሸ እሽ ዳሼ። 6ከ ፖረ ፕለ ኦፐ ኪንው፥ «አክመ ቄሱመ ሜልኬሴዴቅ ምነኤ፥ አት ሀከ ፐረፐረት አቄስተ።» 7ዬሱስ አነመ ኮዴ ከ ፒሴ ቀረ ቾዬ፥ ዋቀሴ ቶተ ኬለ እሸ ድንሰ ኤተንሾፐ፥ ቅንሴታድ እሾ ናፐታድ፥ ኡሉፕተ ኩተ እሾ እልመመኔ ዴሀይሼ። ቆተ ዋቀ ቱረ ፉሮ መለ፥ ዋቀከ እሸ ደከዬ። 8ከት ፑኑ እነ ዋቀ ኮዴዬ፥ ረኮተሴ አአከዴ ኬለዬ አጨጨመ ኮለዴ። 9ኤቴ አቀጨን ቀፕንን ኮዴ ከመዬ፥ ኦረ እሽ አጨጨሞ ፕሰኤ፥ ሳንተ እሽን ድነ ፐረፐረ አከደኔ እሾተ ኮዴ። 10ዋቀከ ሳንተ አቄሱመ ሜልኬሴዴቅን «አቄስተ ኩተ» ክዴ ከ እሸ ሹሜ። 11ቆቶስት ዴሰ፥ ዋን አሉ ሃሰወነ ኩተየ ቸ መ፥ ቆተ ሃሰ ቀፐተ አኤተንንአክንን መለ፥ ኦልኬለ ለአሰ እኖ ረኮተ። 12ሀከ አዌት አሉ ሄለን ኮልሰምፐየ ኮዴተ እሽን ፋን፥ መ ኾር አከ ለመተ ነመ ተከ ቃሌተ ዋቀ ኦፐዬ፥ ኮልሰ ፐዮተ እሽን ኮልሾ እሽን ፐርፓችስን፤ ኡመ ኣነ ዲሼይ፥ ደምተ ኮኮከ እሽን ፐርፓችስንንክቶ። 13ማነ መለ፥ ነመ ኣነ እሽ ቀፕናን ቆተ እነ ኮዴ መለ፥ ኮልሶሴ አሀንቄሉመ እንኮለኔ። 14ደምተ ኮኮከ ኾር፥ ኦረ ቅሜ ከ ድከተይሾ ኦፐዬ አፐኻረ እሾ አኔቀ ኦልኬለ ኦርሰ ኮለዴኤ ፐርፓችስን።

will be added

X\