San Marcos 8

1Mamaz payura akkwan awane wanmakkara. Sun awa kumira mɨjchi akwa, Jesúsne paiña kammuruza akwanat kit kaiznara: 2—Nane sun awaruza kiwainashimtus. Kutña payukima nakasa puranash. Uspane chi kum mɨjchimai. 3Kumira mɨjchine, uspa yaltakima ɨninnarane, miwara najarɨnazi. Maza mazain attishtas aara, kiznara. 4Paiña kammuruzne ussa mɨmaat kit sɨnkaara: —Apane, awa tuchira, ¿miza kumirama sun awara kwinnanapai? kizara. 5Usne usparuza mɨmanara: —¿Yawa panma mɨjmakpas? kiznara. Uspane kaizara: —Siete pan mɨjmakpas, kizara. 6Usne wanta kaiznara: —Piltain uztain, kiznara. Siete pan saptawane, Diosta kaizta: —Aishtaish, kizta. Usne pan kɨz kit kammuruza mɨlanara, awara nailnanapa. Uspane panne wanta kwinnara. 7Uspane pitchin pishkarukas mɨjmara. Diosta aishtaish pishkaru akwa kiztawane, kammuruza kaiznara: —Sunkas wan awara kwinnarain, kiznara. 8Uspane kuat kit tukkara. Kuarawane, pitti pitti tizara. Paiña kammuruzne pitti pitti siete tɨmta winñara. 9Ampara mil ampu kuaara. Kuarawane, Jesúsne usparuza uspa yalta ɨninnara. 10Suasne Jesúsne paiña kammuruzkasa kanuara waat kit Dalmanutara sura ɨara. 11Fariseo awane aat kit ussa tɨnta kwinta kiara. Uspane us kwail kinpa ussa kaizara: —Nu Diostas atne, chiwazha iztasparɨt kal Diostas izninchain, kizara. 12Jesúsne ayukta tɨnta pshtat kit uspa akwa tayal kit kaiznara: —Une chiwazha Diostas iztasparɨt kal izshiamtu. Dios nawa chiyuras ɨnintakas, nane umɨza chinkas izninnamanash. 13Jesúsne sun awara tuij ɨnat kit mamasa kanuara wat kit pi kwakara ɨra. 14Kammuruzne pan mainñat kit karaarachi. Maza panmin kanuara mɨjara. 15Jesúsne usparuza manta kit kit kaiznara: —¡Mɨrain! ¡Kwiraruin! ¡Kwail awakana uzman! Fariseo awaruzkas Herodes kamtamtuzkas nil kamtaamtuchi. Paiña kamtam kiñakana i. Kiñane chappira sulnintu. Paiña kamtamne kiñakana awara maizanazi. 16Jesúspa kammuruzne usparuzpain sun kwinta kiat kit kaizara: —Pan mɨjchimakpas. Katmizna Jesúsne sunkana kwinta kira, kizara. Jesúsne Fariseo kamtampa paranara. Uspane wat mɨarachi. 17Jesúsne uspa minñamtu aizpa piankamta. Uspane ussa mɨasachi. Katmizna usparuza kaiznara: —¿Nɨjkulamanas? ¿Mɨamanas? ¿Izamanas? kiznara. 18Une kasu wajmai. ¿Izmuskiwas? Une kail wajmai. ¿Mɨmuskiwas? ¿Nɨjkulmuskiwas? 19Cinco pan kɨztawane, cinco mil ampura nail kit kwinnarau. ¿Yawa pan tɨzta tɨmta winñanash? kiznara. Uspane ussa kaizara: —Doce tɨmta winñanashɨ, kizara. 20Ankas Jesúsne kaiznara: —Siete pan tɨztawane, ampara mil awara nail kit kwinnarau. ¿Yawa pan tɨzta tɨmta winñanash? kiznara. Uspane ussa kaizara: —Siete tɨmta winñanashɨ, kizara. 21Usne usparuza kaiznara: —¿Mama nawa nɨjkultuchimakkiwas? kiznara. 