ቴሴሎንቄ አፐዮተ 1

1ኤርከነ አነ ፐውሎስ ከ ስላስ እሾ ትሞቶስ ከፐዬ፥ ኦረሴ ትከ ክርስታነ ቴሴሎንቄ ከረ ቾኤ እሰሴኔ አዋቀ ኣፐ እሾ አፖቀለ ዬሱስ ክርስቶስ ኮዴት ኤርከሜ። ዳሰተ ዋቀ እሾ ነከይተ አእሽነ ኮዴን። 2አውተ ፕሰ ኦን ቅንሰንኖዬ፥ መቴን እሽን ኦርሰንነ ከ ቆተይሽን መለ ኩያተ ፕሰ ዋቀ ከለተይሰንነ። 3አመንቴተይሽን ቀረን ኻቴኤ አተ አከ ኮደ ኮንተን ከ፥ ጫለላስን ቀረን ኻቴኤ አተ አከ ያልተን ከ፥ ኸሰ አፖቀላኖ ዬሱስ ክርስቶስን ቀፕተን አተ አከ ኮኮክ፥ አውተ ፕሰን ፉለ ዋቅኖ ከ አኣፕኖ ቱረ መቴ ኦርሰንነ። 4እሽን አዋቀ ጫለዴ ሄለዳኖዬ፥ አክመ ዋቀ እሽን ሬኸዴ እንኡፕነ። 5ማነ መለ፥ አፈ ፐተን ኦቶተሴ አፈየ እሽነ አንቶርኔ መ፥ ሁፕነ እሾ ሀፑረ ቁልቁሎተትን ከ አክመ ዱካተ ፈየ ኮድቴ ቀልፔፈተኔን እሽነ ቶርኔ። አንእሽን ከፐ ክኖዬ፥ እሽን መለ አተ አክመን ከላኔ እኡፕተኔይ። 6ከት ፑኑ ረኮተ ኩተ እሽን ቀረ ከይቴ ኔፎዬ፥ ኸሰ አሀፑረ ቁልቁሎተ እሽነ ዳሼኔ ቃሌሴ እቴየቴን ከ፥ እኖ ከ ፖቀለ ፐሀናቴን። 7ከ ሴመለ ክርስታነ ፒተ ሜቄዶንየ ከ አአከየ ከረ ከሎ ፕሰ ፐሀነ ኮድቴን። 8ቃሌተ ዋቀ አእሽን ከረ ሶክቴ፥ ፒተ ሜቄዶንየ እሾ አአከየ ፐቶፐኤን ደከኔ መ፥ አመንቴተይሽን አዋቀን ቀፕተን ፒተ ፕሶፐኤ ቶረምቴ። ሴመለ ዌ ተከ ኔፎ ቆተይሽነ ዴሰ ኦረ ሌሌተ እኖ ፐርፓችስንንክቶ። 9አውተን እሽን ከፖፐ ዴኔዬ፥ አተ አክመ እኖ ቴየቴን፥ ከ ክለነ ኮደተ አሌ ዲሴን ከ፥ ቻተምፐይተሴ ከ ዱኮለይተሴ አዋቀ ኬለዬ ኮደ ኮዴተኤ እሸ ከፖፐ ቲተውቴን እሾተ መተይሾት ቆትኖ ዴሰ ቶርን። 10ከ አክመ እሰሴ አዋቀ ቶቶፐ እሸ ኻሼ፥ እከ ሚረሴ ዴኖ ኬለዬ እኖን ፐሆ፥ ዴነሴኔ አሞንቴ ኸተ አእናድ አዬሱስ አሰንተን ኩል ቶርን።

will be added

X\