ኮደ 6

1ኩያዎሴን ከረዬ፥ ኤቴ ኦረ አመኖ ኦልን ኮፐኔው አኖ፥ ኦረ አይሁድ አአፈ ክርክ ኡፖ ኦረሴ ኸይሾ ሄለ ፒተ ኮዴ ቀረ ቆጭቆጭን። ሴዴ ኔፎ፥ ኦ ኩያተ ምነ እሾነ ቃርቃረኔዬ፥ ቆተ ኦረሴ አአይሁድ ፒቶፐ ከሎ ህዬቴወ አቀረዬ ዲራሶ ሌኤኔ አኦረሴ አአፈ ክርክ ኡፖት ዌትንን ኡፕንን መለ። 2ኮደምፐየሴኔ ኩደንከ ለክከ ሴ ምነን ኦረ አመኖ ፕሰ ኦሎፐ ሀሌን ከ ክዴኔ፥ «እሾነ ቃርቃረ ኬለኤ፥ ቃሌተ ዋቀ ቶረ ዲሰተ እኖ ፋንንክቶይ። 3ኮያለኖ፥ ኦረ አንኪንኖ፥ ‹ቀልፔተ ፈየኤ ቀፐን፥› አሀፑረ ቁልቁሎተ እሾ ኦኩመን እመካዴ ነመ ተፐ እስፐዬ ሬኸ ከ ኮዶሴት እሾተ ሹመ፥ 4ከ እኖ ቅንሴተ እሾ ቃሌተሴ አዋቀ ቶሬተ ጨፐነ።» 5ሃሶሴኔከ ኦረ ፕሰ ኸሰይሼን፥ እከ እስትፋኖስሴ አመንቴተ እሾ ሀፑረ ቁልቁሎተትን እመካዴ፥ ከ ፍልፖስ ከ ጵሮክሮስ ከ ንቀሮን ከ ትሞን ከ ፔርም ከ አንሶክተሴ አመንቴተ ኦረ አይሁድ አመኖ ንቆለዎስ ኪነን ኦል ሬኼን። 6ከ እሾተ ቄዴን ከ ኮደምፐየ ቱረ ቃትሼን። እከ እሾነ ቅንሰዴን። ኮደምፐየሴኔከ አቅንሰዴን ከመ ሀርካሶ እሾነ ቀረ ቀፐዴን። 7ቃሌተ ዋቀከ ኦር ኩቱምተን አን። ዬሩሰሌም ኔፎ ከረ ኦረ አመኖከ ቀረ ፐደወሜተኔው አን። ቄሴወሴኔ አኸተ ኔፎፐዬ ሌከየከ አመኔን። 8እስትፋኖስ ዳሰተ ዋቀ እሾ ሁፕነኔ እመካዴ ከ ኦተንተ ኦረ ኦፐ ወ ኦረ ቀወነ እሾ ምልክተደ ሌከየ ኮን። 9ስትይ ኦረ ተከ አትከ ኦረ አይሁድ አቅንሴተ «ኦረ ነተን ሶኬ» ክደሞ፥ እሾ ኦረ አይሁድ አፒተ ቄሬነ እሾ አአሌክሰንቴርየ፥ ከ አፒተ ክልክየ እሾ አእስየ ከረ ከለ ኦፐዬ ኦረ ዴሞ እስትፋኖስ ሺሸ ፐዬ። 10መ ኾር ኦኩመ እሾ ሀፑረ እስትፋኖስ እሽን ሃሰወኖ ምነ ኦርሰ እንኤተንኔ። 11ሴከመዬ ኦረ አክዶ «ሀ ነሞሴ አሙሴ እሾ ዋቀ ኦኖዬን ደከይኔ» ቱልቶፐን እሸ ቀረ ኻሼን። 12ከ ሰመይተ እሾ ቅሞተ ከ ኮልሰምፐየ አሴረ እሸ ቀረ ኻሼን ከ ኣኔን ከ እስትፋኖስ ቀፔን ከ ፍርትሾንኮተ ቱሮፐ ዴሀይሼን። 13ከ ኦረ እሸ ቀረ ደርተ ማኩሞ ቄዴን ከ ክዴኔ፥ «ሀ ነሞሴ አምክ ትከ ቁልቁሎተ እሾ ሴረ ሙሴ ኦትተ ከመ ኦርንቾ። 14ከ ኪን፥ ‹ዬሱሴተሴ አናስሬት ትከሴ አቁልቁሎተ አሌ ቅትቅሸ ከ ኣተ ሙሴ እኖ ዳሼ ፕሰ ፑርሸ› አንከ ደከይኔ።» 15ኦረ ፍርትሾንኮቶፐ ቾ ፕሰ፥ ኤቴ እስትፋኖስ ቁደ ቶይኖዬ፥ ፉላድ ፉለ ኤርከምፐቶተ ዋቀኤ እሾነ ፐሀናዴ።

will be added

X\