1 ኤርከነ አነ ፐውሎስ፥ አዬሱስ ክርስቶስ አከ ጫለለ ዋቀ ቀረኤ ኮደምፐይተ ኮዴ ከ ኸሰሴ አቻተ ዬሱስ ክርስቶስ ቁደን አከናን፥ ቶሬተ መለ ኤርከሜ ከፐዬ፥ 2 እነሴኔ ኸዮ አንጫለነ ትሞቶስ ኤርከሜ። ዳሰተ ዋቀ እሾ ሱረይሰተ ከ ነከይተ፥ አዋቀ ኣፐ እሾ ፖቀላኖ ዬሱስ ክርስቶስ ከፐዬ ኬ ኮዴን። 3 ኦቶን ሀልኬተ ከ ኩያተ ቅንሴትዮን መቴ ኬ ኦርሰኖዬ፥ ዋቀሴ አን አኣፐዳኖ ምነኤ፥ ድከተ ፐኻረን ኮደ እሽ ኮኖን ከለተይሰን። 4 ኦን እልማማትን መቴ ኦርሰን፥ አከን ምክተ ኸሶዶ መለ፥ ኬ አኬተ ኸጬል። 5 አክመ አመንቴተሴ አዱካተ፥ አኸተ ኦኮዮተይሽን ሎይድ እሾ ኣያስን ኤውኒቄ ቀፐን ቀፕቶ፥ እንመቴ ኦርሰን፥ ከ አክመ ኬ ከረ ክቶ ኔፎ ዱከይሰን። 6 ሴመለ ወ አንኬ ዴሃመ፥ አውተን ሀርከዮ ኬ ቀረ ቀፐዴዬ፥ ዳሰተሴ አዋቀ አቴየቴ፥ አከ ቸፔስቶ፥ ሴዴን ኬ ዴሃም። 7 ማነ መለ፥ ዋቀ፥ ሀፑረ ሁፕነ እሾ አጫለለ ከ አእስ ቶይቴተኤ እኖ ዳሼ ዲሼይ፥ ሀፑረ ፉረ እኖኤን ዳኔ። 8 ሴመለ ኦር፥ አከ ማኩመ ቆተ ፖቀላኖት ዴሰ ማኩምቶን ጬረ ኬኤን ደካንን፥ ኡመ አነሴ እሸ መለ ህደሜኔን ጬረን። መ ኾር ሁፕነ አዋቀ ኬ ዳኖን፥ አነ ኦልይ ቆተ ኦቶቶሴ አፈየ መለ ክዴ ከ ረከዶ። 9 ቆተን ኮደ ፐኻረ ኮኔ መለ፥ እኖ አንድኔ፤ መ ቆተ ፌቀታድ ከ ዳሰታድ መለ እኖ ድንሼ ከ ቁልቁሉመ እኖ ሀላዴ፥ ከ ኼልተደ ቱረን ዳሰቶሴ፥ ዬሱስ ክርስቶስ ቁደን እኖ ዳሼ። 10 ዳሰቶሴ ኻድ ኔፎ፥ ዴነ ድንሸምፐይተሴ ኸኖ፥ አዬሱስ ክርስቶስ ምነኔ አመ ኡፕነይሰምቴ። እሸከ ሁፕነ ቶተ አሌ ፐሼ ከ፥ ኦቶተሴ አፈየ ቁደን ከላተ አኦፐ ቶተን ቀፕንን እኖ ኡፕነይሼ። 11 አንትከ፥ ኦቶተሴ አፈየትእ ቶረምፐይተ ከ ኮደምፐይተ አኤርከሜ ከ ኮልሰምፐይተ ኮዴ ከ ሹመሜ። 12 ወ መለ ረኮሴ አነ ቀረ ከይንተ ኔፎ፥ ሴ መለው። መ ኾር ጬረ እሽን አነ ደካንንቾ። ማነ መለ፥ አይኖ አክመን አመኔ እንኡፐይ፥ አክመ አተሮሴን አእሸኤው አነ ዳሼ ሀከ ኩያቶሴትትእ ቶይቴተ ኤተንሾ እንኡፐ። 13 ከ አመንቴተሴ እሾ ጫለለሴኔ ዬሱስ ክርስቶስ ቁደን አከናትን ቃሌተሴ አዱካተ፥ አንኬ ኮልሼ፥ ፐሃነ እቱረ ቀፐዶ። 14 ሀፑረሴ አቁልቁሎተ እኖ ከረ ከሎ ቁደን፥ አተረሴኔ አዱካተ ኬ ዳሰሜ፥ ቶይቴ። 15 ኦረ ፒተ እስየ ፕሰ አክመ አነ መርመዴ ከ አሌ አነ ዲሼ እኡፕተ። ፍኬሉስ እሾ ሄርሞኬን ኩል እሾቶፐው ቻን። 16 ቶሎፐ ኦኔስፎርእ፥ አዋቀ ሱረይሰታድ እሾነ ዳሾ። ማነ መለ፥ እሸ ሌከይቴተኔ አነ ኮኮነይሼ፥ ኡመ ህደምዮን ጬረ እሽ እንደካኔ። 17 ከ ኤቴ ከተመ ሮም ኦፐ ዴኤዬ፥ አነ ፈዴ ፈዴ ከ እሬተን አነ አኬ፤ 18 ኩያተሴት አፖቀለ ሱረይሰታድ እሽ ዳሾ። አንኤፌሶን ከረ ቾዬ ኔፎ፥ አአተ ክቶ አክመ አነ ኬለ ያሌ፥ ፈየኤ ኡፕተይ።
