ቆሮንቶስ አለመ 2

1ሴመለ፥ አከን ለመተ እሽን ከፖፐ አንዴንን ከ እሽን አንኘረሀሲስንን እንፒሰዴ። 2አንት ከትን ፑኑ እሽን ኘረሀሲሴዬ፥ እሽነ አንኘረሀሲሴ መልይ አአነ ኸሰይሸ ኦፐ አይኖ? 3ወ አንመለ እሽነ ታፌ ኔፎ፥ ኦን እሽን ከፖፐ ዴኖዬ፥ ኦረሴ አአነ ኸሰሰ እሾተ ፋንቶ፥ አከ አነን ኘረሀሲስንን መለ። ኸሶትዮ አክመ ኸሶተይሽን ኮዴ፥ እንአመንይ። 4ወ አንመለ ረኮተ ኩተትን ከ ከርተ ከረን ኸተ ቃፐ እሾ እልመመ ኩተየ ኡርቅሰን እሽነ ታፌ፥ አክመን አኩተት እሽን ጫለኖ አከ ኡፕናተን መለ ዲሼይ፥ እሽን ኘረሀስሰ መለን። 5ነመ ተከ ኦን ነመ ኘረሀሲሴዬ፥ አነ ኘረሀሲሴ መ፥ ቅንደ ፕላትን እሽን ፕሰ ኘረሀሲሴ። ሴ ክዴሴ ደፓድ ኩትሰን። 6ነሞሴ አሴ ፐሆ፥ ኾረ አእሽኖፐዬ ኦረ ከረ ኩተ እሸ ቀረ ሙሬ፥ እእሸ ከየን። 7ሴመለ ነሞሴ፥ አከ ድኬ ኘረሀተን ኸሰን ሙርንእ፥ እሽነ ደፓድ እሽ ዲሰተ ከ ኸሰ እሽ ኦርሰ እሽን ፋን። 8ሴመለ አከ አኩተት እሸ ጫለንተን እሽ አክሰኔኤን እሽን ቅንሰን። 9ወ አንመለ ሴዴ እሽነ ታፍነ ኔፎ፥ አከን እሽን ኤከይሰዶ ከ አክመ ቅንደ ፕሰን አአጨጨመ ኮድቴን ኡፕናዶ መለ። 10ነመ አእሽነ እሽ ደፓድ ዲንተን፥ አንት ኔፎ አሴዌን እሽ ዲን። ኦን እሽ ዲሾ ኔፎ፥ ኦን ወ እሽ ዲሸኔኤ ቸዬ፥ ነመ አንእሽ ዲሼ፥ እሽን መለን ክዴ ከ ፉለ ክርስቶስ ቱረ እሽ ዲሼ። 11ሴዴ ኔፎ፥ ሳንቶሴ አሴተነ ፈየኤን ኡፕነይ፥ አከ ሴተነ እስኬሎፐ እኖን ኦርሰንን መለ። 12ኤቴን ኦቶተሴ አፈየ አክርስቶስ ቶረኤ ፒተ ትሮአደ ኦፐ ኣኔዬ፥ ፖቀለ ኻረ ኮደኤ አነ ፐኔ። 13መ ኾር፥ ቆተን እናኖ ቲቶ ኤዬ ደፔ መለ፥ ከርትዮ ፖረ ተከኤን ኩቲኔ፥ አንከ ኦረ ኤዬ ቾ ከፐ ኼ ከ፥ ፒተ ሜቄዶንየ ኦፐ ኣኔ። 14መ ኾር፥ ዋቀሴ ክርስቶስ ቁደን አውተ ፕሰ ፑተይመን እኖን ፖረ አኖ፥ ከ አከ ኡፕነ ቆተ ክርስቶስ ዴሰ አከ አሉመ ሽቶተ ምነኤ፥ ፖረ ፕሶፐ ከይትኖኤ እኖን ኮደ ኮደኖ፥ አከለተ እሸ ከዮ። 15ማነ መለ፥ እኖ ኦረ ድኖ እሾ አፐኖፐዬ፥ አክመ ተንከሬተ አሉመ ፐኻረ ቀፕቶ ምነኤ፥ ክርስቶስ ከልሶተ ዋቀት እኖ ዴሀይሼይ። 16ኦረ ፐኖኤ፥ እኖ አንኸቹመ ነመ እከነ። ኦረ ድኖኤው፥ አንአሉመ ነመ ቻነ። ከ ኩል አይኖ ኮዶሴ ኮደ ምነ ቀቴ? 17ሀ እኖ፥ አክመ ኦረሴ ሌከ፥ ቃሌተ ዋቀ ወ ኬለ ቶክተ ቄነኔት ኮዴ ከ ፖረ ከኖ ምነኔ መ፥ ኦረ ከርተ ፈየትን ኮዶስት ኼ ከ ዋቀ ከፐ ኤርከሜን ኮድኔ ከ ፉለ ዋቀ ቱረ ክርስቶስን ሃሰወንነ።

will be added

X\