ቆሮንቶስ አለመ 1

1ኤርከነ አነ ፐውሎስ፥ አከ ዋቀ ፋኖ ቀረኤ ኮደምፐይተ ዬሱስ ክርስቶስ ኮዴ፥ እሾ እናኖ ትሞቶስ ከፐዬ፥ ትከሴ አክርስታነ አዋቀ ቆሮንቶስ ከረ ክቶ እሾ ክርስታነ አፒተ አከየ ፕሶፐ ቾ ፕሰ ኤርከሜ። 2ዋቀ ኣፕኖ እሾ ፖቀለ ዬሱስ ክርስቶስ ከፐዬ፥ ዳሰተ እሾ ነከይተ አእሽነ ኮዴን። 3ዋቀ አፖቀላኖ አዬሱስ ክርስቶስ፥ እሰሴ ኣፐይሾ ኮዴ፥ ኣፐሴ ኸኖ አሱረይሰተ ከ ዋቀሴ እኖ ኸሰ ኦርኖ፥ አከለተ እሸ ከዮ። 4ኸሰሴ አዋቀ እኖ ኦርኖን አከን አረኮቶፐ ቸ ፕሰኤ ኸሰ ኦርሰ ኤተንኖኤ፥ ዋቀ ረኮወ እኖ ቀረ ከይነ ፕሶፐ እኖ ኸሰ ኦርን። 5ማነ መለ፥ አከመን ረኮተ ክርስቶስ ቁደዬ ኩቱምተን ቆተንኖ ምነኤ፥ ዋቀ አሴው ክርስቶስ ቁደን አኩተት ኸሰ እኖ ኦርን። 6ኦን እኖ ረከንይ፥ አከ እሽነ ድንተን ከ ኸሰ ኦርሰተን መለን ረከንነ፤ ኦን እኖ ኸሰ ኦርሰንው፥ አከ እሽነ ረኮሴ አንእኖ ረከንኖ፥ ዱፐተን ረከተን ከ ኸሰ ኦርሰተን መለ። 7አረኮትኖ ቁደ ቆተንተን ከፐኤ፥ አክመ ኸሰሴ አንእኖ ኦርሰንኖ ቁደ ቆተንተን፥ ቆተን ኡፕኖ መለ፥ አኩተትን እሽን ክፐንነ። 8ኮያለኖ፥ አከ ረኮተ ፒተ እስያት እኖ ቀረ ከይቴ፥ አከ ኡፕናተኔን ፋንነ። ረኮሴ ቆተ አንኤተንንኖ ቀሮፐ እኖ ቀረ ኡልሳቴ መለ፥ «አንቻኖ» ኩልን ኪኔ ከ ኸሰ ሙሬ። 9ሀ አሱ አቶተ እኖ ቀረ ሙረምቴ እኖ ፐሀናቴ። መ ኾር፥ ሴዴ ወ መለ እኖ ቀረ ከይቴ፥ አክመን እስ አንክፐንን ከ ዋቀሴ ኦረ ሌ ቶቶፐ ኽእኖ ክፐኖ መለ። 10ሴመለ እሸ፥ ረኮተ ቶተ ነመ ቀረ ቄንቶ ኬለዬ እኖን ፐሄ፥ ከ እቱሮፐ ኔፎ እኖን ፐሀ። አክመ እኖን ፐሆኤ፥ አመ ኔፎ እሸዌን ክፐንነ። 11ሴመለ፥ አከ ዋቀ ቅንሴተ ሌከይቴተ ኦርሾኤ፥ ከ ሰካድ እኖ ዳሾኤ፥ ኦረ ፕለከ እኖ መለ ዋቀ ከለተይሰዶኤ፥ እሽነ ዋቆፐ ቅንሴተን እኖ ቃርቃረ እሽን ፋን። 12አክመን ኦረ ፒተ እሾ ከረ አኩተ እሽን ኦልይ፥ ቁልቁሉመ እሾ ሳንተ ዱካተ አዋቀ እኖ ዳሼንን ከላኔ፥ ድከትኖ እኖ ሌል። ወ አንፔፐንነ ሴዴው። ኡመ ሴዴ ኔፎ ዳሰተ ዋቀትን ኮድቴ ዲሼይ፥ ኦኩመ ፒተትንን ኮድኔ። 