ዮሀንስ አለመተ 1

1ኤርከነ አነ ቅመይተ ከፐዬ ሀንቶተሴ «ሀንቶተሴ ሬኸምቴ» ሬኸምቴ እሾ ሄላድ አንዱካተን ጫለናት ኤርከሜ። ኡመ አነ ፐተኔ መ፥ ኦረ ዱካተ ኡፖ ፕሰ እሽን ጫለን። 2ዱካቶሴ ኔፎ ኸተው ኦተንትኖፐ ክተ ከ እቱሮፐ ኔፎ ሀከ ፐረፐረት ከላተ። 3ዋቀ ኣፐ እሾ እናድ ዬሱስ ክርስቶስ ከፐዬ፥ ዳሰተ ዋቀ እሾ ሱረይሰተ ከ ነከይተ፥ አዱካተ ከ ጫለለን እኖ ኦል ቻዴን። 4ሄላትፐዬ ዴሞ ዴሞ አከመ ዋቀ ኣፐ እኖ አጨጬ ምነኤ፥ ቆተ ዱካተን ከላነን አንከ ሴዴ አኬ መለ፥ ሀርሞኤን ኸሶዴ። 5ሃንቶ! አከመን ኦል ጫለኖኤን ኬ ቅንሰን። አጨጨሴ አን አመ ኬ ታፍኖ ኔፎ፥ እሰሴ አንኸተው ኡፕኖ፥ እከ ኦተንትኖፐ ቾ ዲሼይ፥ ሃረየን። 6ጫለለ ዱካተ ክዴተ፥ አጨጨ ዋቀትን ከላተ። አጨጮሴ ኔፎ፥ አከ ፐዮተ ቀረው ደከይቴን ምነኤ እኪን፥ «ጫለለን ከላደ።» 7ደርተምፐየ ኦረ ሰሰፐነ ሌከየ ፒሴ ቀረ ኼ ከ ኪን፥ «ዬሱስ ክርስቶስ ነመን ኮድኔ ከ ዋቀ ከፐዬ ፒተ ቀሮፐን ዴኔ።» ነመ አሴ ኪኖ እሸ ሰሰፐንፐይተ ከ ፓለካረ ክርስቶስ። 8እሽነ አከ ኮደ ያለይሽን እሽን ቱረን ፐንን አከ ሙሻረይሽን ፕሰ አከተኔኤ ጨፓደ ከ ቶይታደ። 9ነመ ኮልሰ ክርስቶስን ከላንንክንን ከ ከፐ ሴካኖ፥ ዋቀ እሸ ኦልን ቾ። ነመ ኮልሰ ክርስቶስን ከላኖ፥ ዋቀ ኣፐ እሾ እነ ዋቀ እሸ ኦል ቻን። 10ነመ እሽን ከፖፐ ዴኖ ከ ኮልሶሴኤን ቀፕንን፥ ኸይኩመ እሸን ቴየደን ኡመ ሀርከ ኔፎ እሽእን ቄደን። 11ማነ መለ፥ ነመ ነሞሴት ሀርከ ቄኖ፥ ኮደሴ ኻድ ኔቀ ቁደ ቆተንይ። 12ወ አንአሉ እሽነ ታፌተ ፈዴ እሌክ ሌክ መ፥ ወርቀተ ቀረ እሽነ ሌለ አንሄኖ። ሴከፐዬ አከ ኸሰ ኩተ እኖ ደካዶኤ፥ አከን እሽን ከፖፐ ዴኦ ከ እልዳፐ ኦል አክኖ ከ ኦልን ተከ ቶራኖ ኸሰን ኮን። 13ሄላሴኔ አኤኔንተሴ «ኤኔንተሴ» ኸይሽን ሬኸምቴ ነከይተ ኬ ዴሀን።

will be added

X\