ትሞቶስ አለመተ 2

1ሴመለ ኦር እነዮ፥ አት ዳሰተሴ አዋቀ ዬሱስ ክርስቶስ ቁደን አካንቶን ኮኮናዶ። 2ፉለ ማክየ ሌከ ቱረኤ፥ ዌሴን አአነ ቀረ ደከይቴ ቄዴ ከ፥ ኦረ፥ ኦረ ፕለ ኮልሰ ኤተንሾ ከ አመነሜኤ፥ ቱረዬ ተርፕሼ። 3ከ ፎልስተ አዬሱስ ክርስቶስ አዱካተ ኮዴ ከ፥ አት ኔፎ ረኮተ ቴየዶው። 4ፎልስተ ኮደ ፎልሱመ ኮኖ፥ አከ ኣፐሴ እሸ አጨጨኖ ኸሰይሾኤ፥ ኮደ ፎልሶወ ምነን ፐሀንን ኦፖፐ ከልንቾ። 5ነመ ኜረ ኬርተት ኜሬ፥ ሀከ ሴረሴ ኬርተ ፕሰ ቶይታዶ መልይ፥ ኩሌተሴ አፑተይመ አከንንቾ። 6ቆተምፐይተ አያሎው፥ ኡንተ ፐልንቶፐዬ አፐዮተ ደሜተ እሸ ፋን። 7ቅንደ ፕሰን ዋቀ መቴ ኦርሰተ እኬ ዳሸይ፥ ወ አንአንት ኬ ኪነ ኦፐ ፈየ ድከዶ። 8አክመን ኦቶተሴ አፈየ ኦፐ ቶሬ ምነኤ፥ እሰሴ ሰኜተ ታውት ኮዴ ከ ቶቶፐ ኼ፥ ዬሱስ ክርስቶስ መቴ ኦርሰዶ። 9ኦቶተሴ አፈየ ምነኔን አክመ ነመ ደፐ ኮዴ ምነ ህደሜ ከ ረከን፤ አኮድቶመ፥ ቃሌተ ዋቀ ህደምንክቶ። 10ሴመለ አንት ኦረሴ አዋቀ ሬኸዴ መለን ኪን ከ ዌ ፕሰ ዱፐን። ሴዴ ኔፎ አከ እሾተ ኩል ዬሱስ ክርስቶስ ቁደን ድነ እሾ ኡልፌነሴ ፕረመን ቀፕንን አከደን መለ። 11ቃሌተሴ ኪንቶ፥ «ኦን እሸ ኦልይ ቶኔዬ፥ እሸ ኦልይን ከላነ። 12ኦን ዱፐተኔን ጨፓኔዬ፥ እሸ ኦልይን ኑቁሱመ። ኦን እሸን መርመነዬ፥ እሸ አሴው እኖ መርመደ። 13ኦን እኖ እሽእ አንአመንአንክንንይ፥ እሸ ቆተ እስ መርመተ ኤተንንንክንን መለ፥ አአመነሜ ኮደኔው ከላደ።» ቃሌቶሴ፥ ቃሌተ ዱካተ። 14ሴዴ እሾተ ኡፕነይሼ ከ አክመ ሃሰደ ቀረ ኦልን ሺሽንን፥ ፉለ ዋቀ ቱረ እሾተ ኮኮነይሼ ከ ዴሃሜ። ማነ መለ፥ ሺሾሴን፥ ኦረ ደከይሰኖ ፐትን ዲሼይ፥ ዌ ኔስንንቻኔይ። 15ኮደምፐይተ፥ አቃሌተሴ አዱካተ አዋቀ ፈየ ቶርኖ፥ ጬረ ከ እሽ ደካንንክንን ኮዴ፥ ከ አክመ ፈተነ ፕሰ ፑቴ አከ ዋቀ ኬ ኡፕናዶኤ፥ ዋቀ ቱሮፐ እስ ዴሀሰ ጨፓዶ። 16ኛኜተሴ አፓተ ፐተ አኦረ ፒተ ከፐ ሴካዶ። ኛኜተ ዋቀ ከፐ ኦረ ሴከንይ። 17ሃሳሶ ኔፎ አክመ ፈይክቴተ እርሞቴ ምነኤ ኦረ ላን። እሾቶፐዬ ኔፎ ሄሜኔዎስ እሾ ፍልቶስ ቸ። 18ኦሮሴ ኤዬ ቾ፥ ዱካተ ከመ ደፔን ከ ቶርን ከ ኪን፥ «ሀ ቶቶፐ ኻነ ኸተው ድከዴን» ከ አመንቴተ ኦረ ዴሞ ፐትን። 19መ ኾር ክርተሴ አዋቀ፥ አቀረ ታፈምቴ ከ ኪንቶ፥ «ፖቀለ እሰሴኔ ኻድ ኮዴ እኡፐ።» አከሞሴ ምነኤው፥ «ነመ መኸ ፖቀለ ሀሌኖ ፕሰ አወ ኔቀ ከፐ ሴካዶ።» ክርቶሴ አፐርፐ ሌሀን ቀፖ። 20ትከ ተከ አኩተ ኬለዬ፥ ሜሀደ ወርቄተ እሾ አደከሮፐ ቱሜኔ ፐተን ቻን መ፥ አቆረ እሾ ፒቶፐ ኮዴኔ ኩል ቸ። ሜሀዶስን ኔፎፐዬ፥ ሜሀደ ዴሞ ኮደ ኡልፌነትን እሾነ ኮደን ከ ሜሀደ ዴሞ ቱፐ ዴሰ ኮደን ኮደን። 21ነመ ዌሴን ኔኔቀ ፕሰ ከፐ ሴካዴ ከ ቀንቀኑመን እስ ቶይትኖ፥ ሜሀደ ኮደ ኡልፌነ ኮነኤ ኮደ። ማነ መለ፥ ሜሀደ፥ አኮደ ፐኻረ ፕሰ ኮዴተ ሀርምሰሜ፥ ሜሀደ አቁልቁለዌ ከ ኮኮከ አኣፐ እሽን ኮደ ኮደነኤይ። 22ኸጬልተ ኔቀ አኸየ ከፐ ሴካዶ ከ፥ ኦረ ከርተ ፐኻረን ፖቀለ ሀላኖ ኦልይ፥ ሀንቄሉመ ከ አመንቴተ ከ ጫለለ እሾ ነከይተ ከመ ኣኔ። 23ከ ሺሸ ኤፑመ፥ አፓተ ፐተ ከፐ ሴካዶ፥ ሴኔ አክመ ፔቀ ቄናን እኡፕተይ። 24ነመ ኦርኸይተ ፖቀለ ዬሱስ ኮዴ፥ አኦረ ፕሰኤ ናለይተ ኮዴ፥ ከ ኮልሰ ኤተንኖ ከ ዱፐተንፐይተ ኮዴተ እሸ ፋን ዲሼይ፥ ፔቀ ፔቄተ እሸ ፋንንክቶ፤ 25ዋቀ ተከ ፑኑ፥ አከ ኦረሴ እሸ ቶሮ ጩፖቶፐ ኦሮ ከ ዱካተ ኡፕናዶኤ ኮደይ፥ ኦረሴ እሸ ቶሮኤ ሾሮኩመን ሳንተ ፈየ እሾተ አክሰ እሸ ፋን፥ 26እከ ኦር ሳንቶስትን እስፐ ዴሰ ቲተወን ከ ቱሩረሴ አሴተነ፥ አኮዳድ ኮደ መለ ቃሴ አኦፐ ቀፐሜን ኦፐ ፐሰደን።

will be added

X\