San Lucas 6

1Jesúskas paiña kammuruzkas kwaizkulmu payura chara sauwara pɨnara. Kammuruzne chara pippa pakkat kit chihtɨkasa nusat kit kuara. 2Sun izarawane, Fariseo awaruzne Jesústa ka kizara: —Up kammuruzne kal kiamtu. Moisés aumɨza kamtamnat kit aumɨza ka kiznara: "Kwaizkulmu payu kal kiman," kiznara. 3Jesúsne usparuza sɨnkanara: —Au an ñamin mikawa Davidkas paiña izmuruzkas yak kiakane, uspane kuara. ¿Sun kwinta iztamakkiwas? 4Usne Dios yalta nap kit pan Diosta tarɨt aizpa sap kit kwat kit izmuruza nailnara. Pariyain sun pan kuashina. Ñamin Moisés kamtamnat kit kaiznara: "Mamaz awara sun pan nailnamun," kizta. 5Jesúsne usparuza an sɨnkanara: —Nane, Ampu namtɨtmika, ish. Kwaizkulmu payurakas chiwazha wat mintu aizpa kinash. 6Mamaz kwaizkulmu payura Jesúsne Judío kammu yalta nap kit Dios pit kamtanamɨzta. Mazane, numal chihtɨ tuiltɨtmikane, tuazi. 7Moisés kaizta aizpa kamtamtuzkas Fariseo awaruzkas Jesústa izara. "¿Kwaizkulmu payura ussa namtanasa?" minñara, Jesús kwail kimtu kizanapa. 8Anpane Jesúsne uspa minñamtu aizpa pianara. Chihtɨ tuiltɨtmikasha kaizta: —Kuhs kit paizkakin kunti, kizta. Usne paizkakin kuhs kit kunta. 9Jesúsne usparuza mɨmanara: —¿Kwaizkulmu payura awara chima kinpai? ¿Wat kin? ¿Kwail kin? ¿Kiwain kit wat sana? ¿Piantana? mɨmanara. 10Suasne Jesúsne wan awaruza iznat kit ishtumikara kaizta: —Up chihtɨ nil sari, kizta. Paiña chihtɨ nil sarawane, chihtɨ tuiltɨtmikane wat parɨt. 11Uspane Jesústa kwisha pilchapuzara. Usparuzpain chi kwail Jesústa kishiamtu aizpa minñara. 12Sun payu Jesúsne ɨzara Diosta paikwan ɨra. Kɨnsɨh Diosta paikwara. 13Kɨnmɨzkane, Jesúsne kammuruza akwannara. Suasne doceruza nanarawane, Jesúsne usparuza paiña ɨnintaruz munnara. 14Sunkana uspane ka munnara. Simónpa mun maiztɨt. Mane usne Simón Pedro mun i. Mamazne, Simónpa aimpihshne, Andrés mun i. Santiagokas, Juankas, Felipekas, Bartolomékas, 15Mateokas, Tomáskas, Santiagokas (Alfeowa painkul), Simón Celote munmikakas, 16Judaskas (Santiagowa painkul), Judas Iscariotekas munnara. Usne, minpara munmikane, Jesústa annara, awa ussa pizanapa. 17Jesúsne uspakasa ɨzaras kihshat kit sakkimin kunara. Akkwan kammuruzkas akkwan awakas wanmakkara. Judea suras awakas Jerusalén pɨpuluras awakas aara. Tiro pɨpuluras awakas Sidón pɨpuluras awakas aara, ussa mɨana, uspa ishturuza kakulninnanapa. 18Usne awaras kwail saliztuza puzninnara. 19Wan awane ussa mɨshiara. Dios Jesústa kiwainta akwa, Jesúsne akkwantuza wat paninnara. 20Jesúsne kammuruza iznat kit kaiznara: "Puizaruzne wat puranazi, Dios usparuza kiwainnat kit ɨninnamtu akwa. 21Ma payu yak kimturuzne wat puranazi. Tukkanazi. Tayalturuzne wat puranazi. Ishananazi. 22Awa umɨza naizninamtukas, uruza pashinamtuchikas, uruza kwail kizamtukas, u munpa kwail minñamtukas, une wat puranazi, u ap kanpamtuz namarɨt akwa. 23Sun payura watsal uzizanaka. Dios umɨza chiwazha chiyura mɨlanamtu akwa, wat puraizanaka. Kawarain uruzpa an ñancha kwalne Dios kainammtuzakas kwail kiara. 24Ma payu uztuzne, kwazpa kultɨt uzturuzne, tayalanazi. Une apa wan wat sappat kit wat uzamtu. 25Ma payu tukta kumturuzne tayalanazi. Mamaz payura yak kianazi. Ma payu ishanturuzne tayalat kit azanazi. 26Akkwan awa u akwa wat paarakas, une naizarɨnazi. Wat uzizanaka. An ñamin awaruzne wat chi kamtamtuza kawarain wat pit kwinta kiara." 27"Nane nawa mɨmtuza kaiznamtus: U aliztuza pashirain. Umɨza aliz kulkane, usparuza wat kirain. 