ኤፌሶን 3

1ሴመለ አእሽን ኦረ ኦረ አይሁድእን ኮድንን መለ ከ ዬሱስ ክርስቶስ መለ ህደሜ አነ ፐውሎስ፥ ፉለ ዋቀ ቱረኤን ቅንሰን። 2አከመን እሽን ቀረ ዌ ኔስሾኤ ዋቀ አከ ዳሰታድ አኮደ አነ ዳሼ ዱካተኔ ደከይቴን። 3አክመን ዴዮ ሸከይቴተ እሽነ ታፌ ምነኤ፥ ዋቀ ወ ጩተሜኤ ኦልኬለ ለአይሼ ከ አነ አክሼ። 4ኦቶን ወ አንታፌኤ አነፐፕተኔዬ፥ ድከተ አንአንት ቆተ ወ ክርስቶስ ዴሰ ጩተሜት ቀፐ ኡፕናተ እኤተንሰን። 5አከሞሴ አአመ ዌሴን ጩተሜ ሀፑረ ዋቀ ምነን ኮደምፐየሴኔ ኻድ ቁልቁለዌ ከ ኹመምፐያድእ ኡፕነይሰሜ ምነኤ፥ ኼልተደ አኸተት ኦረኤ ኦልኬለዬ አሴን ኡፕነይሰሜ። 6ወ ኡፕነይሰሜ ኔፎ፥ ኦቶተሴ አፈየ ምነኔ ኦረሴ ኦረ አይሁድእን ኮድንን ኦረ አይሁድ ኦልይ ሰከ ዋቀ ቆተን ከ ሜለ አደክንተ ተከ ኮዴን ከ ኸሰሴ አዋቀ ዬሱስ ክርስቶስን ዳሼ ቆተን። 7ዳሰተሴ አዋቀ ሁፕነ ኮዳድትን አነ ዳሼን ኦርኸይተ ኦቶተሴ አፈየ እንኮዴ። 8ከድን ፑኑ ቁልቁሎወ ፕሰ ኬለ ቃጭነዬ፥ ቴየንተሴ አክርስቶስ ቱረዬ ኼለን ቀፕንን አከን ኦረ ኦረ አይሁድእን ኮድንን ቶሮኤ ዳሰተሴ አዋቀ አነ ዳሰምቴ። 9አከሞሴ ምነኤው ኼልተደ አኸተት ወሴኔ ዋቀሴ ኡመምፐይተ ዌ ፕሰ ኮዴትን ጩተሜ፥ ኮደ አዋቀ ማነ አከመ ኮዴ አከን ኦረ ፕሰኤ ለአይሾኤ ዳሰተ ዋቀ አነ ዳሰምቴ። 10ሴዴ ምጨ ወ እሽን ኮድቴ፥ ኼልተ አመትይ ትከ ክርስታነ ምነኔ ሳረ ከ ኡኩመምፐየ ሞንቴ ቸ አከመ ኦኩመ ዋቀ ቅንደ ሌከን ኡፕናደን መለ። 11ዋቀ ወ መለ ሴዴ ፖቀላኖ ዬሱስ ክርስቶስን ድክሼ፥ ቆተ ኸተው ፒሰዴ መለ። 12ቆተን ክርስቶስ አመኔ መለ፥ ክርስቶስን ፉለ ዋቀ ቱሮፐ ኜረ ከ አመንቴተን ዴሀተ እንኤተንነ። 13ሴመለ ረኮሴ አንአንት እሽን መለ ረከኖ ቆተ ኡልፌነይሽን ኮድቴ መለ፥ ኸሰን ሙረኔን ኪን ከ እሽን ቅንሰን። 14ሴመለ ወ አንመለ ፉለ ዋቀ ኣፐ ቱረ ክልፐለዮን ክልፒፐነ ከ ቅንሰነ ሴ መለው። 15ቶለ ሞንቴ ከ ፒተ ቀረ ቾ ፕሰ መኻድ አዱካተ ቅንደ እሽ አከዶ ዋቀ ከፐው። 16አክመ ከረን ኸተ ሁፕነን እሽን ኮኮነይሾ፥ አከ ሀፑራድን ዋቀ ቴየንተሴ ኻድ አኡልፌነ ኦፐ እሽነ ዳሾኤን ቅንሰን። 17ከ አከሞሴ ምነኤው፥ አከ ክርስቶስ አመንቴተን እሽን ከረ ከላዶ፥ ከ ህትናስን እሾ ክርተይሽን አከ ጫለለን ኮኮናደኔኤን ቅንሰን። 18ከ አከ ጫለለሴኔ አክርስቶስ፥ ፐልዱማድ ከ ዴሩምታድ ከ ኩቱማድ ከ እስኬለን ኸተ ሴኩማድ አተ አከ ቻን አከ ቁልቁሎወ ፕሰ ኦል ኡፕናተ ኤተንሰን ከ 19ጫለለሴኔ አክርስቶስ አኡፕናተ ፕሬተ ኦረን ከመ አከ ኡፕናተኔኤ ከ አይኑመ ዋቀ ኩመን እመካተ ኤተንሰኔኤን ቅንሰን። 20ሴመለ ዋቀሴ ሁፕነሴ እኖ ከረ ኮኖ ምነን ዋን ቅንሰንነ ከ ዋን ድከንነ ቀረን ቀፕነይሾ ከ ኮዴተ ኤተንሾኤ፥ 21እሽእ ትከ ክርስታነ ከ ዬሱስ ክርስቶስን ኼልተደ ፕሰዬ ሀከ ፐረፐረት ኡልፌነ አእሸ ከዮ። አሜን።

will be added

X\