ቆሮንቶስ አፐዮተ 1

1ኤርከነ አነ ፐውሎስ፥ አጫለለ ዋቀትን ኮደምፐይተ ዬሱስ ክርስቶስ ኮደ ሀላሜ፥ እሾ እነሴኔ ኸኖ አክርስታነ ሶስቴኔስ ከፐዬ፥ 2ትከሴ አክርስታነ አዋቀ ቆሮንቶስ ከረ ክቶ ኦፐ ኤርከሜ። እሽነ አዬሱስ ክርስቶስን ቁልቁለዌ፥ ከ ኦረሴ ፒተ ፕሶፐዬ፥ እሰሴ መኸ ዬሱስ ክርስቶስ፥ አእሰሴ ፖቀላሶ ከ ፖቀላኖ ኮዴ፥ ሰከተነ ኦልይ ቁልቁሎወ ኮደ ሀላሜት፥ 3ዋቀ ኣፕኖ እሾ ፖቀላኖ ዬሱስ ክርስቶስ ከፐዬ፥ አዳሰተ እሾ ነከይተ እሽነ ኮዴን። 4ዋቀ ቆተ ዬሱስ ክርስቶስ ምነን ዳሰታድ እሽነ ዳሼ መለ፥ አንት እሽን መለ አውተ ፕሰን ዋቀ ከለተይሰን። 5ሳንተ ፕሰኔ፥ ሃሰ እሾ ኡፕነ ፕሰኔ፥ ክርስቶስን እቴየንቶቴን። 6ማኩመ ቆተ ክርስቶስ ዴሰ እሽነ ሌለሜ ኔፎን እጨፓቴን። 7ሴመለ ኦ ዴነ ፖቀላኖ አዬሱስ ክርስቶስ አሰንተኔዬ፥ ዳሰተ ሀፑረ ተከ ኔፎ እሽነኤን ቀጭቶ። 8ኩያተ አፖቀላኖ ዬሱስ ክርስቶስ ዴኖዬ፥ አከ ቀጨ መል ቻተኔኤ፥ እሸ ሀከ ፕረምፕረት እሽን ኮኮነይሸ። 9ዋቀሴ እነሴኔ ኻድ ፖቀላኖ ዬሱስ ክርስቶስ ኦልይ አከ ተኩምተ ቀፕናተኔ አእሽን ሀሌ፥ አአመነሜ። 10ኮያለኖ፥ ኦል ቅቴተ አከ ኦተንተይሽን ከረን ቻንን፥ አከ ኦል ደከይተን ከ ድከተ ተከን ከ ከርተ ተከን ኦልን ከላተኔኤ፥ መኸ ፖቀላኖ አዬሱስ ክርስቶስንን እሽን ቅንሰን። 11ኮያለኖ፥ ፔቀ አክመ ኦተንተይሽን ከረ ኼን፥ ቶለ ቄሎኤ ቀረዬ እንደከዬ። 12ሴዴ ኔፎ እኦል ኪንተኔ፥ «አንት አንፐውሎስ ቁደ፥» «አንት አንአፕሎስ ቁደ፥» «አንት አንፔትሮስ ቁደ፥» «አንት አንክርስቶስ ቁደ።» 13ሄለ ኸው፥ ክርስቶስ ኮለ ኮለኤ ቆተሜ? ሄለ ፐውሎስ እሽን መለ ፈንሰሜ? ሞን፥ መኸ ፐውሎስን ክርስትነ እኻቴኔ? 14ቆተን ቄርስፖስ እሾ ከዮስ መልይ እሽኖፐዬ ነመ ተከ ኔፎ ክርስትነ አንኽእንን መለ፥ ዋቀን ከለተይሰን። 15ሴመለ፥ እሽኖፐዬ ነመ አክዶ «መኸ ፐውሎስንን ክርስትነ ኼ» እንቻዶ። 16ቶሎፐ እስትፋኖስን ክርስትነ ኻሼው ዲሼይ፥ ሴኔ መልይ አን ነመ ፕለ ክርስትነ ኻሼ አንኡፖ። 17ክርስቶስ አከን ኦቶተሴ አፈየ ቶሮኤ አነ ኤርኬ ዲሼይ፥ አከን ክርስትነ ኦረ ኻሾኤ አነን ኤርክኔ። ቶተ ክርስቶስ አመስቀለ ቀረ አክመ ፐተኤን ፐንንእ፥ አንት ፐልፐሉመሴኔ አአፈ፥ ኦኩመ ነመ ቁደ ዴኤትን ኦቶተሴ አፈየ አንቶርአንቾ። 