ቆሮንቶስ አለመ 8

1ኮያለኖ፥ ዳሰተ አዋቀ ትከ ክርስታነ አፒተ ሜቄዶንየት ዳሼ፥ አከ ኡፕናተኔን ፋንነ። 2እሾተ፥ ረኮተ እሾ ኤከይሱመ ኩተየ እሾተ ቀረ ከዬ። አኮድቶመ፥ ኸሰይሾ ቆተ ኩት መለ፥ ከድ ፑኑ ድኬ ቴኮለየ ኮዴኔዬ፥ ዳሰተ ኩተኤ ዳሼን። 3አክመ ጫለላሶ ቀረኤ፥ አኤተንናን ከ አኤተንንንክንን ኩል ዳሼን፥ አነ እሾተ ማኩመ። 4ከ አከ ክርስታነ ፒተ ይሁደ ኩል ቃርቃሬተ ሳንተ አከደኔኤ አኩተት እኖ ቅንሰዴን። 5ከ አንእኖ ድከንኖ ቀሮፐ ሴዴ ኮዴን። ፐዮተ ፖቀለኤ እስ ዳሼን ከ ከመ ዴሰው፥ አከ ዋቀ ፋኖ ቀረኤ፥ እስ እኖ ዳሼን። 6ፐዮተ ኮዶሴ ቆተ ቲቶ ፐዬ መለ፥ አመ ኔፎ አክመ እሸኤው ከመ ቻዶ ከ ኮዶሴ አጫለለ እሽኖፐዬ ቾ ፉለን ከዮኤ፥ እሸዌን ናፐኔ። 7እሽነ፥ አመንቴተኔ ከ ሃሰኔ ከ ኡፕናኔ ከ ኸሰ ነመ ቃርቃረ ቀፕተኔትን ከ፥ ጫለለ እኖ ቀፕተኔትን ከ ዌ ፕሰኔ ጫልተኔይ፥ ኮዶሴ አዳሰተትን ጫለው። 8ኡመ አክመ አጨጨ ምነ አሴ አንኪንአንቾ መ፥ አክመ ኦረ ፕለ ነመ ቃርቃረ ጫለኖ፥ እሾ ጫለሎሴን አክመ ፐሀን ኦልከፐ ቶዬተ ከ አክመ ጫለለ ዱካተ ቀፕተን ኡፕናተ መለ። 9እሽነ ዳሰተሴ አፖቀላኖ አዬሱስ ክርስቶስ ኡፕናቴን። እሸ፥ ከድ ፑኑ ቴየንቶለይተ ኮዴዬ፥ አከ እሽነ ቴኩማድን ቴየንቶለየ ኮድተኔኤ፥ እሸ እሽን መለ ክዴ ከ ቴኮለይተ ኮዴ። 10ቆቶሴት ዴሰ ዴሀምትዮን እሽነ ዳሸ። ኮደሴ አፐርፐል ኮደ ፋቴን ከ ኦፐ ኩል ፐይቴን ከት ድክንተን፥ እእሽነ ፐኻር። 11ሴመለ፥ አከ ኮደ ሀርምሰቴን ምነ፥ አከ ኮተን ከ ድክሰኔኤ፥ ወ ዳሸ ኤተንንተኔ ዳሸ ከ ድክሸ። 12ኦን ኸሰኔ ዳንይ፥ ኦ አኤተንናን ምነ ክቶ ዳናኔዬ፥ ዋቀ ቴየን ዲሼይ፥ ኦ አኤተንንንክንን ዳናኔዬ፥ ዋቀ ቴየንንቾ። አፐዮተ ኮዶሴ ኮዴተ ፈዴ ከ ኮደ ፐዬ ኔፎ፥ እሽነው። 13እን አንአሴ ኪኖ ኔፎ፥ «እሽነ ዳሰተ ኬለ ረከደ፥ ኦረ አታከ ከ ኔሰዶ» ክዴትዮን መ፥ 14ኦ እሽነ ረከንተኔዬ፥ አከ ኮደቴተይሾ እሽነ ቃርቃርተ ኮድቶኤ፥ አመ ኮደቴተይሽን አእሾነ ቃርቃርተ ኮድቶ፤ ኦልምነተከ ቻዶ። 15ሴዴ ኔፎ አክመሴ አታፈምቴ ከ ኪንቶ፥ «አኩተ ፖሄ፥ ዌ ኬለዬ እሽን ሀስኔ፤ አሸከ ፖሄ ኡመ እሽእን ቀጭኔ» ምነኤ ኮድተ። 16ዋቀሴ፥ አክመን እኖ እሽን ቀረ ቶይንኖ ምነኤ፥ አከ ቲቶ እሽን ቀረ ቶዮ ኮዴ፥ አከለተ እሸ ከዮ። 17ቲቶ እስ ከረ ጫለዴ ከ ኸሰን እሽን ከፖፐ ዴን ዲሼይ፥ ቆተ ዴሀምትኖ ቴየዴ ፐተ መለን። 18እሸ ኦልይ፥ እነሴኔ ኸኖ አክርስታነ፥ ትከ ክርስታነ ፕሰ ከረዬ ቃሌተሴ አዋቀ ቶሬተን ፔፐመኤን ኤርክነ። 19ሴመልይው፥ እኖሴን ኸኖ አክርስታነ፥ አንእኖ ኡልፌነ ፖቀላት ኮዶሴ ፐኻረ ኮንኖዬ፥ ከ አክመን ዱካተን ኮዶሴ ኮደ ፋንኖ አክንኖዬ፥ አከ እኖ ኦል ኣኖ ከ እኖ ኦል ኮዶሴ ኮዶኤ ትከ ክርስታነኤ እኖ ቁደ እሸ ሬኼን። 20ኦን ካጮሴን ጫለለን ዳሰሜትን ኮደ ኮንኖዬ፥ አከ ነመ ደፐ እኖ ቀረኤን አክንንእ፥ እንቶይተንነ። 21ማነ መለ፥ እኖ አፉለ ፖቀለ ፐተ ቱረኤን ኮድንን መልይ፥ ፉለ ነመ ኩል ቱረኤን ወ ፐኻረ ኮዴተ ፋንነይ። 22እነሴኔ ኸኖ፥ ክሴተ ሌከይቴተ ፖረ ሌከይተን ኤከይሰሜ፥ አንከ አክመ ኮኮክ አክኔ፥ ሴኔን ኦፐ ቲቶ ኦልይ እሽነ ኤርክኔ። እሸ ቆተ አኩተት እሽን አመኖ መለ፥ አኸተ ቀረን ቀፕቶኤ አኩተት እሽን ቃርቃሬተ ፋን። 23ቆተ ቲቶ ዴሰ፥ እሸ ነመ አንእሽን ቃርቃረ መለ፥ ኦልን ኮደ ኮንኖ። ቆተ ሄላኖ አክርስታነት ዴሰው፥ እሾተ ኦረ ኤርከሜ አትከ ክርስታነ፥ ከን ኡልፌነ ክርስቶስ። 24ሴመለ አክመን እሽን ፔፕንኖ፥ ጫለላስንከ ዱካተ ኮዴን፥ እሾተ ጫለተን ትከ ክርስታነ ቱረ አክሸ።

will be added

X\