ቆሮንቶስ አለመ 4

1ሴመለ፥ ዋቀ ቆተ ሱረይሰታድን ኮዶሴ እኖ ዳሼ መለ፥ አንኸሰ አንሙሮ። 2ወሴኔ ዴከዴ ከ ነመ ጬርነ አሌኤን ዲኔ። ኡመ ሰሰፐ አንኮንአንክኖ፥ ከ ቃሌተ ዋቀ ደርተ ኦሎፐን አንለሀንአንክኖ። መ ኾር፥ ዱካተን ለኮፐ ሶክንነ ከ አከ ኦረ ፕሰ ቆትኖ ዴሰ ድከተ ፐኻረ ቀፕናዶኤ፥ ፉለ ዋቀ ቱረ እስ ሀርምንነ። 3ኦቶቶሴ ኸኖ አፈየ አንቶርንኖ ኦን እጩተምቴ ኔፎዬ፥ ኦረ ፐኖኤ ጩተምቴ። 4ኦሮሴ አመንንክንን፥ ወ መለ አመንንክንን፥ ቆተ ሴተነሴ ዋቀ ፒተ ኮዴ ድከተይሾ ቱረ ቱከንሼ መለ፥ ከ አከ ለአይተሴ አኦቶተሴ አፈየኤን አክንንእ እሾተ ደውሬ መለ። ኦቶተሴ አፈየ ኔፎ፥ ቆተ ኡልፌነ ክርስቶስ፥ እሰሴ ፐሀነ ዋቀ ኮዴት ዴሰ ሌል። 5ሀ እኖ፥ አክመ ዬሱስ ክርስቶስ ፖቀለ ኮዴ፥ እኖከ እሸ መለ ኪኔ ከ ኦርኸያስን ኮድኔን ቶርንነ ዲሼይ፥ እኖ እስ አንቶርንአንክኖ። 6ዋቀሴ ክዴ፥ «ለአይተ አቱከንቶፐ ለአዮ»፥ እሸ ቄዴ ከ፥ አከን ለአይተሴ አኡልፌነ ዋቀ፥ እሰሴ ፉለ ክርስቶስፐ ኦፐይኖ፥ ኡፕነን አከኖኤ፥ ለአይታድ ከርትኖ ከረ ለአይሼ። 7መ ኾር፥ ሁፕኖሴ አሴ ኩተ፥ አክመ አዋቀ ኮዴ ከ ኸኖን ኮድንን አክሰኤ፥ እኖ አንኦኮቶወ ምነ ከ፥ ቴየንቶሴ እስከረ ቀፕነ። 8ቅንደ ፕሰኔ ረኮተ እኖ ቀረ ከይን መ፥ አንፑተምአንክኖ፤ አሌከትን እኖ ቱረ ኦልን ፐን መ፥ ኸሰ አንሙርአንክኖ፤ 9እንቶረምነ ከ ፖረ ዳነምነ መ፥ ለኮፐ አንሀስንአንክኖ፤ እንደይሰምነ ከ ፒቶፐ ፒንነ መ፥ አንቶንአንክኖ። 10አከ ቻተ ዬሱስ ደክንትኖ ከረ አካዶኤ፥ አውተ ፕሰን ቶተ ዬሱስ ደክንትኖን ፖረ ሃደንነ። 11አከ ቻተ ዬሱስ ደክንትኖ አቶንቶ ከረ አካዶኤ፥ እኖ አውተ ፕሰን ከላትኖፐዬ ዬሱስ መለ ኪንነ ከ ቶተ ከይንነ። 12ሴመለ፥ አንቶቶፐ ክኖዬ፥ እሽነ ቻተ አከተን። 13አክመ መታፈ ቁልቁሎወ ኦፐ ታፈምቴ ከ ኪንቶ፥ «እንአመኔ ከ ሴ መለ ሃሰወዴ» ምነኤ፥ እኖ ኔፎ ሀፑሮሴ አአመንቴተኤን ቀፕነይ፥ እንአመኔ ከ ሴመለ ሃሰወንነ። 14ዋቀሴ ፖቀለ ዬሱስ ቶቶፐ ኻሼ፥ አክመ ዬሱስ ኦልይ እኖ ኩል ቶቶፐ ኻሾ፥ ከ እሽን ኦልይ ፉላድ ቱሮፐ እኖ ዴሀይሾ፥ እንኡፕነ። 15ሴዴ ፕሰ ቶይ፥ እሽን መለው። ኦ ዳሰቶሴ አዋቀ ኦረ ኩተ ቀረ ከየን አንቶዬ፥ ኦረ አሴው ኩቱምተን ኡልፌነ ዋቀት ከለተ ከልሸ። 16ሴመለ ኸሰ አንሙሮ፥ ከድ ፑኑ ደክንትኖ አለከ ቱለ አሌ ፐንቶዬ፥ ደክንትኖ አከረን ኸተ ኩያተ ምነኤ ሃረየ ኮድን። 17ረኮሴ ኸኖ ሸከ አክሴተ ዴሰ ኔፎ፥ ኡልፌነ ልኬተ መል ኩተ፥ አዌ ተከ ኔፎ ምነን ከይንን እከ ፕረመን ቀፕንን፥ እኖኤ ኮን። 18እኖ ወ አካንንክንን ኦፐን ቶየንነ ዲሼይ፥ ወ አካነ ኦፐ አንቶየንአንክኖ። ማነ መለ፥ ወ አካነ፥ ወ ክሴተ ዴሰ፥ ወ አአካንንክንን ኾር፥ ወ ፐተን ቀፕንንእይ።

will be added

X\