ኮደ 12

1ክሴስትይ ኑቁሰ ተከ ሄሮድስ ክደሞ ኦረ አመኖ ዴሞ ቶረ ፐዬ። 2ከ እነፐ ዮሀንስ አየይቆፕ ኪናኔ ኮረቴተን እሸቺሴ። 3ከ አክመ ኦረ አይሁድ ሴዴን ኸሶዴ አኬ ከ ፔትሮስ ኔፎ ቀፕሲሴው። ሴ ኔፎ ኩየወሴኔ አፓሌተ ፋስከ አኦረ አይሁድ ኦፐዬ ላቆተ ደማኔ ኦፐ አሴ ኮድቴ። 4ከ ኤቴ ፔትሮስ ቀፕሲሴ ከመዬ፥ ትከ ህደ ኬለ እሸ ህዴ ከ አውተ ፓሌተ አፋስከ ድከቶ ከመዬ ኦረ ቱሮፐ እሸ ሶክሰ ድከዴ ከ አከ ፎልሶተ አፉር አፉር ኮደን ከ እሸ ቶይተኔኤ ፎልሶተ ክተ አፉር እሸ ከፐ ክቴ። 5ፔትሮስከ ኦር ትከ ህደ ኬለ ቶይተም። መ ኾር ማፐረ አመንቴተ ፈየኤ ዋቆፐ እሽ ቅንሰን። 6ሄሮድስ አውተ ፔትሮስ ሶክሰ ድከዴዬ፥ ፔትሮስ አውሴ ሀልኬስትይ ሰንሰላተ ለክን ህደሜ ከ ፎልሶተ ለክይ ኦተንተ ከረ ሙኬ። ፎልሶወ ዴሞከ ኻረ ትከ ህደ ቶይትን። 7ኦር ኤርከምፐቶተ ዋቀከ ዴቴ፥ ለአይተከ አሌተሴ አፔትሮስ ኬለ ህደሜ ኬለ ለአዬ። ኤርከምፐቶተሴከ ፔትሮስ ቁደ ደደእሴ ከ እሸ እምፐስሴ ከ እሸ ኪቴ፥ «እረቀረ ኼ!» ሰንሰላተሴ ኔፎከ ሀርከ ቁደ እሽ ሴሄ። 8ከ እሽ ኪቴዌ፥ «ሰልፐተይት ህደዶ ከ ኾፓት ኸየዶ!» እከ ኸየዴ። ከ እሽ ኪቴዌ፥ «ኦሀተይት ኡውሰዶ ከ አነ ከመ ኾዬ!» 9እከ ኼ ከ ከመ ኣኔ። መ ኾር ኦልሰ እሽ ፐሀናቴ ዲሼይ፥ ኮዶሴ አኤርከምፐቶተ ኮንቶ ዱካተኔን ኡፕናኔ። 10እከ ፎልሶወሴኔ ክቴኔ ከ ቶይትነ አፐዮተ ከ አለመተ ከፐን ተርፔን ከ ኻረሴ አስፕለ ከተመፖፐ ኦረ ሶክኖ ከፐ ከዬኔው። ኻረሴከ እስን እሾተ ቱረ ፐነሜ። እከ ኦር ሶኬን ከ ኤቴ ፖረ ተከ አመቀይሱመ ተርፔን ከመዬ፥ ኤኖው ኤርከምፐቶተከ እሸ ከፐ ተውቴ። 11ፔትሮስ ኦር እስፐ ዴሰ ኦሬ ከ እስ ክዴ፥ «አክመ ዋቀ ኤርከምፐቶታድ ኤርኬ ከ ሀርከ ሄሮድስ እሾ ወሴኔ አኦረ አይሁድ አነ ቀረ ድከዴ ፕሰ ኬለ አነን ፐሄ፥ አመን ዱካተን ኡፕናዴ።» 12ከ ኤቴ እስ ኡፕናዴ ከመዬ ኼ ከ፥ ትከሴ አኦረ ሌከይተ ከሮፐ ኦሎፐ ኣኔ ከ ከረ ዋቀ ቅንሰኖ፥ ትከሴ አአሀቶፐ ዮሀንሴተሴ መርቆስ ክደሞ አማርያምፐ ኣኔ። 