ቆሮንቶስ አለመ 9

1ቆተ ፖሀሴኔ ክርስታነ ፒተ ይሁደት ፖሆናኔት ዴሰ፥ እሽነ ታፌተ አነ ፐርፐቺስንንክቶ። 2አክመ ቃርቃርሰ ፖሀ ሀርምሰቴን፥ ቆተን ኡፕናዴ መለ፥ ኦረ ሜቄዶንየትእን እሽን ፔፐዴ ከ ክዴ፥ «ሀ ኦረ አከየ ፐርፐልው ቃርቃርሰ ፖረ ሀርምሰዴን።» አእሽነ እሾተ ቃርቃረ ፋንተን ምነኤ፥ ኦረ ከረ ኩተከ እሾቶፐዬ ፒቴ ኼ። 3መ ኾር፥ ሴዴ አንእሽን ፔፐንኖ፥ አከ ፓተ ፐተን ኮድንንእ፥ ሄለሴኔ ኸኖ አክርስታነኤን እሽነ ኤርከ። እሽነከ፥ አክመን ቱረን እሽነ ሌሌ ምነኤ፥ ቱረ ሀርምሰተን። 4ኦ ኦረ ሜቄዶንየ አነ ኦልይ እሽን ከፖፐ ዴኦዬ፥ ከ አክመ አሀርምሰንን አከኔዬ፥ እኖሴኔ ቆተይሽነዬ ዴሰ ወ ኔቀ ተከ ኔፎን ኪንን፥ ከ እሽን አመነ፥ እንጬረ። እሽነ ከሱከ ጬርተን። 5ሴመለ ዳሰተሴ አኸሰ ከልቴን፥ አክመ እመክተን ከ ሀርምሰተኔኤ፥ ሄለ ክርስታነ አእኖ ቱረን ዴሰ ዴአ ከ እሽን ኮኮነይሸ፥ ዴሀሜተ ከ እሽን ከፖፐ ኤርኬተ ፐርፐቺስን አነ ፐሀናቴ። ሴዴን ኦር፥ ዳሰተይሽን አእሬተን ዳነኤን ኮድቶ መ፥ አኸሰን ዳሼኔ ኮድተ ከ ኤዬ ቆጰውተ። 6እሴ ኪንቶ፥ «አሸከ አይለዴ አሸከኤ ፌረን፥ አኩተ አይለዴከ አኩተ ፌረን።» መቴ ኦርሰደ። 7ሴመለ ዋቀ ነመ ኸሰን ዳኖ ጫለንይ፥ ነመ ወ እስ ከረ ድከዴ አኸሰን ዳሾ ዲሼይ፥ ኸሰ ቀረ ዴሰ ታክ እሬተኔን ዳንን። 8አከ አውተ ፕሰ ቅንደ ፕሰን ወ እሽን ከይነ ቀረን ቀፕቶኤ ቀፕናተን፥ ከ እሽን ኮደ ፐኻረ ፕሰ ኮተኔኤ፥ ዋቀ ኩቱምተን ሰካድ እሽነ ዳሰተ እኤተንሸ። 9ሴዴ ኔፎ አከሴ አታፈምቴ ከ ኪንቶ፥ «አቴኮለየ ፐተዬ ዳሼ፥ ሀንቄሉማድ ፐተን ቀፐን።» ምነ። 10እሰሴ አይለምፐይተ ኾተ ዳኖ፥ ከ ደምተኤ ደመ ዳኖ፥ ኾተ አይላተኔ እእሽነ ዳሸ፥ ከ እሽነ ኩትሸ። ከ ኮደ ሀንቄሉመይሽነ ኔፎ ኩትሸ። 11ኦረሴ አዳሰተይሽን እኖ ቁደን እሾተ ቀረ ከይንቶ ፕሰ አከ ዋቀ ከለተይሰዶኤ፥ አከ አውተ ፕሰ ዳሰኔኤ፥ ዋቀ ፖረ ፕሰን እእሽን ቴየንተይሸ። 12ኮዶሴ አዳሰተ አኮንተን፥ ረኮተ ክርስታነ ቃርቃሬተ መልይ፥ ኦረ አከ አኩተት ዋቀ ከለተይሰዶ ኮን። 13ኮዶሴ ኸይሽን አዳሰተ ቀጨን ቀፕንን፥ አክመ ኦቶቶሴ አፈየ አክርስቶስ ኡፕናቴን ከ አጨጨምተን፥ ከ እሾተ እሾ ኦረ ፕለ ኔፎ ዳሰተ ፖሆንተኔ አክንይ፥ ኦረ ሌከይተከ ሴ ምነን ዋቀ ከለተይሰን። 14እሾተ ኔፎ ዳሰተሴ አዋቀ ኩቱምተን አሴ እሽነ ዳሼ መለ፥ እሽን አኬተ ኸጬለን ከ ዋቆፐ እሽነ ቅንሰደን። 15ዳሰሴ አዋቀ፥ አፈን ሃሰወተን ኤተንሰምንክንን መለ አከለተ ዋቀ ከዮ።

will be added

X\