ትሞቶስ አፐዮተ 3

1ቃሌተሴ ኪንቶ፥ «ነመ ኦን ሳረ ትከ ክርስታነ ኮደ ኸጬልይ፥ ኮደ ፐኻረ ፋን፥» ቃሌተ ዱካተ። 2ሴመለ ሳረ ትከ ክርስታነ፤ አጬረን ቀፕንን፥ ከ አእስከቴተ ተከው ሄሜ፥ ከ አምነ ዴሰ ከላኖ፥ ከ አእስቶይታኖ፥ ከ አሳንተን ኮደ ኮኖ፥ ከ አኸይክተ ቴየኖ፥ ከ አኮልሰ ኤተንኖ፥ 3ከ አማሾንንክንን፥ ከ አትለዮለይተን ኮድንን፥ ከ ናለይተ ኮዴ፥ ከ አሺሸ ፖረ ሺሽንንክንን፥ ከ አካጨ ኾሰንንክንን፥ 4ከ አትካድ ፖረ ፈየትን ሙክሰ ኤተንኖ፥ ከ አሄላድ እሸ ኡልፌስናን ከ እሽ አፈ ደከይናን ኮዴተ እሸ ፋን። 5ነመ ኦ ትካድ አመታድ ሙክሰ መለሎዬ፥ አተ ኩል አተ ትከሴ አዋቀ አክርስታነ ቀረ ቶዬተ ኤተንሻ? 6አከ እስፔፐኔን ኮፍኮፍንን፥ እከ አክመ ሴተነ ቀረ ደፐ ሙረሜ ምነ፥ እሸ ቀረኤን ሙረምንእ፥ ነመ ክርስታነ ሃረየ ኮዴ፥ ሳረ ትከ ክርስታነኤን ኮድንን። 7ነመ ሳረ ትከ ክርስታነ ኮድኖ፥ አከ ኔዱመ እሾ ቱሩረ ሴተነ ኦፐኤን ቀፐምንእ፥ አኦረ አንአመንን ኩል እሸ ፔፕኖ ኮደ ፐርፓችስን። 8አክሞሴ ምነኤው ታቆኔወ፥ አቀልፔተ ፈየ ቀፐ፥ ከ አዱካተ ሃሰወነ፥ ከ አታዴተ ወይኔተ ማሾንንክንን፥ ከ አፓተ ዮንንክንን ኮዴተ እሾተ ፐርፓችስን። 9ከ ድከተ ፈየትን፥ ዱካተሴ ኡፕነይሰምቴ አአመንቴተ እስከረ ቀፐነ ኮደ እሾተ ፋን። 10እሾተ ኔፎ ፐዮተ አቆረተሜን ከ ኦ ወ ኔቀኤን ቀፕንንይ፥ ስት ታቆኔወ ኮዴን። 11እስከተው፥ «እስከተ» አቀልፔተ ፈየ ቀፐ፥ ከ አነመ ሃሰውንንክንን፥ ከ አምነ ዴሰ ከላነ ከ፥ አዌ ፕሰን አመነሜ ኮደ እሾተ ፋን። 12ታቆኔወ፥ አእስከቴተ ተከ ተከው ሄሜ፥ ከ አትካሶ ከ ሄላሶ ፖረ ፈያትን ሙክነ አኮዴን። 13ኦረ ታቆኔወ ኮዴ ከ ፈየ ኮደ ኮኖ ኡልፌነ ኩተ አከደን፥ ከ ቆተ አመንቴተሴ፥ ዬሱስ ክርስቶስ ቁደን ክቶ ዴሰ፥ ፉረ መል ሃሰወተ ኤተንን። 14ሴዴ አንኤርከኖሴን ኬ ታፍኖ፥ አከን ጨርጨርተን ኬ ከፖፐ ዴኦ ከ፥ ኬ አኮ፥ ኸሰን ቀፐ። 15መ ኾር፥ ኦን እንጨርይ፥ ትከ ዋቀ ከረዬ፥ ኦረ አተ አክመ ከላተ እሾተ ፋንቶ፥ አከ ኡፕናቶ መለን ኬ ታፍን። ትኮሴ ኔፎ፥ ትከሴ አክርስታነ፥ እሰሴ ቱደ እሾ ክርተ ዱካተ ኮድቴ አቻተምፐይተሴ አዋቀ። 16ዱካተሴ ኡፕነይሰምቴ አአመንቴትኖ፥ ዱካተ ዱካተኔ ፈየ ኮኮክ። ሴዴ ኔፎ ቆተ ክርስቶስ ዴሰ እኪን፥ «እሰሴ ነመ ኮዴ ከ ኦረ ቱረ አካዴ፥ አዱከሉማድከ ሀፑረን ኡፕነይሰሜ ከ፥ ኤርከምፐቶወ አካዴ ከ፥ ሌክነ ፕሰ ቶራሜ ከ፥ አሰመይተ ፒተ እሸ ዱከይሰዴ፥ እከ ኡልፌነን ሞንቶፐ ፈየዴ።»

will be added

X\