Apocalipsis 11

1Nawa anizmu tɨ mɨlatmikane nawa kaizta: "Kuhs kit at, Diospa yaltakas, unam misharɨrakas anizna. Wan sua wakpuj wainñamturuza wianti. 2Diospa yal pianamal anizmun, sua Diosta pianchiruzne chaamtu akwa. Uspane cuarenta y paas mishkima an Diospa pɨpulura, Jerusalén pɨpulura, azpiananazi. 3Sun payura nane ap paas kainammtuza ɨninnash, kutña año kakwakasa na akwa paranpa. Awa uspa kwail akwa tayalamtuchi akwa, uspa paasne tɨl pĩn kwailnazi," kizta. 4An paas kainammtuzne olivos tɨkanain izpailta. Uspa paasne Dios iztakin impil unamkanain izpailta. Uspa paas Dios iztukin uzpailta. An Diosne wan sura ɨninmika i. 5Mɨnpazha usparuza kwail kishitne, uspane uspa pittas ĩn puzninnazi, uspa aliz kultuza impaktanapa, ianapa. Usparuza piantashitne, sunkana iarɨnazi. 6An sukin Dios kaizta aizpa paramtuasmin, uspa paas kainammtuzne chiyu sɨpninshina, alu kimanpa. Kwazikas aimpi namninshina, wan surakas, an sukin uztuzakas akkwan pijikima naizninshianapa. 7Kainammtuz Dios pit kainana pailtɨkane, sun aliz kalpakanane kwisha ainkih kultas nut kit an paastuza waya kit kit anuppat kit piantanazi. 8Paas irawane, sun katsa pɨpulu mikin sua tuailnazi. Sun pɨpulura awane au Anpatta, Cristora, piantaara. An pɨpulune Sodoma pɨpulukanakas Egipto sukanakas munarɨt, sua awa kwisha akkwan kwail kiarɨt akwa. 9Mamaz pɨpuluras awakas, mamaz kwaltuzkas, mamaz suras awakas, mamaz pit paramtuzkas, an paas irɨttuza kutña payu kakwakasa izanazi. Pilta kamninmanazi. 10Uspa irɨt akwa, an sukin uztuzne watsal kulanazi. Watsal kulamtu akwa, uspane chiwazha usparuzpain mɨlaanazi, sun paas Dios pit kainammtuz usparuza naizninnara akwa. 11Kutña payu kakwakasa pailkane, Diosne an paas irɨttuza kuhsninnat kit mamasa kakulninnara. Sun paasta izararuzne kwisha ishkuarɨt. 12Suasne an paasne maza chiyuras paraka mɨilta. Usne usparuza ka kaizta: "Apa nurain." Suasne uspane chiyura wanishkasain nuilta. Numtazasmin, aliztuzne usparuza izara. 13Sun urain tɨnta su ulmu ara. Su ulmu at akwa, pitchin pɨpuluruzne nainñat kit azpiantɨt. Siete mil awa iara. Irachiruzne ishkuat kit maizat kit chiyuras Diosta "kwisha tɨnta i" kizara. 14An kwizta naiztu payu pɨntɨt. Mama maza kwisha naiztu payu taiznapain. 15Minpa ángelne paiña iru kwil usta. Ustawane, chiyura akkwan tɨnta paraka mɨara. Ka kaizara: "Au Anpat Dioskas Cristokas au sukin ailta, wan ɨninna. Usne pailta payurakima ɨninnanazi." 16Veinticuatro ɨlaparuzne uspa ɨninmukin, Dios iztakin uzara. Sun pit mɨarawane, uspane uspa matsɨh pilta palsumal wakpuj wainñat kit ussa 17ka kaizara: "Au Anpatta Au Dios wan kimtumikasha aishtaish kiztumakpas. Nune ma uz. Ñaminkas uzta. Wan payukimakas uznazi. Nune me tɨnta ɨninna masamɨzta. 18Wan sura uztuzne, up pit mɨrachiruzne, aliz kularɨt. Nune awaruza maizninna masamɨznazi. Irɨttuz kuhstawane, nune irɨttuza 'kwail kiarɨt' kizna mansamɨznazi. Nune up kiwaintuza, up pit kainammtuza chiwazha mɨlam mɨlananazi. Nune Diosta piantuza mɨlananazi. Nune Diosta wakpuj wainturuza mɨlananazi. Katsaruzakas, ainkiruzakas mɨlananazi. Nune an sukin kwail kiarɨttuza wan kawal kinarɨnazi." 19Suasne chiyura pɨjta azpiztawane, nane Diospa katsa yal ayukta paiña winmura iztau. Ñamin Moisésne sun winmukin chiwazha tara. Dios paiña kwalta kin namtɨt aizpa sua watsarɨt. Suasne ippa azkane, ĩnkanain taizara. Su ulmu ara. Akkwan ainki tɨh hielokana, pia kasupatsa, chiyuras taizara.

will be added

X\