San Marcos 13

1Jesús Dios katsa yaltas puztawane, maza kammumikane Jesústa kaizta: —Kamtam. ¡An kalpial izti! Awane sun katsa yal katsa ukkasa saara, kizta. 2Jesúsne ussa kaizta: —Nune an katsa yalta iztu. Mamaz awane kwizpa aat kit wan ukta azpianat kit kiakpɨnanazi, kizta. 3Jesúskas paiña kammuruzkas ainki ɨzara, akkwan olivos tɨ warɨtkin piannaat kit uzara. Uspane ainki ɨzakis Dios katsa yalta izara. Pedrokas Santiagokas Juankas Andréskas paimpa ussa ka mɨmaara: 4—¿Chi payurama awane an Dios yal azpian kit kiakpɨnasa? Sɨnkazhain. Pailtɨmtu payu taizkane, ¿Chima kirɨnsa? ¿Mizurama sun kirɨmtu? Aune piankamshimtumakpas, kizara. 5Jesúsne usparuza sɨnkanara: "Awane umɨza kut kuanazi. Katmizna usparuza izizanaka. 6Akkwan awane aat kit nil chi ka kizanazi, 'Nane Dios namtɨtmika ish. Diosne nawa ɨninta,' nil chi kizanazi. Uspane akkwanta kut kuanazi. 7Kasha uztuzkas attishta uztuzkas waya kianazi. Akkwan awa waya kiamtu mɨakane, ishkuman. Waya kiamtukas, mama wan pailtuchi. Pitchin we. 8Mamaz suras awane mamaz awakasa waya kianazi. Maza gobiernone mamaz gobiernokasa waya kianazi. Su ulmune akkwan sukin at kit ulnazi. Kumira pailmɨztawane, awane yak kiarɨnazi. Awane sunkana naizarɨnazi. Sunkana kiarane, awane akkwan naizamɨznazi. 9Uruzpain iztain. Judío awane umɨza uspa mikwaruza chɨhkananazi. Uspane umɨza Judío kammu yalkin na akwa iyananazi. Uspane umɨza katsa mikwashakas ainki ɨninmikashakas na akwa chɨhkaanazi. Suane une uspa mɨrakin 'Jesústa nɨjkulamtumakpas' kizanazi. 10Wan pailtachasmin, Dios pit piantuzne Dios watsal pit wan awara kainnanarawa. An kwizta wan pailtɨnazi. 11Ilmuruzne umɨza piznat kit mikwasha chɨhkaanazi. Usparuza sɨnkanamtuasmin, ishkuman. Sun payura paiña pit sɨnkarane, Diosne umɨza kiwainnanazi, paiña pit sɨnkanapa. Sunkas Dios Izpulne umɨza kiwainnanazi, paiña pit kwinta kinpa. 12Aimpihshne paiña aimpihshta mamaz awara chɨhkanazi, irɨnpa. Papihshne paiña painkulta mamaz awara chɨhkanazi, irɨnpa. Pashparuzne papihshtakas akkuhshtakas aliz paranat kit piantaninnanazi. 13Wan awane umɨza na akwa aliz paraanazi. Imtu payurakima tailchatne, Diosne umɨza watsat mɨlnanazi. 14Danielne, Dios pit kainammmikane, ñamin ka para: 'Kwail awane Diablokana Dios yalta uzanazi. Sua usne uzasachi.' Dios pɨnkɨh izturuzne sunpa piankamtain. Sun iztawane, sua sun kwail awa Dios yalta uzakane, Judea suras ɨarawa, ɨnkalta kulana. 15Yal ɨsalta uzturuz sun mɨrane, yal ayukmal napman. Chiwazha ayukta watsarɨt mɨj aizpa ukkaman. 16Saumal kal kimturuzne yalta pĩn ukkana kailman. 17Ashampa pɨja waruzne, pashpa chitchu kwintaruzne, sun payura naizarɨnazi. 18Sun payu akane, Diosta paikwatpa, alu kimanpa, 19sun payura awa kwisha naizamtu akwa. Dios an su sarakima, awane sunkana naizarachi. An kwiztane awane sunkana naizamanazi. 20Akkwan payurakima naizarane, akkwan awane uzamanazi. Katmizna Diosne naiztɨmtu payu azain pailninnazi. Dios paiña narɨttuza pashinamtu akwa, usne sun payura azain pailninnazi, usparuza watsarɨt mɨlnana. 21Awane ka kiznazi: 'Izti. Apa Cristo tui. Izti. Sua tui.' Sun kizkane, mɨman. 22Awane aanazi, 'nane Cristo ish' kish kit. Mɨnpazha 'nane Dios pit kainammika ish' pɨrail kaizanazi. Uspane chiwazha wat kal kianazi. Uspa kal kiarɨt akwa, awane iztaspaanazi. Uspane Dios narɨttuza kut kuashianazi. 23Mɨrain. Iztain. Naizamtuchasmin, nane sunta umɨza kainanamtus." 24"Sun naiztɨmtu payu pailtawane, 'pãnkas palapchakas malmanazi. 25Kɨmakas chiyuras taizarɨnazi. Wan chiyura pura aizpa ul kit taizarɨnazi.' 26Suasne wan awane nawa, Ampu namtɨtmikara, izanazi. Nane wanishkasain chiyuras anash, katsa mikwakana ɨninnana. Kwisha watsal iztɨt anash. 27Suasne nane ap ángeltuza ɨninnanash, Dios narɨttuza wanmakninnanapa. Nane pailta suraskas chiyuraskas wanmakninnanash. 28Nane chiwazha kamtananash. Sun sura higuera tɨ kɨhne wan taizarɨm. Tɨ kɨhwil kwizmɨzkane, alu pulparɨm. 29Kawarain awa naizamɨzkane, nane chiyuras kailnapain ish. Na kaiztu aizpa piankamtain. 30Watcha kaiznamtus. Ma uztuz iarachasmin, nane uruza kaiznamtu aizpa kianazi. 31Wan chiyukas wan pilkas paiyarɨnazi. Ap pitne mizurainkas pailmanazi. Nane na kaizta aizpa watcha kinash. 32Mamaz payura kailtɨnash. Chiyuras ángeltuzne sun payu pianchimai. Nakas, Dios Painkulne, sun pianchish. Ap Taitta Diosmin pian. 33Ukas na kailtu payura pianchimai. Katmizna mɨrain. Iztain. Diosta paikwarain. 34Nane umɨza kamtam kwinta kamtanamtus. Maza ampune attish sura ɨrɨmtu. Paiña yaltas ɨrɨkane, usne kiwaintuza akwanat kit ɨninnara, uspa kal kianapa. Usne yal watsammikasha, 'Watsal iznaka,' kizta. 35Mɨnminkas sun su pamika kailtu payu pianchimai. Sunkanain kailnash. Katmizna iztain. ¿U anpatne miza urama anazi? ¿Nashka? ¿Kakwamta? ¿Tɨlawain? ¿Payuin? Une pianchi. ¡Katmizna watsal izanaka! 36Paiña kailtu payura tɨrizamtuasmin, aune ussa sait kit paiña kal kiarawamakpas. 37Umɨzakas wantuzakas ka kaiznamtus. 'Izanaka,' " kiznara.

will be added

X\