San Lucas 2

1Sunkana kirɨt. Katsa mikwa Augustone paiña pit wan sura ɨninnara, wan awara wiannanapa. 2Ma wiana masamtuasmin, ainki mikwa Cirenione, Siria sura ɨninta. 3Katmizna wan awane uspa kwalpa pɨpulura ɨara, wiantɨt puranpa. 4Suasne Joséne Galilea suras Nazaret pɨpuluras ɨt kit Judea sura nura, Belén pɨpulurakima. Katsa mikwa Davidne ñamin sua kawira. Joséne Davidpa kwal azi. 5Usne kanpa ashampakasa nuilta, wiantɨt puranpa. Maríane Josékasa kasara kin namtɨtkas, usne me pɨja warɨt. 6Uspa paas Belén pɨpulura tuasmin, Maríane ishtu kinpain pamɨzta. 7Suane usne an ñancha painkul pashpa mɨt kit pĩnkasa ipkanat kit punkira winta. Mamaz yal nanchi akwa, usne wakara ɨranchura ɨt kit pashpara punkira winta. 8Sun surane pɨriku izmuruzne pɨt saukin pɨrikura izara. Kɨnsɨh uzkɨnnara. 9Suasne Anpatpa ángelne azain at kit uspa paizkakin kun kit usparuza izpannara. Anpatne uspa uzkin kai malninta. Suas uspane kwisha ishkuara. 10Ángelne usparuza kaiznara: "Ishkuman. Nane umɨza watsal pit kainananamtus, wan awa kwisha wat kulanapa. 11Mɨrain. Ma payu watsat mɨlmumikane Davidpa pɨpulura nishta. Sun Anpatne Dios nɨrɨtmika i. 12Ussa sayamtuasmin, une u izta aizpa piankamtain. Sunkanane sun pashpane pĩnkasa kanat kit punkira izakpara tuanazi." 13Sun urain an ángelkas an akkwan ángelkasa chiyuras Diosta ka kaizara: 14"Diosne kwisha wari. Chiyuras Diosne katsa i. Usne awaruza kiwainanazi, kalpain uzanapa." 15Ángel usparuzkis ɨarawane, chiyumarain kaiyarawane, sun pɨriku izmuruzne usparuzpain kaizara: —Belén pɨpulura ɨzhain, chiwazha kirɨt aizpa izna. Anpat aumɨza kaiznarɨt aizpa piankamna ɨzhain. 16Uspane azain ɨat kit Maríarakas Josérakas pashparakas sayat kit wanmalnara. Wanmaltawane, uspane pashpara punkira izakpara tu izara. 17Pashpara izarawane, uspane ángel usparuza kaiznara aizpa Jesúspa papihshtuzakas wan awaruzakas kainanara. 18Wan pɨriku izmuruz kaizara aizpa mɨraruzne iztaspaarɨt, watsat mɨlmumikawa paarat akwa. 19Maríane wan mɨntu aizpa ayuk kaijchura watsat kit sunpa minta. 20Pɨriku izmuruzne kaiyat kit kaizara: —Au chiyuras Diosne kwisha wari, kizara. Chiwazha mɨra aizpakas izta aizpakas sunkanain kirɨt. 21Ocho payu pailtawane, ampu pashpa aya tɨttawane, circuncisión kitpane, uspane ussa Jesús munnara. An ñancha María pɨjara wachasmin, ángelne sun mun ussa munta. 22Pashpa kawirawane, Josékas Maríakas Moisés kaizta aizpa kiara, uspa sɨnam puranpa. Suas uspane pashpara Jerusalén pɨpulura mɨlarɨt, Taitta Diosta anna. 23Sunkana Anpatne ɨnin kit para: "Wan an ñancha ampu mɨltamikasha Anpatta chɨhkatpa. Diosne us akwa ussa paimpa akumtu," ka parɨt. 24Anpatne sunkana awaruza ɨnin kit ka para: "Paas munkul mɨlna mɨjchine, awane paas pashpa utkuru piantana mɨltawa. Paas pashpa utkuru mɨjchine, awane paas munkul piantana mɨltawa, ka parɨt. Katmizna Josékas Maríakas paas chitchu Diosta mɨlta, Moisés ɨnintɨt aizpa kinpa." 25Mane mɨri. Maza ampune, Simeón munmikane, Jerusalén pɨpulura uzta. Usne nil uz kit Diosta paikwara. Usne Dios nɨrɨtmika amtu payu tɨrizta, us Israel awaruza kiwainnanakima. Diospa Sɨnam Izpulne ussa piz kit 26sunpa ussa piankamninta. Ussa kaizta: "Irachasmin, nune Cristora, Anpat ɨnintumikasha, iztɨnazi," kizta. 27Diospa Izpulne Simeónta Diospa yalta ɨninta. Kwiztane, Jesúspa papihshkas akkuhshkas Jesústa Simeón tukin karailta. Uspane Moisés ɨninta aizpa kishiailta. 