28¡Umɨza kwail kizkane, usparuza watsal pit pararain! Umɨza kwail kikane, us akwa Diosta paikwarain. 29Mɨnpazha up matsɨhkin patkane, mamaz kanmal antain. Mɨnpazha up kamisha nakakane, mamaz kamisha ussa mɨlarain. 30¡Mɨnpazha chiwazha paikukane, sunkanain mɨlarain! Mɨnpazha nu mɨj aizpa nakakane, na mɨj aizpa kailnincha, kizman. 31Sunkanain kitpa. Une wan awaruza wat kirain. Une mamaz awa uruza wat kinpa pashiamtu. Ukas mamaztuza kawarain wat kirain. 32Nu up izmuruzain pashimtune, Diosta tɨrizman, nua chiwazha mɨlanapa. Dios uruza wat kiwainshimtu akwa, sunkana une wantuza wat kishinarawa. Kwail kimtuzkas mamaz kwail kimtuzakas kawarain pashiamtu. 33Kawarain uruza wat kimturuzain wat kiamtune, une chinkas kana kisachi. Kainsɨh. Wan kwail kimtuzne usparuzpain kawarain wat kiamtu. 34Mamazta pui nammɨlamtune, une mamaz payura nu puimɨlat aizpa sapna tɨriztu. Kainsɨh. Sunkanane kwail kimtuzne kwail kimtuza pui nammɨlamtu, kawarain sapna. 35U aliz awaruza pashinat kit usparuza wat kinarawa. Usparuza pui mɨlarain, sapna tɨriznachi. Sunkana kitne, une u watsal mɨlam sappanazi. Chiyuras Diosne uruza paiña kwalkanain namninnanazi, Dios kwail kimturuzakas aishtaish kiztuchiruzakas kiwain kit mɨlanamtu akwa. Uskas sunkanain awaruza kiwainat kit mɨlanarawa. 36Au Taitta Diosne awaruza kiwain kit mɨlanamtu. Ukas kawarain awara kiwainat kit mɨlanarain." 37"Mamazta 'nune kwail kirɨt' kizmun. Sunkana kimtune, Diosne u kwail kirɨt aizpa kainananazi. Mamazpa kwail sɨnam sarane, Dioskas u kwail kiarɨt aizpa sɨnam sanazi. 38Mamaz we mɨjkane, ussa mɨlarain. Dioskas umɨza kwisha akkwan mɨlananazi, tiznakima. Diosne u mamaz awara mɨlamtukanain uruza mɨlananazi." 39Suasne Jesúsne kamtam kwinta kammuruza kwinta kinara: "Kasu sɨptɨtmika mamaz kasu sɨptɨtmikasha chihtɨkasa taintawane, paasas kulkin taizpailshina. 40Kamtammikane an akkwan pian. Kammumikane an we pian. Kammumika na wan mɨj aizpa kamarawane, usne kamtamkana namnazi. 41Ainki tɨ pak u aimpihshpa kasura naptane, une sunta nɨjkulamtu. Katsa pak u kasura naptane, une sunta nɨjkulashitchi. 42Katsa tɨ pak up kasura naptane, up kasu sɨptawane, une u aimpihshta ka kaizsachi: 'up kasuras an ainki tɨ pak uknash.' Wat pit paratpane, une wat uzamtuchi. An ñancha katsa tɨ pak up kasuras uktawane, suasne ainki tɨ pak iz kit u aimpihshpa kasuras pak uktawa. Sunkana, Dios u kwail kiarɨt aizpa sɨnam sarawane, une mamaztuza kiwainashina." 43"Wat tɨne kwail pippa wakain. Kawarain kwail tɨne wat pippa wakain. 44Katmizna pippa waakane, wamtumikane sun tɨra pian. Mɨnminkas wat pippa palakkuppa tɨras paksachi, kukain pippa akwa. Mɨnminkas wankail pippa kwail tɨras paksachi, kwail pippa wamtu akwa. 45Wat kimtumikane kaijchuras min kit wat kimtu. Kwail kimtumikane kaijchura kwail min kit kwail kimtu. Awane kaijchura wa aizpa paramtu." 46"Nune 'ap anpat i' kiztumikane chiwazha na kaiztu aizpa mɨt kit kirain. 47Nane uruza kamtam kwinta kinash. Nawa amtumikakas, ap pit mɨmtumikakas, na kaizta aizpa kimtumikakas maza awakanain mai. 48Sun awane yal sara. Ainkih kul uktakima kɨhtawane, usne ukta yal sara. Pi pɨnkane, yal nainshina. Yal ukta sarɨt akwa, pine yal kwasachi. 49Anpane na kaizta aizpa mɨmtumika ap pit kimtuchine, mamaz awakanain uztu. Sun awane yal sashira. Pil ɨsalta yal sara. Pi pɨntawane, yal nain kit pi kwarɨt. Wan karɨt," kiznara.

will be added

X\