13ፔትሮስ ኤቴ ኻረሴ አትከሴት ኦፐ ኮኮእኖዬ፥ ኦርኸይቴተ ተከ ሮደ ክደምቶ ኔሶሴ ኦልኬለ ኦርሰተኤ ኻረሴ ከፖፐ ዴሰ አንቴ። 14ከ አክመን ኔሶሴ ኔሰ ፔትሮስ ኡፐቴ ከ ኸሶተ ቀረን ኻቴ ኻረሴ ፐነ ኔፎ ዲሴ ከ አሌተ ኬለን ዴሰ ኬርቴ ከ ኪቴ፥ «ፔትሮስ ኻሮፐኤ ቀአዴ ከ ኤዬ ቸ!» 15እሾነከ እሼተ ክዴኔ፥ «ሄለ እታሮኒ?» እሼተ ኡፍ እኪቴ፥ «ሀ ዱካተኔን እሸ!» ከ ፈየ እሾተ ሌልቴ። እሾነከ ኦር ክዴኔ፥ «አሴዬ፥ ኬሌለይታድ ኮድተ።» 16ፔትሮስከ ኮኮእሰሴ ከመው ቻዴ። ኤቴ ፐኔን ከ እሸ አኬኔዬ፥ ኦልሰ እሾነ ፐሀናቴ። 17እሸ ኡፍ አክመ ጨው ክደኔኤ ሀርከን እሾነ አክሼ ከ ፖረ አተ ፐሆን አክመ ዋቀ ትከ ህደ ኬለ እሸ ሶክሼ እሾነ ቶሬ ከ እሾነ ክዴ፥ «የይቆፕ እሾ ኦረ አአመኖ አፕለት ሴዴ ሌለ።» ከ ኤዬ ሶኬ ከ ፖረ ፕለ ኦፐ ኣኔ። 18ኤቴ ሌተ ፐርቴዬ፥ ፎልሶወ ሀርሞኤ ተተመቄን ከ ክዴኔ፥ «አተ ማነ ፔትሮስ ቄዴ?» 19ሄሮድስ ኦር ኤቴ ፔትሮስ ፈደቺሴ ከ ደፔ ከመዬ፥ ፎልሶወ ፔትሮስ ቶይትነኤ ቆረዴ ከ አከ አሌ ፎልሶወሴኔ ሌይሸኔ አጨጬ ከ አሌ ይሁደፐ ኼ ከ ቄሳርየፐ ኸተ ሌከዴ ከ ኤዬ ኩቴኤ። 20ሄሮድስ እሾ ኦረ ትሮስ ከ አስቶነ ኦል ሚረይሼን። ከ ኦልኻሼን ከ ዴኤን ከ ኣፐ ተከ ፕልስቶስ ክደሞ ትከ ኑቁሰ ቀረ ሳሩሞ ቅንሰዴን ከ አከ እሾነ ኦውሰዶ ኮዴን ከ ኑቁሰሴ ቀረዬ አራረ ካሰዴን። ሴዴ ኔፎ ቆተ ኦረ ፒተይሾት ፒተ ኑቁሰስትትይው ደምተ አከኖ መለ። 21አውተ ሌተሴ አእሸ ቀፔን ከይቴዬ፥ ሄሮድስ ሜሀደሴኔ አኑቁሰኤ ከልሰዴ ከ አልከ ቀረ ኩቴኤ ከ ኦረ ሃሰ ሃሰወዴ። 22ኦረሴከ ኡሉፔ ከ ክዴ፥ «እን ኔሰ ዋቀ ዲሼይ፥ አነመኤን!» 23ስትይ ሄሮድስ ቆተ ዋቀን ኡልፌስንን መለ፥ ኤርከምፐቶተ ፖቀለኤ እሸ ደይሼ። ፑናተከ እሸ ደሜን እከ ቶኤ። 24ቃሌተ ዋቀ ኡፍ ኩተተ ከ ቀረ ኮፐኔው አን። 25ፐርነፓስ እሾ ሰኦል ኤቴ ኤርከነሴኔ ኸይሾ ድክሼን ከ ዮሀንሴተሴ እሽ መርቆስ ኪናኔ እስኬለ ቄዴን ከ ዬሩሰሌም ዴሰ አሌ ቲተዌን።

will be added

X\