ቆሮንቶስ አፐዮተ 5

1አክመ መኜረ ኦተንተይሽን ከረ ቾ፥ እቶራም። ኡመ መኜረ አሴ ፐሆ ኦረ ዋቀን ኡፕንን ኔፎፐዬን ቾ። «ነመ ለሞተ አሀተይሾት ኦል ሙክኖ ቸ» ክደም። 2እሽነከ ቀረን ዴሰ እስው ፔፕንተን! ሄለን ኘረሄተ እሽን ፋንንክቶ? ነሞሴ ኮደ አሴ ፐሆ ኮዴ፥ አአሌ እሽን ኦፐ ሶኮ። 3ከድን ፑኑ ደክንተን እሽን ኦል አንክንንይ፥ ሀፑረን እሽን ኦልይን ቸ። ከ አክመን እሽን ኦል ቾ ምነ እስድኬ ከ ነሞሴ ዌሴን አሴ ፐሀ ኮዴ ቀረኤ መኸ ፖቀለ ዬሱስን ደፐ ሙሬ። 4ኦ ኦሎፐ አንተኔዬ፥ አንትከ ሁፕነ ፖቀለ ዬሱስን ሀፑርዮን እሽኖፐ አካዶዬ፥ 5እሽነ ነሞሴ ቄደ ከ፥ ፐቴተ ደክንታድእ ሀርከ ሴተነ ኦፐ እሸ ዳሸ። ሴዴ ኔፎ፥ ኩያተ ፖቀለ ዬሱስ ዴኖዬ፥ አክመ ነፕሴታድ ድንቶ መለ። 6እስ ፔፕተይሽን እንፐኻረን። ሀደየ ሸከየ አክመ ፑሎተ ኩመ ኸርናን አኡፕተኔ? 7አክመ ኬቶ ፑሎተ አኦፐዬ ሀደየን ቀፕንን ፐሀተን ምነኤ፥ አከ ሃረየ ፑሎተ ፐሀነተኔኤ ሀደየሴኔ ጨሬ አጩፖተ አሌ እስ ከፐ ሴከይሸ። ለሀሴ ኸኖ አፋስከ ክርስቶስ እኖ መለ እቀለሜይ። 8ሴመለ ሀደየሴኔ ጨሬ አጩፖተ እሾ አኔቁምተትን ፓሌትኖ ኡልፌሰ ዲነ ከ፥ ላቆተሴ አኦፐ ሀደየን ቀፕንን፥ አሀንቄሉመ እሾ አዱካተትን ፓሌትኖ ኡልፌስነ። 9ኤርከነዮፐዬ ኦረ ሸርሙቱሞ ኦልይ አክመ ተኩምተ አቀፕናንንእ፥ እንእሽነ ታፌ። 10ሴዴ ኔፎ፥ «ሸርሙተ ፒስት እሾ ዮተምፐየ ከ ኾልመ ቶመየ እሾ ኦረ ክለነ ኮደኖ ኦልይ እንከላደን» ክዴትዮን። ከድን አሴ ኪቴዬ፥ አሌ ፒቶፐ ኻነ እሽን ፐርፓችስን። 11መ ኾር ኦረ ክርስታነ ክደሞ ከ ኩል አሬን ሸርሙቱሞ ታክ፥ ፓተ ዮኖ፥ ታክ ክለነ ኮደኖ፥ ታክ መኸ ነመ ፐትኖ፥ ታክ ማሾኖ፥ ታክ ኦረ ሀኖ ኦልይ አከ ተኩምተ አቀፕናንን ከ ደምተ ኔፎ እሾተ ኦል አደምንን እሽነ ታፌ። 12- 13ሄለ አንት ኦረ ተኩምተ ክርስታነ ኦፐን ቀፕንን ቀረ ኦን ደፐ ሙሮዬ፥ ማነን ኬለ ቄደ? ዋቀ እሾተ ቀረ ደፐ ሙረይ። መ ኾር እታፈምቴ ከ ኪን፥ «ነመ ኔቀ አሌ እስፐ ሶክሸ፥» እሽነ ኦረይሽን አማፐረ ክርስታነ ኦፐ ቾ ቀረ ደፐ ሙሬተ እሽን ፋንንክቶ?

will be added

X\