ቆሮንቶስ አለመ 5

1ደክንቶሴ ኸኖ አንፒሴ ቀረዬ፥ አክመ ቱከነ ምነ ኬለ ከላንኖ ኦ ፐንቶዬ፥ አክመን ትከ አኬረንተን ቀፕንን፥ አዋቀ ቁፔ ነመከን ቁፕንን ሞንቴዬ ቀፕኖ እንኡፕነ። 2ከ ደክንተሴ ኸኖ ቱከነ ከላተ ምነ ፐሀቶ ኬለዬ አሬ ፒተ ቀረዬ ቁጨንነ ከ ትከሴ ኸኖ አሞንተ ኦፐ ከልተ ኸጬልነ። 3ኦን ትኮሴ ኸኖ ከሮፐ ከሎ ኔፎዬ፥ ሉሌ አንቻኖ። 4ኦን ደክንቶሴ ኸኖ አሬ አክመ ቱከነ ምነ ኮድቴን ከላንኖዬ፥ እኖ ቀረኤ ኮኮነን፥ አንከ ኬለዬ ቁጨንነ። ወ አንመለ ኬለ ቁጨንነ ኔፎ፥ አከ ቻተ ወ ቶነ ቀረ ፕሮኤ፥ አንከ ደክንተ ቶንንክንንን እስ ቁደ ዴክኖን ፋንነ ዲሼይ፥ አከ ደክንቶሴ ኸኖ ቶንቶ ፐቶ አንፋንአንክኖ። 5አሴዴት እኖ ሀርምሼ ኔፎ ዋቀ። ከ ዳሰተ አእቱሮፐ እኖ ዳሾ መለ፥ ሀፑራድ አክመ ቀፕቴተ ምነ እኖ ዳሼ። 6ሴመለ፥ ሀከን ደክንቶሴ ኸኖ አሬ ትከ ከላተ እኖ ኮድቴን ክኖ ከረኤ፥ አክመን ዋቀ ከፐዬ ሴክኖ እንኡፕነ ከ አውተ ፕሰ ኸሰን ከላንነ። 7አመንቴተኔን ከላንነ ዲሼይ፥ ወ አከነትን አንከላንአንክኖ። 8ከ አከን ደክንቶሴ ኸኖ አሌ ዲኖ ከ ፖቀለ ኦልይ ከላኖን ፋንነ። ሴመለ ቃፐ አንቀፕኖ። 9ከድን ፑኑ ደክንቶሴ ኸኖን ክነዬ ታክ ቶነዬ፥ ወ አንፋንነ፥ ፖቀለ ኸሰሰ። 10ማነ መለ፥ ነመ አፒተ ቀረዬ ደክንተን ቾዬ፥ ወ ኮዴ ፕሰ ከፐኤ፥ አከ አፐኻረ ታክ አኔቀ አከዶኤ፥ ፕሰንትይን ክርስቶስ ቱሮፐ ፍርቴተ ዴሀነ። 11ዋቀ ፉሬተ ማነ አክመ ኮድቴ ቆተን ኡፕኖ መለ፥ እኖ ኦረን አመንሲስንነ። ዋቀ ኔፎ ፈየኤ እኖ ኡፐ። እሽነ ኔፎ አክመ ድከተይሽኖፐዬ እኖ ኡፕተኔኤ፥ ኸሰን ኮን። 12ኦረ ወ ለከ ቱለን አካነትን እስ ፔፕኖ ከ ወ ከርተ ከረ ቻትን እስ ፔፕንንክንን ምነኤ ሃሰ ኦርሰተኔ አከ ቀፕናተኔኤ፥ እኖ አከን እሽን ቱረ እስ ከለተይሰኖ አንሄኖ መ፥ አከ እሽነ እኖ ፔፐተኔኤን ሳንተ እሽነ ኮንነ። 13ኦን አንታረየዬ፥ ዋቀኤን ታሮንነ፤ ኦን አንኦረ ፈየ ቀፖዬው፥ እሽነኤን ፈየ ቀፕነ። 14አክመ ነመ ተከ ኦረ ፕሰ መለ ቶኤ፥ ኦረ ፕሰከ እሸ ኦል ቶኤ፥ ቆተን ኡፕናኔ መለ ጫለለ ክርስቶስ እኖ ክቴስን። 15አከ ኦረ ቾ ፕሰ እስ መለን ከላንን፥ ከ እሰሴ እሾተ መለ ቶኤ ከ እሾተ መለ ቶቶፐ ኼ ከላዶኤ፥ ክርስቶስ ኦረ ፕሰ መለ ቶኤ። 16ከድን ፑኑ ኸተ ድከተ ፒተትን ክርስቶስ ቶይንነዬ፥ አሬፐ ዴሰ ኦር፥ ድከተ ፒተትን አንእሸ አንቶይኖ፥ ኡመ ድከተ ፒተትን አን ነመ ተከ ኔፎ አንቶይኖ። 17ሴመለ፥ ነመ ኦን ክርስቶስን ከላንይ፥ ኡመተ ሃረየ። ወ አኬሬ ፕሰ ተርፔ፥ ሃረየከ ዴሰ ከዬ። 18ሴዴ ፕሰ፥ ዋቀሴ ክርስቶስ ቁደን እስፐ እኖ አራርሼ፥ ከ ኮደ አራርሰ እኖ ዳሼ ከፐ ዴቴ። 19ሴዴ ኔፎ፥ ዋቀ ክርስቶስ ቁደኔ ኦረ ፒተ እስፐ አራርሼ። ኡመ ጩፖተይሾ እሾተ ቀረኤን ድክኔ። ከ ቃሌተሴ አአራረ እኖ ዳሼ። 20ቆተ ዋቀ እኖ ቁደን እሽን ሀሌኖ መለ፥ እኖ ክርስቶስእን ኤርከሜ ከ «ዋቀ አራረመ» ኪንነ፥ ከ ፐከ ክርስቶስፐ ኮድኔ ከ እሽን ቅንሰንነ። 21አከን እኖ ክርስቶስ ቁደን ሀንቄተ ዋቀ ኮድኖኤ፥ ዋቀ፥ እሸ አጩፖተን ቀፕንን ቄዴ ከ ፐክኖፐ ጩፖተ ኮዴ።

will be added

X\