San Lucas 8

1Sun kitpane, Jesúsne akkwan ainki pɨpuluwarakas akkwan katsa pɨpuluwarakas ɨra, Dios watsal pit kainaana, Dios doce awaruza ɨninnanapa. 2Doce kammuruzkas mɨnpazha ashamparuzkas ussa kanpaara. Jesúsne sun saliztuz ashampa piztɨttuztas puzninnat kit ishturuza wat paninnara. Usne Magdalena muntɨt Maríaras siete saliz piztɨttuza puzninnara. 3Juanane, Cuzawa ashampane, kanpara. Cuzane Herodespa kiwainmika azi. Susanakas an akkwan ashampakas usparuza uspa mɨjat aizpa kiwainñara. 4Kwisha akkwan awane pɨpuluras puzat kit wanmakkara, Jesústa mɨana. Usparuza sun kamtam kwinta kinara: 5"Malmumikane pippa malna ɨra. Pippa maltuasmin, chiwazha pippa miwara taizara. Suane awa miwara chamtuasmin, pippara mittɨ kulta. Chitchukas pippa sak kuara. 6Mamaz pipparuzne ukta taizara. Chikkarawane, kwazi chi akwa azain pulparɨt. 7Mamaz pipparuz pu tɨtkin taizara. Chik kit kuntawane, pu tɨtne pippara kawininkain. 8Mamaz pipparuz wat pilpara taizat kit chikkat kit kunara. Wan pippa warawane, maza tɨne maza cien pippakanain waara." Sun kiztawane, usne tɨnta ka kwiannara: "U kail waj akwa, na kaizta aizpa wat minñat kit mɨrain. Katmizna ap pit mɨrain." 9Paiña kammuruzne ussa paikuara, usparuza kamtam kwinta kamtananapa, piankamanapa. 10Usparuza kaiznara: "An ñancha une miza Dios ɨnintu pianchi. Mane na umɨza kamtanashimtukas, nane mamaztuza kamtam kwintakasa kwinta kinamtus, izmuruz kamamanpa, mɨmturuz piankamamanpa." 11"Sun kamtam kwinta sunkana i. Pippane Dios pitkana i. Miwara chakane, awane sun pit mɨamtu. 12Miwara ɨmmikane Dios pit mɨmtu. Sunkana sun urain Satanáne kanpat kit Dios pit kaijchuras, ayuktas, ukkamtu, awa Dios pit nɨjkulamanpa, Dios usparuza watsat mɨlnamanpa. 13Mamaz pippane uk pilpara taiztu. Uk pilpara ɨmturuzne Dios pit mɨat kit watsal kulat kit sappara. Mujtɨt waj chi akwa, ɨrattukimain Dios pit mɨarawane, uspane Dios pit mainñamtu, Satanás usparuza kwail kininnashimtu akwa. 14Mamaz pippane pu pilpara taiztu. Pu pilpara ɨmturuzne Dios pit mɨara. Uspa kal akwa, pial pashiara akwa, watmin uzshiara akwa, pippane Dios pitkanain kunkain. Dios pit pippakanain kwayarɨm. 15Mamaz pippane wat pilpara taiztu. Dios pit mɨarawane, uspane Dios pit kwisha wat kaijchura watsamtu, pippa waanakima." 16"Putmumikane alampara tɨmkasa paltakain, tãn kɨhkasa tamajarukasa paltakain. Sunkana putmumikane alampara kwash kanmu, napmuruz kai izanapa. Sunkana awane Dios kamtamtu aizpa piankamanazi. 17Mamaz payura awane wan puintɨt aizpa nɨjkulanazi. Awane chiwazha sɨptɨt aizpa piankamat kit kai izanazi. 18Katmizna, watsal mɨrain. Akkwan kamtumikane an akkwan piankamnazi. We kammumikane us mintu aizpa, us mɨj aizpa, karɨnazi." 19Jesúspa akkuhshkas aimpihshtuzkas ussa kashain aara. Akkwan awa akwa, ussa izarachi. 20Mamazne kainara: —Up akkwakas up añaruzkas pianamal kunat kit nua izshiamtu. 21Usparuza sɨnkanara: —Ap akkwakas ap añaruzkas pianamal kunamtukas, nane uspawa ap kwalkanain mintuchish. Wan Dios pit mɨmturuzkas Dios kaizta aizpa kimturuzkas ap akkuhshkana mai, ap añakana mai. 22Maza payune Jesúskas paiña kammuruzkas kanuara waara. Sua usparuza ka kaiznara: —Aiz pi kwakara ɨzhain. Suasne ɨara. 23Aiz pi paizkara ɨamtuasmin, Jesúsne pittɨt tuazi. Tɨnta inkwa pira pamɨzta. Pine kanuara palakpɨnmɨzta. Kanua pira unainapain. 24Suasne uspane ussa ɨat kit izkulninnat kit kaizara: —Kamtam. Kamtam. Pi kwanapainmakpas. Jesúsne kuhsak kit kaizta: —Inkwane, kari. Pine, kialmun, kizta. Inkwane karɨt. Pine kalpain parɨt. 25Suasne kaiznara: —¿Nɨjkultuchimakkiwas nawa? Uspane ishkuat kit iztaspaat kit usparuzpain ka kizara: "¿Mɨnma kai sunne? Jesús inkwarakas pirakas kaiz kit ɨninkane, inkwakas pikas ussa mɨmtu." 26Galilea suras puzarawane, uspane Gerasa sura kwakkaara. 