San Lucas 4

1Sɨnam Izpul Jesústa piztawane, Jesúsne Jordán piras kailta. Diospa Izpulne ussa pul sura mɨlta. 2Cuarenta payukima Diablone ussa ɨnin kit kwail kininshira. Sun payu kwatchi. Sunpawa payu pailnakima yak kira. 3Suasne Diablone ussa kaiz kit mɨmara: —¿Watcha Dios painkul kish? mɨmara. Suasne sun ukkasa pan sari, kizta. 4Jesúsne ussa sɨnkara: —Dios pɨnkɨhta ka parɨt: "Awane pankasain uzasachi. Awane Dios kamtamtu aizpa pashiarawa," parɨt. 5Suasne Diablo ussa kwash ɨnkal ɨzara mirawane, Diablone ussa azain wan chiwal sura izninta. 6Diablone ussa kaizta: —Nane nua wan chiwal su mɨlashinas, ɨninnapa, wat uznapa. Nu wan iztu aizpa nawa chɨhkarɨt akwa, nane wan mɨj aizpa mamazta chɨhkashinas. 7Nawa wakpuj wain kit paikwatne, nane nua wan mɨlanash, kizta. 8Suasne Jesúsne ussa sɨnkara: —Sunkana Dios pɨnkɨhta ka para: "Nune up Diostain, up Anpattain, wakpuj wain kit ussain kiwainti," para. 9Suasne Diablone ussa Jerusalén pɨpulura mit kit ussa Diospa yal mitta kunninpanat. Suane ussa kaizta: —Nu Dios Painkulne, nuin mittas nain kit pilta taizti, kizta. 10Dios pɨnkɨhta ka parɨt: "Anpatne paiña ángeltuza ɨninnanazi, nua iz kit kiwainnapa. 11Nua usparuzpa chihtɨkasa sap mɨlanazi, ukta taiz kit kilmanpa." 12Mane Jesúsne ussa sɨnkara: —Mamaz pitkas Dios pɨnkɨhta ka para: "Up Diosta, up Anpatta, ɨninmun, nu pashit aizpa kinpa, kwail kinpa. Diosne nawa pashimtu akwa, na Diosta nɨjkultu akwa, nane nu ɨnintu aizpa kimanash." 13Suasne wan pailtawane, kapal Jesústa kwail kininshitpane, Diablone Jesústas paimpa ɨt kit akkwan payurakima atchi. 14Jesúsne Galilea sura kailtuasmin, Dios Izpulne ussa tɨnta kiwainta. Sun suwarane akkwan awane Jesúspa kwinta kiara. 15Jesúsne kammu yalta kamtanara. Awane kaizara: "Usne kwisha wat kirɨt", kizara. 16Suasne Jesúsne Nazaret pɨpulura, us kawira pɨpulura, kail kit naptɨt. Usne kwaizkulmu payura kammu yalta us kamtɨt aizpa nap kit kun kit Dios pit izta. 17Usne Isaías pɨnkɨh parɨt aizpa sapta. Pɨnkɨh nakuhsat kit sunkana izta: 18"Anpatpa Izpulne nakasa ɨmtu. Katmizna usne nawa nara, puizaruza Dios watsal pit kainanapa, kajchira sɨptɨttuza chɨhnanapa, kasu sɨptɨttuza mamasa izanapa, iltɨttuza an naizamanpa, 19sun watsal payura Dios awara kiwainanapa." 20Suasne Jesúsne pɨnkɨh ip kit kammu yal kiwainmumikasha kailnin kit uzta. Wan kammu yalkin uztuzne ussa izara. 21Usne usparuza kaiznamɨzta: "U sun Dios pit parɨt aizpa iztuasmin, ma payu Diosne wan parɨt aizpa watcha kimɨzta." 22Wan awane Jesúspa iztaspaat kit usparuzpain kaizara: "Usne nilkas watkas parara. Paramtuasmin, watsal pitmin kwinta kit. Watsal paramtukas, ¿usne Joséwa painkulmin ki?" mɨmara. 23Jesúsne usparuza kaiznara: "Une watcha nawa sunkana kizanazi: 'Tuttulne, nuin watsari. Chiwazha Capernaum pɨpulura kirɨt aizpa kawarain apain, up sukinkas, sari,' " kizara. 