13ወ አነፐፕተኔ ከ ኡፕናተ ኤተንሰኔ መል ወ ፕለ አንእሽነ አንታፍንአንክኖ። 14ኩያተ አፖቀለ ዬሱስ ዴኖዬ፥ አክመን እኖ እሽነን ፔፐሞ፥ እሽነከ እኖን ፔፐምተን፥ አመ ቆትኖ ዴሰ ቁደ ዴሰዌ ኡፕተን መ፥ እቱሮፐ አክመ ፕሰ ኡፕናተኔኤ ኸሰን ኮን። 15አንት ሴዴ ፈየኤን ቀልፔፈዴ ከ፥ አከ እሽነ ሰከ ሀርከ ለክ አከተኔኤ፥ ፐዮተ እሽን ከፖፐ ዴነ ፈዴ። 16ሴዴ ኔፎ፥ ኦን ፒተ ሜቄዶንየ ኦፐ አኖዬ፥ አከን እሽን ከፖፐ መቆ፥ ከ ኦን ፒተ ሜቄዶንየትይ ኦሮዬው፥ እሽን ከፖፐ ቲተዎ፥ እሽነከ፥ ኦን ፒተ ይሁደ ኦፐ አኖዬ፥ ቃርቃርሰ አነ ኮተን፥ ሴዴን ድከዴ። 17ሄለ ኩል አንት ሴዴ አንአሴ ድከዴ፥ ሄለ አክመ ነመ አሬፐ ከ አሬፐ ኪኖ ከ ሃሳድ ፑፑርኖ ምነኤን ድከዴ? ሞን ሄለ አክመሴ አነመ ፒተ ምነኤን ፖረ ተከ «ኣ» እሾ «ሄኤ» ክዴ ከ፥ ሃሰዮ ኦልኬለን ደፔ? 18ዋቀ፥ ዋቀ አመነሜይ፥ እኖ ከሱ ሃሰ አንእሽነ ሃሰወንነ፥ ሃሰ «ኣ» ኪነኔ፥ ከ ኤኖው «ሄኤ» ኪነኔኤን። 19ማነ መለ፥ ዬሱስ ክርስቶስ፥ እነሴኔ አዋቀ፥ አንአነ እሾ ስላስ ከ ትሞቶስ እሽነ ቶርኔ፥ ኸተው «ኣ» ኮዴ ዲሼይ፥ «ኣ» እሾ «ሄኤ» እንኮድኔ። 20ኸሰሴ አንክፐንኖ፥ አዋቀ እኖ ዳሼ ፕሰ፥ ክርስቶስን «ኣ» ኮድን። እኖ ኔፎ፥ ወ አንመለ እሸ ምነን ኡልፌነ ዋቀት «አሜን» ኪንነ፥ ሴ መለው። 21እኖ እሾ እሽን አክመን ክርስቶስን ጨፓኖ አኮዴ ዋቀ። ከ ኸውዴሰ እኖ ሬኸዴ፥ 22ከ መሀይተማድ እኖ ቀረ ኮዴ፥ ከ አከ እኖ ከረ ቻዶኤ ሀፑራድ አከ ቀፕቴተ ምነ እኖ ዳሼ። 23አንት ወ አንመለ ቆሮንቶስፐ አንኦርን ከ አንዴንን፥ አክመን እሽን አንረከችስንን መለ። ሴዴ ኔፎኤ ዋቀ ማክትዮ። 24እሽነ ቆተ አመንቴተይሽነን ጨፓቴን መለ፥ እሽነ አከ ኸሶተን መለን እሽን ኦል ኮደ ኮንነ ዲሼይ፥ አመንቴተይሽን ከሮፐ ከለ ከ እሽን ኡኩመ መለን።

will be added

X\