27Jesús kanuaras kihsh kit pilta kuntawane, maza pɨpuluras awane, saliz pizarɨt ampune, ussa wanmalta. Akkwan payurakima pĩn kwaarachi. Yalta uztachi akwa, pantióntain tuazi. 28Jesústa iztawane, usne kwian kit ussa wakpuj wain kit ka kaizta: —¿Nawa chima kinash? Katsa Diosne chiyura uz. Nune Dios Painkul i. Nane nua paikumtus, nawa naizninmanpa, kizta. 29Jesús saliztuza puztain kizarakas, salizne sunkana kaizamtuazi. An ñamin sun saliztuzne ussa akkwan piji piztɨt. Awane paiña chihtɨkas mittɨkas cadenakasa kantɨt mɨjazi, ussa watsanpa. Kantɨtkas, usne cadena pakalta, usmin chɨhkulnapa. Suasne salizne ussa pul surakima, awa tuchira, mɨltɨt. 30Suasne Jesúsne salizta mɨmara: —¿Une chi mun? Usne sɨnkara: —Akkwan mun makpas, ka kizta. Akkwan saliztuzne ussa pizarɨt. 31Uspane ussa paikuara: "Ainkih kulta aumɨza ɨninmun." 32Akkwan kuzune ainki ɨzamamim kumira sait kuamtu. Uspane kuzuruza napna paikuara. Jesúsne usparuza chɨhkara, kuzuruza nappanapa. 33Suasne saliztuzne ampuras puzat kit kuzuruza pizara. Wan kuzuruzne malpara ãĩn kihshat kit pira taizara. Wanne pi kwaarɨt. 34Sun kit aizpa izarawane, kuzu izmuruzne ishkuat kit sun kwinta pɨpuluras awara, nantas awara, kainana ɨara. 35Sun awane pɨpuluras puzara, sun kit aizpa izana. Uspane Jesústa aat kit an ampura izara. Jesúsne an ampuras saliztuza puzninnara. Sun ampune Jesús panakin uz kit pĩn kwat kit wat minta. Uspane ishkuara. 36Sun kit aizpa izmuruzne nantas awaruza saliz puznintɨtmika wat parɨt kainanara. 37Suasne wan Gerasa suras awane Jesústa paikuara, usparuztas puztɨnpa, uspa ishkwarɨt akwa. Suasne kanuara warawane, Jesúsne kwakara kailmɨzta. 38Saliz mɨjatmikane paikwara, uskasa ɨn. Jesúsne ussa kaizta: —Nakasa ɨmun. 39Up kwalta kail kit Dios nu akwa kit aizpa kainanaka. Ampune paiña kwalta kail kit paiña pɨpulura uztuza Jesús us akwa kit aizpa kainanara. 40Jesús pi kwakara kwaktawane, akkwan awane ussa tɨrizat kit ussa watsal sappara. 41Suane maza ampune, Jairo muntɨtmikane, ara. Usne Judío awa kammu yal ɨninmika azi. Usne Jesúspa mittɨkin wakpuj wain kit paiña yalta ɨnpa paikwara, 42paiña pashuin ishtu akwa. Usne doce añoin kawirɨt. Inapain azi. Jesús ɨmtuasmin, akkwan awane ussa sɨpkimain nuppainñara. 43Maza ashampane ussa kanpara. Usne doce añokimain paiña aimpi pulparachi. Mɨnminkas ussa wat panintachi. Usne kwizpa at kit Jesúspa pĩn puntakin paara. Paiña pĩnkin paamtuasmin, sun urain paiña aimpi puztɨt aizpa pul para. 45Suasne Jesúsne ussa mɨmara: —¿Mɨnma nawa paara? kizta. Mɨnminkas sɨnkarachi. Suasne Pedrone ka kizta: —Anpat, akkwan awane nua kashara sɨpkimain nuppainñara, kizta. 46Jesúsne kaiznara: —Mɨnpazha ap pĩnkin paara. Nane mazara wat panintɨt pianish, kiznara. 47Wat parɨt nɨjkultuasmin, usmin kulamanamtɨkane, sun ashampane Jesústa at kit ul kit wakpuj wainta. Usne wan awa izarakin "nane Jesústa paarau," kaizta. Sun urain usne "nawa wat parɨt" kizta, wan awa mɨanapa. 48Jesúsne ussa sɨnkara: —Nawa nɨjkultɨt akwa, wat pari. Watmin ɨnka, kizta. 49Jesús mama paramtuasmin, mɨnpazha ɨninmikawa yaltas at kit Jairora kaizta: —Up pashu irɨt. Kamtammikasha an kaizapmun, kizta. 50Jesúsne sun mɨt kit Jairora kaizta: —Ishkumun. Nɨjkulcha. Up pashune wat parɨnazi, kizta. 51Jairowa yalta piannatpane, Jesúsne uskasa akkwanta napninnarachi. Usne yalta napta pitchinkasa, Pedrokasakas, Juankasakas, Santiagokasakas, paiña papihshkasakas paiña akkuhshkasakas. 52Wanne azat kit tayalara, irɨt akwa. Jesúsne usparuza kaiznara: —Azaman. Irachi. Pittɨt tui, kiznara. 53Uspane ussa ishanara, watcha irɨt piankamara akwa. 54Suasne Jesúsne paiña chihtɨra piz kit ussa tɨnta kaizta: —Pashpa, kuhsti, kizta. 55Paiña izpul ussa naptawane, sun urain kuhsakta. Jesúsne chiwazha kwanpa kwintain kiznara. 56Paiña papihshkas paiña akkuhshkas iztaspaarɨt kunara. Jesúsne kaiznara: —Mɨnainkas sun kit aizpa paranaman, kiznara.

will be added

X\