San Lucas 5

1Maza payune Jesúsne Genesaret pimamin tuazi. Akkwan awane aat kit ussa sɨppanakima nuppainñaara, Dios pit mɨana. 2Jesúsne paas kanua pimamin pura izta. Pishkaru sulmuruzne kanuaras puzara, uspa ɨmmu kittana. 3Usne Simónpa kanuara wat kit ussa kaizta: —Akkis nuppainti, attishchin. Usne kanuara wat kit Dios pit awaruza kamtanara. 4Kapal kainanarawane, usne Simónta kaizta: —Kanuawara pi pɨnta ɨt kit ɨmmukasa kiaintawa, pishkaru sulna, kizta. 5Simónne ussa sɨnkara: —Kamtam. Aune kɨnsɨh pishkaru sultuanash, mazainkas piztachi. Pishkaru sulmarampailtakas, nu kaizta aizpa sulmukasa piznash. 6Sun sulpailtawane, kwisha akkwan katsa pishkaru sulpailta, sulmu pihshanapain pawal. 7Suasne uspane uspa kal kimtuza mamaz kanuara sayanara, aat kit kiwainapa. Uspane aat kit paas kanuara winñara, pira unainapain pawal. 8Sun iztawane, Simón Pedrone Jesústa wakpuj wain kit kaizta: —Ap Anpatne, na tukis ɨtpa. Nane kwail kirɨtmika ish, kizta. 9Simónkas kal kimtuzkas ussa iztaspaara, kwisha akkwan pishkaru sulta akwa. 10Santiagokas Juankas, Zebedeo painkul, Simónpa izmuruzne Simónkasa kal kimtuazi. Uspakas iztaspailta. Jesúsne Simónta kaizta: —Ishkumun. Ñamin pishkaru sulpailta. Kawarain makis nune awara akwananaka, Diosta piankamanapa, kizta. 11Suasne pimamin kanuawara kaiyarawane, uspane wan mɨjat aizpa chɨhkat kit ussa kanpaara. 12Jesúsne maza pɨpulura pɨntuas. Suane ampune, aya pɨtta ishtumikane, tuazi. Jesústa iztawane, usne at kit wakpuj wain kit ussa paikwara: —Ap Anpat. Nawa sɨnam sashitne, ap ishtu sɨnam sashina. 13Jesúsne chihtɨkasa nil sat kit ussa paat kit kaizta: —Nua sɨnam sanash. Me namtɨre. Sun urain sun aya pɨtta ishtumikane wat parɨt. 14Jesúsne ussa kaizta: —Sunpa mɨnainkas paranamun. Ɨt kit nuin pariyara antash. Ussa Moisés ñamin ɨninta aizpa mɨlti, awa Dios nua sɨnam sara aizpa piankamanapa. 15Pailta payu an akkwan awane us kirɨt aizpa mɨara. Kwisha akkwan awane wanmakkara, ussa mɨanapa, usparuzpa ishturuza wat paninnanapa. 16Jesúsne awakis ɨt kit nan sura, awa tuchira, mara, Diosta paikwan. 17Mamaz payura Jesúsne kamtanamtu tuazi. Kashara mɨnpazha Fariseo awaruzkas Moisés kaizta aizpa kamtamtuzkas uzara. Uspane Galilea su pɨpuluraskas, Judea suraskas, Jerusalén pɨpuluraskas aara. Diosne Jesústa kiwainta, awaruza wat paninnanapa. 18Suasne mɨnpazha ampune chasachi ishtumikasha kamara muaara. Uspane ussa yalta napshiara, ishtumikasha Jesús tukin taana. 19Uspane uskasa nappasachi, akkwan awa akwa. Suasne uspane yal kɨh ɨsalta nuara. Kɨhkin kul sarawane, uspane ussa kamarain Jesús tukin inkihshaara. 20Jesúsne uspa nɨjkultu aizpa pian. Sunkana minñara: "Jesúsne ishtumikasha wat paninshinaka," minñara. Katmizna Jesúsne usparuza kaiznara: —Izmumika, mɨzha. Nane up kwail kirɨt aizpa sɨnam sanash, kizta. 