ቆሮንቶስ አለመ 3

1ሄለ ለመተኤን እስ ከለተይሰተ ፐይንነዌ? ሞን ሄለ፥ አከ ኦረ ዴሞ ኮኖ ምነኤን፥ ወርቀተ ከለተ እሽነ ኤርኬተ ታክ እሽን ቀረ አከተ እኖ ፋኒ? 2ወርቀትኖ አከለተ አከርትኖ ከረ ታፈሜ፥ አነመ ፕሰ አክኖ ከ አነፐፕኖ፥ መተይሽነ እሽነ። 3እሽነ አክመ ወርቀተ ክርስቶስ ታፌ፥ ከ እኖ ቀረ ኤርኬ ኮድቴን፥ እኡፕናተም። ወርቀቶሴ ኔፎ፥ ሀፑረ ቻተምፐይተ ዋቀትን ታፈሜ ዲሼይ፥ ቀለሜተኔን ታፈሜ። ከ ከርተ ነመ ከረ ታፈሜ ዲሼይ፥ ደከ ቀረኤን ታፈሜ። 4ሴዴ ኔፎ ቆተን ክርስቶስ ቁደን፥ ዋቀ ከፐ አመንቴተ ቀፕኖ መለን አሴ ኪንነ። 5ኮዶሴ ኮደኤ፥ ዋቀ አከን ኤተንኖ እኖ ኮን ዲሼይ፥ ወ አንኪነኤ፥ «እኖ እስን ዌ ኮዴተ ኤተንን» እንክቶ። 6ኮደይቴተ አፍተለን ታፈምቴን ኮድንን መልይ፥ አከን ኮደይቴተሴ ሃረየ ሀፑረን ኮድቴፐዬ ኮደምፐየ ኮድኖኤ፥ አኤተንሰ እኖ ዳሼ እሸው። ማነ መለ፥ ሴረ ታፈሜ ነመ እከንይ፥ ሀፑረ ቁልቁሎተከ ነመ ቻንይ። 7ሴረ ፍተለኔ ደከ ቀረ ታፈሜ። አውተ ሴረ ዳሰሜዬ፥ ኡልፌነ ዋቀ እለአዬ ከ አካዴ። ከድ ፑኑ ለአይተሴ ፉለ ሙሴፐ ኦፐይኖ አፐኖ ኮዴዬ፥ ኦረ እስረኤል ፉለ ሙሴፐ ቶየተን ኤተንኔ። ከ ኩል አውተ ሴረ አኦረ ቀረ ቶተ ቄዴ ኡልፌነ አሴ ፐሆን ዴኤዬ፥ 8ኮደሴ ሀፑረ ቁልቁሎተትን ሶኬ ዴሰ፥ ኡልፌነ አተ ቾ ቀፕናደው? 9አውተ ኮደ ኦረ እሽን ጪጨሜ ኡልፌነ አሴ ቾ ቀፖዬ፥ ኮደ አኦረ እሽን ሀንቄለዎ ዴሰ፥ ኡልፌነ አተ ቾ ቀፕናደው? 10ኡልፌኖሴ አኸተ፥ ኦ ኡልፌኖሴ አአመ ድኬ ጫሌ ከፐ ቶይናኔዬ፥ ኡልፌነ ኸተ አካንንቾ። 11አውተ ዌሴን ፐነ ኩል ኡልፌነ አሴ ፐሆ ቀፕናዴኔዬ፥ ዌሴን ሀከ ፐረፐረት ፐተን ቀፕንን ዴሰ፥ ኡልፌነ አተ ቾ ቀፕናደኔው? 12ሴመለ ቆተን ኸሰ አሴ ፐሆ ቀፕኖ መለን፥ ፉረ መል ሃሰወንነ። 13ሙሴ፥ ኦ ለአይተ ፉላድ ፐኖዬ፥ አከ ኦረ እስረኤል ፐቴተ ለአይቶሴኤን አክንንእ፥ ጨፐረኔ ፉለ ቀረ ዴከዴ መ፥ እኖ አንእሸ ምነን። 14ኸይሾ ድከተይሾ እሉሌ፥ እሾተ አምክ ኦ መታፈ ኮደይቴተሴ አኸተ አነፐፕናኔዬ፥ ጨፐሮሴ ኤዬው ቻ። ማነ መለ፥ ነመ ኦ ክርስቶስፐ ዴኦ ፐተዬ፥ ጨፐሮሴ አሌ መይንይ። 15አምክ እሾተ ኦ ሴረ ሙሴ አነፐፕናን ፕሰ ከፐኤ፥ ጨፐሮሴ ድከተይሾ ቱረ ዴክን። 16መ ኾር፥ ነመ ኦን ፖቀላፐ ቲተወዬ፥ ጨፐሮሴ አሌ መይን። 17ፖቀለ ሀፑረ፤ ፖረ ኦፐዬ ሀፑረ ፖቀለ ቾ ኔፎፐዬ፥ ነተን ሶኬተ ቸይ። 18ሴመለ ኦር እኖ፥ ፕሰንትይን ፉልኖ አቀረን ዴከምንን፥ ኡልፌነ ፖቀለ አክነ። ኡልፌነ ፖቀለሴኔ ሀፑረ ክደመ ቁደ ዴኖከ ኡልፌነ ቀረኤው ኡልፌነ ፐደወ ከ አከን ፖቀለ ፐሀናኖ እኖ ፑርሸ።

will be added

X\