18ሃሰሴኔ ኪነ፥ «ክርስቶስ መስቀለ ቀረኤ ፈንሰሜ ከ ቶኤ» ኦረ ፐኖኤ፥ ኤፑመ። መ ኸኖ እኖ አድናትእ፥ ሁፕነ ዋቀ። 19ማነ መለ፥ እታፈምቴ ከ ኪን፥ «ኦኩመ ኦከኤን አሌ ፐሸ ከ ኡፕነ ኡፕነንፐየ አሌ ከተ።» 20ከ ኩል ኦከ አይሸ ቸ? ኡፕነምፐይተከ አይሸ ቸ? አቆተ ፒሴ አሬ ክቶት ዴሰ ቆሮከ አይሻ ቸ? ሄለ ዋቀ ኦኩመ ፒስት ኤፑመኤን ኮኔ? 21ኦረ ፒተ አክመ ኦኩመይሾትን ዋቀን ኡፕናንንእ፥ ዋቀ ኦኩማድን እሾተ ቱረ ዱፌ። ሴመለ፥ ኦረ አአመኖ ኦቶተሴ አፈየ አንእኖ ቶርንኖ፥ ኤፑመ ምነ ድከምቶ፥ ምነን ድንሰኤ፥ ዋቀ እፒሰዴ። 22ኦረ አይሁድ ወ ኦልሰ ፐሀ አኬተ ፋን፤ ኦረ ክርክእው ኦኩመ ፋን። 23እኖ ኾር፥ ክርስቶስ፥ እሴ ፈንሰሜን ቶርነ። ሴዴ ኔፎ፥ ኦረ አይሁድት ኬሀይተ፥ ከ ኦረ ኦረ አይሁድእን ኮድንንእ ኤፑመ። 24ኦረ አዋቀ ሀላዴኤ ኾር፥ ከድ ፑኑ ኦረ አይሁድ ታክ ኦረ ክርክ ኮደኔዬ፥ ክርስቶስ እሾተ ሁፕነ ዋቀ እሾ ኦኩመ ዋቀ። 25ማነ መለ፥ ወ ኤፑመ ዋቀ ከፐ ድከመ፥ እለቱመ ነመ ቀረዬ ጫልይ፤ ወ ኑኩሉመ ዋቀ ከፐ ድከመከ፥ ኮኮኑመ ነመ ቀረዬ ጫልይ። 26ኮያለኖ፥ አውተ ዋቀ እሽን ሀላዴ አከ ፐሃተን ቶየ። አከ ድከተ ኦረ ፒተ ምነኤ፥ ኦረ ተማሬ ኩቱምተን እሽኖፐዬ እንቾ፤ ኡመ ኮኮነየ እሽኖፐዬን ሌከን፥ ኡመ ኦረ ኩኩተ እሽኖፐዬን ኩተን። 27መ ኾር ዋቀ፥ ኦከ ጬርሰኤ፥ ኦረ ፒተ ኦፐዬ ኤፐ ሬኸዴ፤ ከ ኮኮነየ ጬርሰኤ፥ ኦረ ፒተ ኦፐዬ ኑኑኩለየ ሬኸዴ። 28ዋቀ፥ ወ ኦረ ፒተ ወ ኮኮከ ከፐ ድክነ ፐትሰኤ፥ ወ ኦረ ፒተት ጬሬ እከ ቱፈዴ እከ ወ ፓተ ፐተ ፐሀኔ፥ ሴኔ ሬኸዴ። 29ሴዴ ኔፎ፥ ወ መለ አሴ ኮዴ፥ አከ ነመ ተከ ኔፎ ፉለ ዋቀ ቱረ እስን ፔፕንን መለ። 30እሽነ ኾር ዋቀ አከ ዬሱስ ክርስቶስ ኦል ተኩምተ ቀፕናተኔኤ እሽን ኮዴ። ዋቀ፥ አከ ክርስቶስ ኦኩምኖ ከ ሀንቄሉመኖ ከ ቁልቁሉመኖ እሾ ነተን ሶኬትኖ ኮዶ ኮዴ። 31ሴመለ አክመ መታፈ ቁልቁሎተ ኪኖ ምነኤ፥ «ነመ እስ ፔፕኖ፥ አዋቀን እስ ፔፖ።»

will be added

X\