ዮሀንስ አፐዮተ 4

1ኮያለኖ፥ ኹመምፐየ ደርተ ሌከየ ፒተ ቀረ ቻይ፥ ሀፑረ ነመ ፕሰንተ እንዱከይሰደን፥ መ ኡፍ ሀፑረ ዋቀ ከፐ ዴ ከን ዴንን ኦልኬለ ቶየ። 2ሀፑረ አኪኖ «ዬሱስ ነመ ኮዴ ከ ዋቀ ከፐዬ ፒተ ቀሮፐ ዴኤ፥» ከ ቶርኖ ፕሰ፥ ሀፑሮሴ አከመ ሀፑረ ዋቀ ኮዴ እኡፕተን። 3ሀፑረ አኪኖ «ዬሱስ ነመን ኮድኔ ከ ዋቀ ከፐዬ ፒተ ቀሮፐን ዴኔ፥» ሀፑሮሴ ዋቀ ከፐን ዴኔ። ሀፑሮሴ ኔፎ ሀፑረ ፓለካረ ክርስቶስ። ሀፑሮሴ አክመ ፒተ ቀሮፐ ዴኦ እደከይቴን፥ እሸ ኔፎ አመ አሬ ፒተ ቀረ ቸ። 4ሄለዮ፥ እሽነ አሄለ ዋቀ። ሀፑረ አእሽን ከረ ቾ ኔፎ ሀፑረ አኦረ ፒተ ከረ ቾ ቀረዬ ቀፐይ፥ ሴመለ ኹመምፐየ አደርተ ፑቴን። 5እሾነ ቆተ ኦረ ፒተ ኮዴን መለ፥ ወ ፒተኤው ሃሰወን። ኦረ ፒተከ ኸይሾኤው ደከይን። 6ኡፍ እኖ አንሄለ ዋቀ፥ ነመ ዋቀ ኡፖ ኸኖ ደከይን። ነመ እነ ዋቀኤን ኮድንን፥ ኸኖ ደከይንንቾ። ሀፑረ ዱካተ እሾ አዴርተ ሴዴኔን ኦልኬለ ኡፕናንነ። 7ኮያለኖ! ጫለለ ቆተ ዋቀ ከፐ ዴኤን መለ፥ እኖ ፕሰንትይ ኦል ጫለነ። ነመ ነመ ጫለኖ እነ ዋቀ ከ ዋቀ ኡፐ። 8ነመ ነመ ጫለንንክንን ዋቀን ኡፖ። ማነ መለ፥ ዋቀ ከረዬ ኦረ ጫለንይ። 9ዋቀ አከመን እናድ ቁደን ቻተ አከኖ መለ እናድ ተከን ፒሴ ቀሮፐ ኤርኬ። ዋቀ አከመ እኖ ጫለዴ ሴዴኔ አካቴ። 10ጫለለ ክዴተ፥ ዋቀ መታድ እኖ ጫለዴ ከ፥ አከ ጩፖትኖ እናድ ምነን እኖ ሀስቶ መለ፥ እናድ ኤርኬ ዲሼይ፥ እኖ ዋቀ ጫለዴ ክዴተን። 11ኮያለኖ፥ ዋቀ ኤቴ አሴ እኖ ጫለዴ፥ እኖ ኔፎ ኦል ጫለተ እኖ ፋን። 12ነመ ዋቀ አኬ ተከ ኔፎ እንቾ፥ ኦን ኦልን ጫለንነዬ፥ ዋቀ እኖ ኦል ቸ፥ ጫለላድ ኔፎከ እኖ ከረ ኩቱምተን ቻን። 13እሸ ሀፑራድ እኖ ዳሼ፥ አንከ ሴዴን አከመን እኖ እሸን ከላንኖ፥ እሸከ እኖ ኦል ቻኖ ኡፕናኔ። 14ዋቀ ኣፐ እክዴ፥ «ኦረ ፕሰንተኤ ድንሸምፐይተ ኮዴ፥» ከ እናድ እኖ ኤርኬ። እኖ ኔፎከ አክኔ ከ ሴዴ ቶርንነ። 15ነመ ኦቶ አመኖ ከ ኪኖ፥ «ዬሱስ እነ ዋቀ» ፕሰ ዋቀ እሸ ኦል ቸ፤ እሸ ኔፎከ ዋቀን ከላን። 16እኖ ኔፎ ዋቀ አከመ እኖ ጫለኖ እንኡፕናኔ ከ አመኔ። ዋቀ ከረዬ ኦረ ጫለንይ፥ ነመ ጫለለን ከላኖ ዋቀኔ ከላን፥ ዋቀ ኔፎከ እሸ ኦል ቻን። 17ጫለለሴኔ አዋቀ ኦተንትኖፐ አክሼ ሴዴኔ እኖ ከረ ኩቱምተን ቻን ከ ቆተ አን እኖ ፒሴ ቀረዬ ከላተ ዬሱስ ከላዴ ፐሀቶ ከላንኖ መለ፥ ኩያተ ደፐ ከ ዱካተ ሙሬተት ፉረ ተከ ኔፎ እኖኤን ደካደን። 18ጫለለ ዱካተ፥ ፉረ አሌ እስከፐ ሴከንይ፥ ሴመለ ጫለለ ፉረን ቀፐን። ፉረ ኾራተ ኬለ ቀፐኔይ፥ ነመ ፉሮ ጫለላድ እንኩተን። 19እሸ ዴዮኤው እኖ ጫለዴ፥ አንከ ሴመለ ዋቀ እሾ ነመ ጫለንነ። 20ነመ አኪኖ «ዋቀን ጫለን» ከ አሬን እናሶ አክርስታነ ኔድኖ ዴርተምፐይተ። እናሶ አእልደን አክነኤ ጫለንንክንንይ፥ ዋቀ አእልደን አክንንክንን ጫለተ እንኤተንሾ። 21አጨጨሴ አንክርስቶስ ከፐ አከኔ እኪን፥ «ነመ ዋቀ ጫለኖ፥ አእናሶ ጫለዶ።»

will be added

X\