28Simeónne ussa sap kit mut kit "Diosne kwisha wari," kiz kit kaizta: 29"Ap Anpatne, nune nawa kin namta aizpa kirɨt. Mane nane, up kiwainmumikane, kalpain irɨnash, 30na ap kasukasain up watsat mɨlmumikasha iztɨt akwa. 31Nune ussa watsarɨt mɨj, wan awa ussa izanapa. 32Usne Judío awachiruza kiwainnanazi, Diosta piankamanapa. Israel awaruzne us akwa wat kulanazi." 33Josékas Jesúspa akkuhshkas Simeón pashpawa kaizta aizpa kwisha iztaspailta. 34Suasne Simeónne usparuza kaiznara: "Diosne uruza me wat kirɨt," kiznara. Suasne usne Maríara, Jesúspa akkuhshta kaizta: "Izti. Sun pashpane Dios nɨramika i. Us kaizta aizpa mɨamtuchi akwa, akkwan Israel awaruzne wan kaarɨnazi. Usne mamaztuza, us kaizta aizpa mɨmturuza, watsat mɨlnanazi. Akkwan awane ussa nɨjkulamanazi. Ussa kwail paraanazi. 35Jesús usparuza kurunnakane, akkwan awane uspa kaijchukin Jesúspa minñamtu aizpa nɨjkulanazi. Une ayukmarain kwisha naizanazi, tɨ kwiz kaijchukin pamtukanain," kizta. 36Suane maza ashampane, Dios pit kainammmikane, tuazi. Ana munta. Usne Fanuelpa pashu azi. Aserpa kwal azi. Mane usne kwisha ɨnkwa azi. Nimpihshasmin kasara kirɨt. Siete año paiña ampukasa uztawane, Aserpa ampune irɨt. 37Ochenta año amparakasa mazainpain Diospa yalta kashara uzta. Sua payuwarakas amtawarakas Anpatta kiwainmɨz kit Diosta wakpuj wainmɨzta. Diosta paikumtuasmin, usne pala kwatchi. 38Sun urain Anane uspa tukin at kit Diosta aishtaish kiz kit wan awaruza Jesúspa kainanara. Uspane Diospa nɨrɨtmikasha tɨrizat kit sayara, wan Israel awaruza watsat mɨlnanapa. 39Suasne Josékas Maríakas Dios ɨninta aizpa kiarawane, uspane Galilea sura usparuzpa pɨpulura, Nazaret pɨpulura, kaiyamɨzta. 40Sun pashpane kawit kit an tɨnta namtɨt. Kwisha wat pianmika nammɨzta. Diosne ussa kwisha kiwainta. 41Mane paiña papihshkas paiña akkuhshkas año aizpa Jerusalén pɨpulura ɨilta, Pascua pishta izna. 42Jesús doce año pɨntɨkane, cham pishta taizkane, kutñaruzne Jerusalén pɨpulura nuara. Pishta pailtawane, kailpailta. Pashpa Jesúsne Jerusalén pɨpulurain nukkultɨt. Paiña kwalne Jesús nukkultɨt pianchi. 44Uspane maza payus ɨara. Uskasa mamaz awakasa aamtuka minpailta. Uspa kwaltuzakas izmuruzakas sayara. 45Ussa wanmaltachi akwa, Jerusalén pɨpulura ussa saina kailpailta. 46Kutña payu taiztawane, ussa Diospa yalta wanmalpailta. Usne kamtam purakin tuazi. Uspa kamtɨt aizpa mɨt kit usparuza mɨmanara. 47Us akkwan pian akwa, us usparuza sɨnkanarɨt akwa, wan mɨraruzne us akwa iztaspaarɨt. 48Paiña papihshkas akkuhshkas ussa iztawane, iztaspailta. Paiña akkuhsh ussa kaizta: —Ap painkul. ¿Chikishmaka aumɨza sunkana kirau? Izti. Up taittakas nakas ishkuat kit nua sairamakpas. Aune nu karɨt min kit tayal kit kwisha tɨnta sairamakpas. 49Suasne Jesúsne usparuza sɨnkanara: —¿Chikishmaka nawa sayamtuanas? Ap Papihshpa tukin tuatpaish, ap Papihsh kaiztu aizpa piankamna. ¿Une sun pianchiwail? 50Us "Dios paiña papihsh i" paramtuasmin, uspane us kaizta aizpa mɨarachi. 51Suasne usne uspakasa Jerusalén pɨpulukis kihsh kit Nazaret pɨpulura nappara. Usne uspa kaizta aizpa mɨt kit kirɨt. Paiña akkuhshne sun kirɨt aizpa ayuk kaijchura watsat kit minta. 52Sunmesa Jesúsne an katsa kawit kit an wat pianmika namta. Diosne ussa pashira. Awaruzne us akwa wat minñara.

will be added

X\