ኬላትየ 1

1ኤርከነ አነ ፐውሎስ፥ አኮደምፐይተ ዬሱስ ኮዴትዮ ቅንደ ኦረት ዴሰ ታክ ነመኔን ኮድንን ከ ቅንደ ዬሱስ ክርስቶስ ዴሰ እሾ ቅንደ ዋቀ ኣፐ፥ እሰሴ ቶቶፐ እሸ ኻሼት ዴሰ ኮድቴ፥ 2አነ እሾ ሄለ አነ ኦል ቸ ፕሰ ከፐዬ፥ ትከሴኔ አክርስታነ አኬላትየት ኤርከሜ። 3ዋቀ ኣፕኖ እሾ ፖቀላኖ ዬሱስ ክርስቶስ ከፐዬ፥ አዳሰተ እሾ ነከይተ እሽነ ኮዴን። 4ክርስቶስ፥ ኼልቶሴ አሬ ኔቀ ኬለዬ እኖን ፐሀ መለ ክዴ ከ፥ አከ ዋቀ እሰሴ ኣፕኖ ኮዴ ፋኖ ቀረኤ፥ ጩፖትኖ መለ እስ ተርፕሼ ከ ዳሼ፥ 5ሀከ ፐረፐረት ኡልፌነ አዋቀ ከዮ። አሜን። 6ሴዴ አጨርጨርተን ኤለ ኻቴን ከ እሰሴ ዳሰተ ክርስቶስ ቁደን እሽን ሀሌ አሌ ዲሴን፥ ከ ኦቶተ ፕለ ኦፐ ዴሰ ቲተውቴን አነ ቀወን። 7ወ አንመለ ሴዴ ክዴ፥ ቆተ ኦረ ዴሞ እሽን ቱረ ፐትኖ ከ ኦቶተሴ አክርስቶስ አፈየ አሌ ፑርሰ ሄኖ መለ ዲሼይ፥ ኦቶተ አፈየ አፕለ እንክቶ። 8አኮድቶመ፥ ከድ ፑኑ እኖ ኮድቴ ታክ ኤርከምፐቶተ ሞንተ ኔፎ ኮድቴዬ፥ ነመ ኦቶተሴ አፈየ አንእኖ እሽነ ቶርኔ መልይ አፕለ እሽነ ቶርኖ፥ አጪጨሜ አኮዶ። 9አክመን ዴቾ እሽነ ሌሌ ምነኤ፥ አመ ኔፎ እንኪን፥ ነመ ኦቶተሴ አፈየ አቴየቴን መልይ አፕለ እሽነ ቶርኖ፥ አጪጨሜ አኮዶ። 10ሄለ ኩል አንት፥ አከ ነመ አነ ፔፖን ፋኒ? ሞን ሄለ፥ አከ ዋቀ አነ ፔፖን ፋኒ? ሞን ኦረ ኸሰሰን ፋን? ከድን አምክእን ኦረ ኸሰሰ ፋን ኪቴዬ፥ ሄለን ኦርኸይተ ክርስቶስ ኮድን አንሄኔ። 11መ ኾር ኮያለኖ፥ ኦቶተሴ አፈየ አንአንት እሽነ ቶሬ፥ አክመ ኦቶተ ነመኤን ኮድንንን እሽነ ኡፕነን። 12ማነ መለ፥ አአነ ኡፕነይሼ ዬሱስ ክርስቶስ ዲሼይ፥ ነመ ተከ ኔፎ ኬለዬ አንቄኔ፥ ኡመ ነመ ተከ ኔፎ አነን ኮልኔ። 13ኸተ አንአመንቴተ አይሁድ ኦፐ ቾዬ፥ አተ አክመን ከላዴ እደከይቴን። ኝረሙመኔን ትከ ክርስታነ አዋቀ ቶሬ ከ ፐትሰ ፈዴ። 14አመንቴተ አይሁድ ቶይተተኤ፥ ኦርኖ አኼልትዮዬ ቾፐዬ፥ አሌከ ቀረን ቀፐ፥ ከ ኣተ ኣፐዳኖት አኩተት ኮኮነን። 15መ ኾር፥ ዋቀሴ አንከርተ ኣየኖ ከረ ቾዬው አነ ሬኸዴ ከ ዳሰታድን አነ ሀላዴ፥ 16አከን ኦረ ኦረ አይሁድእን ኮድንን ቆተ እናድት ዴሰ ቶሮኤ፥ ኤቴ እናድ አነ ኡፕነሰ ፈዴዬ፥ አንት ነመ ተከ ኔፎ አንሀዩምሰኔ። 17ኡመ አአነ ቱረን ኮደምፐየ ኮዴ ከፖፐ ዬሩሰሌምፐ አንአኔ። መ ኤለን ኼ ከ ፒተ አረፕ ኦፐ ኣኔ፥ ከ ኩል ለመተ ከተመ ተማስቆ ኦፐ ቲተዌው። 18ከ ፐረ ሴሰ ከመዬው ፔትሮስ ቶየኤ ዬሩሰሌምፐ ኣኔው። ከ ኤዬ እሸ ከፐ ኩያተ ኩደንከ ኬን ፕሬ። 19መ ኾር፥ እነሴኔ አኦፐ ፖቀለ፥ የይቆፕ መልይ ኮደምፐየፐዬ ነመ ተከ ኔፎ አንአክኔ። 20ዌሴን አንእሽነ ታፍነ አክመን ደርተን፥ አንት ፉለ ዋቀ ቱረኤን እሽነ ሌል። 21ከመ ዴሰው ፒተ ሶርየ እሾ አክልቅየ ኦፐን ኣኔ። 22ኡመ ትከሴኔ አክርስታነ አክርስቶስ ፒተ ይሁደ ከረ ቸ እልዳፐ አነን አክኔ ከ አነን ኡፐን። 23መ ኦቶተ አኪንቶ «ሀ ነመሴ ኸተ እኖ ቶረ ከመ ፖረ አኖ፥ እሸ አመንቴተሴ አኸተ ፐትሰ ፋኖ ቶርን» ደከዬን። 24ከ አነ መለ ዋቀ ከለተይሰዴን።

will be added

X\