21Suasne Moisés kaizta aizpa kamtamtuzkas Fariseo awaruzkas usparuzpain mɨmat kit ka kaizara: "¿Sun awane mɨnma kai? Usne Diosta kwail kiztu. ¿Mɨnma kwail sɨnam sashimtu? Diosmin kwail kirɨt aizpa sɨnam sashina," kizara. 22Jesús uspa mɨmara aizpa nɨjkultawane, usne usparuza ka mɨmanat kit sɨnkanara: —¿Une chikishma ayukta, u kaijchukin, minñat kit mɨmaamtu? 23Na "up kwail kirɨt aizpa sɨnam sanintus" kiztane, sunne samchi i kaizna. Na "kamaras kuhs kit kun kit chat" kiztane, sunne anza sam i kaizna. 24Une sun piankamtawa. Diosne nawa, Ampu namtɨtmikara, sun sura ɨninta, kwail kirɨttuza sɨnam saninnanapa. Katmizna chasachi ishtumikasha kaizta: —Mɨri. Kuhsak kit kun kit kama kuhsat kit yalta charash, kizta. 25Sun urain usne paizkakis kuhsakta. Paiña kama us pitmukin kuhsat kit yalta ɨra "Diosne kwisha wari," kiz kit. 26Wan awane sunta iztaspaat kit ishkuat kit usparuzpain kaizara: —Diosne kwisha wari. Sunkanane an ñamin aune iztakimakpas, kizara. 27Pɨpuluras puztawane, Jesúsne Levíra, Roma gobierno pial sapmu yalkin izta. Levíne Roma gobierno pial sapmumika azi. Jesúsne ussa kaizta: —Nakasa at. Nawa kanpazha, kizta. 28Suasne Levíne tas kuhsak kit wansɨh chɨhkat kit ussa kanpara. 29Suasne Levíne Jesús akwa paiña yalta pishta sat kit akkwan kumira sat kit akkwan pial sapmuruzakas mamaz awarakas nailnara, pareju kuanapa. 30Sunkana Fariseo awaruzkas Moisés kaizta aizpa kamtamtuzkas paiña kammuruza pilchapuzara. Uspane Jesústa kammuruza kwail kaiznat kit mɨmanara: —¿Chikishma une kuamtu sun Roma gobierno pial sapmuruzkasa kwail kimtuzkasa? mɨmaanara. 31Jesúsne usparuza sɨnkanara: —Ishtuchiruzkas wat parɨttuzkas watsammikara pashikain. Ishturuzne watsammikara pashiamtu. 32Nane wat kimtuza akwanamtuchish. Kwail kimtuza akwanamtus, uspa kwail kiarɨt aizpa maizanapa, uspa kwail kiamtu aizpa chɨhkaanapa, Diosta kaiyanapa. 33Uspane Jesústa kaizara: —Juanpa kammuruzkas Fariseowa awaruzkas kawarain akkwan piji tɨlawain pala kwatchasmin, Diosta paikuamtu. Anpane, up kammuruzne kuamtu. 34Jesúsne usparuza sɨnkanara: —Kasara kimtune, ampuwa izmuruzne kuanazi, kumira kwinkane. Impa chi. 35Awa ashampa kanpain mɨjmikasha piantarane, wanne tayalanazi. Mamaz payura, kwail awa nawa mɨlarawane, ap kammuruzne tayalat kit pala kwatchin puranazi. 36Usne usparuza mamaz kamtam kwinta paranara: —Pĩn pɨtta kwarane, pĩn pakkultane, mɨnminkas masas pĩn pshat kit ɨsalpara yalkain. Sunkana yaltane, pɨtta pĩn pihshanazi. Masas pĩn pɨttara yaltawane, pɨtta pĩnne watsal iztuchi. 37Mɨnminkas masas vino pɨtta kalpa ayara winsachi. Sunkana wintane, masas vinone aya pɨttara pihshat kit vino puztɨm. Ayakas karɨnazi. 38Masas vino sultane, masas ayara wintawa. 39Akkwan añokima vino sultɨt mɨjne, mɨnminkas masas vino kukain. Tainne an wat kizmu, kizta.

will be added

X\