24Ankas usparuza kaiznara: "Nane umɨza watcha kaiznamtus: 'Kamtammika paiña sura uztuzkas, sun pɨpulura uztuzkas paiña pit mɨashitchi.' 25Nane umɨza watcha kaiznamtus: 'An ñancha akkwan ampu irɨt ashamparuzne Israel sura uzara. Sun payu Elíasne tuazi. Kutña año kakwakasa alu kimakane, akkwan awane kwisha yak kiara. 26Dios Elíasta Israel awaruza kiwainnanapa ɨnintachikas, Diosne ussa Sarepta pɨpulura ɨninta, maza ampu irɨt ashampara kiwainapa. Sidón pɨpulune kasha uz. 27Nane umɨza an kwinta kiznanash. Eliseo, Dios pit kainammmika, uzasmin, akkwan aya pɨtta ishturuzne Israel sura uzara. Sua turakas, usne usparuza sun ishtu wat paninnarachi. Usne Naamánmin Siria suras awarain paiña ishtu wat paninta.' " 28Wan kammu yalkin Jesús kaizta aizpa mɨraruzne Jesústa pilchapuzara. 29Katmizna uspane kuhsak kit ussa pɨpulukis pianamal tɨnta ɨninñara, pilchirarakima. Uspane Jesústa kwash pilchiramans kiakpɨnashira, inapa. 30Uspa ussa pilchiramans kiakpɨntachi akwa, usne uspa paizkakis puz kit ɨrɨt. 31Suasne Jesúsne Capernaum pɨpulura, Galilea sura, kihsh kit ɨt kit kwaizkulmu payura usparuzpa kammu yalta kamtanamɨzta. 32Katsa mikwakana kamtanara akwa, wan awane Jesúspa kamtampa iztaspaarɨt. 33Maza ampune kammu yalta tuara. Salizne ussa piz kit ussa tɨnta ka kaizninta: 34—Nune Jesús i. Nazaret pɨpuluras i. ¿Aumɨza naizninnamas? Nane nuwa pianish. Nune Diostas sɨnammika i, kizta. 35Jesúsne ussa kaizta: —Sunkana kaizmun. Puñain. Ampuras puzti, kizta. Sun mɨrawane, salizne ussa awa paizkakin piltain nainninta. Suasne ampuras ɨrɨt, ampura kwail kitchin. 36Wan awane iztaspaat kit usparuzpain kaizara: —Jesúsne tɨnta paramtu. Us tɨnta akwa, usne salizta kaiz kit puzninta. Salizta ɨnintawane, ampuras puzninta, kizara. 37Sun suwarane akkwan awane Jesús kit aizpa piankamara. 38Suasne Jesús kammu yaltas puztawane, Simón Pedrowa yalta napta. Suane Pedrowa suegra ishtu tuazi, imukasa. Uspane ussa paikuara, ussa wat paninnapa. 39Jesúsne ussa ɨt kit iz kit imu kaninta. Sun urain wat parɨt. Usne kuhsak kit kumira sat kit usparuza kwinnara. 40Sun payu pãn payaptɨkane, awane akkwan tuntu ishturuza Jesústa karaara. Usne usparuza paanat kit wanta wat paninnara. 41Jesúskas mɨnpazha saliztuza puzninnara. Puzarawane, salizne ka kwianara: —Nune Dios painkul i, kizara. Uspa Jesúspa pian akwa, Jesúsne usparuza paraninnarachi. Uspane Jesúsne Dios painkulpa azi pianmara. 42Kɨntɨkane, Jesúsne pɨpulukis ɨt kit pul sura, awa tuchira, ɨrɨt. Awane ussa sayara. Ussa sayarawane, ustukin wanmalara. Uspane ussa "Akkis ɨmun" kaizara. 43Jesúsne usparuza kaiznara: —Dios watsal pit mamaz pɨpulukin uztuza kainanashimtus. Diosne awara ɨninnashimtu. Katmizna sun akwa Diosne nawa ɨninta. 44Suasne usne Judea suwara ɨt kit kammu yalta Dios pit kamtanara.

will be added

X\