San Marcos 5

1Uspane pi kwakkara ɨat kit Gerasa surakima pianaara. 2Kanuaras puzarawane, maza ampune, pantiónpara chammikane, Jesús tukin ara. Salizne sun ampura pizta. 3Sun ampune pantiónta uzta. Mɨnminkas ussa tɨt kuhsachi, cadenakasa kuhsachi. 4Ñamin akkwan piji awane ussa pimpulkinkas cadenakasa kuhshira. Chihtɨkinkas kuhshira. Usmin chihtɨkin iru kuhta pakmalta. Pimpulkinkas iru kuhta pakmalta. Mɨnminkas ussa tak kamtasachi. 5Pailta payukas amtakas pantiónparakas ɨnkalparakas kwianta. Usne usmin ukkasa kiltɨt. 6Jesústa attishtas iztawane, usne ãĩn ɨt kit ussa wakpuj wainta. 7Tɨnta kwian kit Jesústa ka mɨmara: —¿Nawane chima kinash? Nune Jesús i. Nune an katsa Diospa Painkul i. Chiyura uztu. Nawa naizninmun, kiz kit paikwat. 8Jesúsne kwail salizta akkwan piji kaiznara: —Awaras puzninti, kizta. Kwail salizne ɨshitchi. 9Suasne Jesúsne ka mɨmara: —¿Nune chi munish? kizta. Saliztuzne ka kizara: —Aune "akkwan" munmakpas. Aune akkwan makpas, kizara. 10Sun saliztuzne Jesústa an tɨnta paikuaara: —Aumɨza mamaz sura ɨninmun, kizara. 11Kwisha akkwan kuzune kashain ɨnkalta kuaamtuazi. 12Sun saliztuzne ussa an tɨnta paikuaara: —Aumɨza kuzuruza pizna ɨninchain, kizara. 13Suasne usne usparuza kuzuruza ɨninnara. Wan kwail saliztuzne ɨat kit kuzuruza pizara. Suas sun paas mil kuzune ãĩn pilchiraras taizarɨt. Pira taizat kit pi kwaarɨt. Iara. 14Kuzu kwira kimtuzne ishkuat kit ãĩn ɨat kit pɨpuluras awarakas sun suras awarakas sun pit kainanara. Tas awane aara, Jesús kirɨt aizpa izana. 15Uspane Jesúspakin aara. Sua uspane akkwan saliz piztɨt mɨjatmikasha izara. Sun ampune uz kit wan kwat kit wat mintu. Pɨpuluras awane ishkuara. 16Saliz piztɨt mɨjatmikasha izararuzne wan awaruza ka kainanara: —Saliz piztɨt mɨjatmikane wat mintu. Saliztuz kuzuruza piznarawane, kuzune pi kwaara, kizara. 17Suasne awane Jesústa an tɨnta paikuaamtu: —¡Au suras ɨmɨzti! kizara. 18Jesús kanuara wakane, saliz piztɨt mɨjatmikane Jesústa paikwat: —Nukasa ɨshimtus, nukasa tuan, kizta. 19Jesúsne ussa ɨninmai, uskasa kanpanapa. Ussa kaizta: —Up kwalta kailtɨnka. Usparuza "Dios saliztuza puzninnara" kainanana ɨnka. Diosne nua kiwainta kiznarain, kizta. 20Sun ampune tas ɨt kit Decápolis suras awaruza Jesús us akwa sarɨt aizpa kwinta kinara. Wan awane sun akwa iztaspaarɨt. 21Jesús katsa pi kwakara kanuawara kwaktawane, akkwan awane ussa wanmakkara. Usne katsa pimamin nukkulta. 22Sua maza awane, Jairo munmikane, at kit Jesúspa mittɨkin wakpuj wainta. Usne Judío kammu yal manta kimika azi. 23Usne ussa tɨnta paikwat kit kaizta: —Ap pashu ainki inapain i. At kit up chihtɨkasa ussa paananka, wat panapa, uznapa, kizta. 24Jesúsne uskasa ɨra. An akkwan awane kwizpa ɨat kit nuppain kit Jesústa wanmakkara. 25Maza ashampane wan awakasa tuazi. Usne doce añokima paiña aimpi puz kit pul parachi. 26Usne akkwan tuttulkasa kwisha naizta. Wan pial mɨj aizpa tara. Wat parachi. Anpa piztɨt. 27Awane ussa Jesúspa kwinta kiara. Ishtura wat panintu, kizta. An ashampakas Jesúspa mɨra. Usne akkwan awakasa kwizpa aara. Usne paiña kwaksham paara. 28Sunkana usmin minta: "Paiña kwakshammin paarane, usne nawa wat paninnazi," minta. 29Ussa paarawane, sun urain paiña aimpi pul parɨt. Usne ayukta paiña ishtu wat parɨt nɨjkulta. 30Jesúsne usmin mazainta wat panintɨt nɨjkulta. Akkwan awa ustukin wanmakkarakas, usne ãĩn puij chat kit mɨmanara: —¿Mɨnma ap kwaksham paara? kiznara. 31Paiña kammuruzne ussa kaizara: —Nune akkwan awara iznamtu. Uspane wanmakkat kit nua nuppainñara. "¿Mɨnma ap kwaksham paara? ¿Mɨmamtukish?" kizara. 32Usne wan awara iznamɨzta, paiña kwaksham paarɨtmikasha saina. 33Sun ashampa ayukta wat parɨt nɨjkulkane, at kit ishkwat kit ul kit ussa wakpuj wainta. Usne Jesústa kaizta: —Nane up kwaksham paarau. Wat paru, kizta. 34Jesúsne ussa kaizta: —Nu nawa nɨjkultɨt akwa, nane nua watcha wat paninnash. Watmin ɨnka. Up ishtu wat pari, kizta. 35Kwinta kimtuasmin, mazantuzne manta kimmikawa yaltas aat kit Judío kammu yal manta kimmikasha kaizara: —Up pashu me irɨt. Kamtammikasha, Jesústa, anne aizapmun, kizara. 36Jesúsne uspa kaizara aizpa mɨrachi. Usne Judío kammu yal manta kimmikasha kaizta: —Ishkumun. Watsal nɨjkulti. Nane up pashura watsashinash, kizta. 37Pedrokas Santiagokas Juankas, Santiagowa aimpihsh, Jesúskasa ɨara. Jesúsne mɨnainkas napninnarachi. 38Manta kimmikawa yalta piannaakane, Jesúsne akkwan awara iznara. Uspane azat kit tɨnta kwianaara. 39Naptawane, usne usparuza kaiznara: —¡Kwianman! ¡Azaman! kiznara. Sun awane manta kimmikawa pashu irɨt nɨjkulara. Usne kaiznara: —Sun pashpane pittui. Uznazi, kiznara. 40Sun kwinta kitpane, uspane Jesústa ishanaara. Jesúsne usparuza piannamal ɨninnara. Uskas papihshkas akkuhshkas paiña izmuruzkas pashpa tukin nappara. 41Paiña chihtɨ piz kit ussa paiña pitkasa kaizta: —Talitta kumi, kizta. (Sunkana awa pit kizta: "Pashpa ainki, kuhsak kit kunti," kizta.) 42Sun urain sun pashpane kuhsak kit chara. Usne doce año pailtɨt. Main uspane kwisha iztaspaarɨt. 43Usne pashpawa papihshtakas akkuhshtakas manta kit kit kaiznara: "Mɨnainkas u pashu wat parɨt, kaizman. Jesús ussa kuhsakta, uznapa, kaizman," kiznara. Pashura chiwazha kwintain, kwanpa, ɨninnara.

will be added

X\