22Kwiztane Jesúskas paiña kammuruzkas Betsaida pɨpulukin aara. Mɨnpazha awane awa izsachira Jesústa karat kit tɨnta paikuat: —¡Ussa paari, kasu izkulnapa! kizara. 23Jesúsne an awa izsachira chihtɨra piz kit ussa pɨpulukis mɨlta. Sua ilpikasa paiña kasukin nɨra. Paiña chihtɨkasa ussa paarawane, ussa mɨmara: —¿Mane izshinakish? kizta. 24Sun awane izak kit kaizta: —Nane awara iztus. An awane tɨkana chamtui iztus, kizta. 25Suasne mamasa Jesúsne chihtɨkasa kasukin pal pizta. Suas sun awane tɨnta iz kit wat izkulta. Wanta kai izta. 26Jesúsne ussa paiña yalta ɨnin kit kaizta: —¡Up yalta kailti! ¡Pɨpulukin napmun! ¡Mɨnainkas kainammun! kizta. 27Jesúskas paiña kammuruzkas akkwan ainki pɨpulura ɨara. Kashara Filipowa Cesarea pɨpulu uz. Ɨamtuasmin, usne paiña kammuruza mɨmanara: —Uspa nawa parakane, ¿Nawa chima kizamtui? ¿Mɨnma na ish kaizamtui? kiznara. 28Uspane ussa sɨnkaara: —Mamaztuzne "nune Juan munnammika i" kizamtu. Mɨnpazha "Nune Elías, Dios pit kainammmika, i" kizamtu. Mamaztuzne "Mamaz Dios pit kainammmika i, kizamtu," kizara. 29Usparuza mɨmanara: —¿Une nawa chima kizamtu? ¿Nane mɨnma ish? mɨmanara. Pedrone ussa sɨnkara: —Nune Dios nɨrɨtmika i. Diosne nua au sura ɨnintɨt, kizta. 30Jesúsne usparuza kaiznara: —Watcha. Nane Cristo ish. Sun mɨnainkas kaizman, kiznara. 31Usne usparuza kamtanamɨz kit kaiznara: —Nane, Ampu namtɨtmikane, awaruza kiwainanamtus. Awaruza kiwainashimtukas, nane kwisha naiznash. Ɨlapa ampuruzkas, katsa pariyaruzkas, Moisés kaizta aizpa kamtamtuzkas nawa kwayarɨnpas. Nawa piantarɨnpas. Nawa piantarawane, mamasa uznash. Kutña payura kuhsnash, kiznara. 32Jesúsne us intu payuwa kaiznara, wan awa wat piankamanapa. Pedrone ussa paimpa mɨl kit tɨnta kaizta: —¡Sunkanane paramun! kizta. 33Jesúsne kail kit puijchat kit mamaz kammuruza iz kit Pedrora ka kaizta: —¡Nawa chɨhkazha! Nune Satanáskana kwinta kimtu. Nune Dioskana mintuchi. Awakana mintu, kizta. 34Tas Jesúsne wan awaruzakas paiña kammuruzakas ussain akwannat kit kaiznara: —Mɨnpazha ap kammuruz namashitne, ¡nakasa aat kit na kamtamtu aizpa piakamanaka! ¡U pashit aizpa chɨhkawizanaka! Nawa kanpamtuzne naizarɨnazi. Nakanain uzwizanaka, naiznakima, kurishta innakima. Sunkana ap kwizpa awizanaka. 35Wan uspain watsamturuzne iat kit wan kaarɨnazi. Mɨnpazha na akwa irane, Dios watsal pit akwa irane, Diosne usparuza uzninnanazi. 36Wan su mɨjne, wan pial mɨjne, sunkanane awane chiyura uzasachi, irɨtne. 37Irɨtmikane pial tasachi, chiyura uzna. 38Mɨnpazha kwail awa iztakin, nil nɨjkultachiruzkin, nawakas ap kamtampakas mɨtsal kiarane, nane, Ampu namtɨtmikane, usparuza mɨtsal kinanash. Ap watsal Taittakas paiña sɨnam ángeltuzkas na amtu payura aanazi. Sun payura nane nawa mɨtsal kirɨttuza mɨtsal kinanash.

will be added

X\