San Lucas 19

1Jesúsne Jericó pɨpulura nap kit pɨnmɨztuazi. 2Suane maza ampune, Zaqueo muntɨtmikane, uzta. Usne Roma gobiernowa kal kit kit uspa katsa pial sapmumika azi. Uskas kwazpamika azi. 3Usne Jesústa attishtain iz kit piankamshira. An tam awane akkwan awa akwa ussa izmanamtɨt. 4Suasne usne an ñancha ãĩn ɨra, Jesús sun miwara pɨntu akwa. Suasne usne Jesústa izna tɨra nut kit uzta. 5Jesúsne us tukin pianat kit ussa izak kit kaizta: —Zaqueo. Azain kihshti. Mane nane nukasa up yalta nukkulnash, kizta. 6Suasne Zaqueone azain tɨras kihsh kit wat kul kit ussa paiña yalta mɨlta. 7Wan awa sunta izarawane, uspane usparuzpain Jesúspa kwail kizat kit ka kaizara: —Jesúsne kwail kimtuzkasa yalta nap kit nukkultu, kizara. 8Kwiztane Zaqueone awaruzpa paizkakin kun kit Anpatta kaizta: —Anpat, izti. Ap kwail kit aizpa min kit chɨhkat akwa, nane kakwa mɨj aizpa puizara mɨlanamtus. Na mamaztuztas an pɨnta saptane, na walkwat aizpa ampara pijikima kailninnanash. 9Jesúsne ussa kaizta: —Mane Diosne nuakas up kwaltakas u kwail kiarɨt aizpa wat kulnat kit uruza watsat mɨlnara. Une aukanain mama au pampa Abrahampa kwal mai. 10Chiyuras ampune apain azi, awa karɨttuza sainana, uspa kwail kiarɨt aizpa wat kulninnana. 11Uspa sunta mɨamtuasmin, Jesúsne mamaz kamtam kwinta kaiznamɨzta. Usne Jerusalén pɨpulura kasha tuazi. Uspane Dios awaruza ɨninna anpain minñara. 12Katmizna Jesúsne kaiznara: "Ainki mikwane attish sura ɨmɨzta, akkwan su sap kit akkwan awaruza ɨninna. Suasne mamaz payura kailshina. Kwizta sun sura saptawane, paiña su kailshina. 13Ɨmtuchasmin, usne diez kiwainmuruza akwanara, wan awaruza akkwan pial mɨlan. Usparuza kaiznara: 'An pialkasa pait kit kana kitpa, na kailnakima.' 14Sunkana sun sukis awaruz ainki mikwasha izashitchi akwa, uspane uspa pit ainki mikwasha ɨnin kit kaizara: 'Sun ampura, sun ainki mikwasha, aumɨza ɨninnanapa paashitchimakpas,' kizara. 15Sun sura kail kit saptawane, usne mikwakana ɨninmɨzta. Paiña sura kailtawane, usne paiña kiwaintuza, paiña pial mɨlattuza, akwanara. Usne yawa pial kana kiarɨt piankamshira. 16An ñancha kiwainmikane us tukin ɨt kit kaizta: 'Anpat. Up pialkasa nane mamaz diez pial kana kirau,' kizta. 17Katsa mikwane ussa kaizta: 'Wat kirɨt. Nune wat kiwainmika i. Pitchin pialkasa nil kit akwa, nune diez pɨpulura ɨninnazi,' kizta. 18An kwizta kiwainmikane us tukin ɨt kit kaizta: 'Anpat. Nane up pialkasa mamaz cinco pial kana kirau,' kizta. 19Mikwane ussa kaizta: 'Nukas cinco pɨpulura ɨninnazi,' kizta. 20Mamaz kiwainmikane us tukin ɨt kit kaizta: 'Anpat. Apain up pial mɨj ish. Up pial pĩntain iptɨt mɨjarau. 21Nu tɨnta ɨnintu akwa, nane nua ishkumtuarau. Nu kal kimtuchikas, kana kimtu. Nu pippa mal tuchikas, pippa paktu,' kizta. 22Suasne ainki mikwane ussa kaizta: 'Nune kwail kiwainmika i. Nu sun kaizta akwa, nane nua kwail kirɨt kiznash. Nune na awara tɨnta ɨnintu pian. Kal kimtuchikas, kana kimtus. Pippa maltuchikas, pippa paktus. 23¿Chikishma ap pial winmukin chɨhkamas, an akkwan kana kinpa? Suasne na kailtu payura ap pial ma pitchinkasa sapshinash.' 24Usne kasha kuntuza kaiznara: 'Ap pial mɨjatmikaras nakat kit an diez pial mɨjatmikasha ap pial mɨlarain.' 25Uspane ussa kaizara: 'Anpat. Usne me diez pial mɨji.' 26Katsa mikwane sɨnkanara: 'Ap pit kaiznamtus. An akkwan mɨjmikane an akkwan sap mɨlanazi. We mɨjmikane us wemin mɨj aizpa nakarɨnazi. 27¿Mɨntama nawa aliz awa purai? Uspane na usparuza ɨninnara pashiarachi. Usparuza apain karat kit na iztukin piantaninnarain,' " kiznara. 28Sun kiztawane, Jesúsne Jerusalén pɨpulura numɨzta. 29Betfagé pɨpulurakas Betania pɨpulurakas kasha akane, Olivos ɨzara piannaara. Jesúsne paas kammuruza ɨninnat kit usparuza kaiznara: 30—Sun pɨpulura au izkwakpara naptain. Pɨpulu pɨjta naptukin une burra kantɨt wanmalpailnazi. Makima mɨnminkas ussa uztachi mama. Ussa chɨht kit apain kararain. 31Mɨnpazha "¿Chikishma burro chɨhtuas?" mɨmakane, "Anpatne ussa anuzshimtu," kiztain. 32Suasne kanpamtuzne ɨil kit Jesús kaizta aizpa wanmalpailta. 33Burro chɨhttuasmin, burrowamikane mɨmara: —¿Chikishma burro chɨhtuas? 34Uspane sɨnkailta: —Anpatne ussa anuzshimtu. 35Jesústa kararawane, uspane uspa pĩnkasa caballo pashpara palkwanara. Suasne uspane Jesústa ussa anuzninpailta. 36Jesús burrora anuztuasmin, akkwan awane uspa pĩn mikin kɨhaara, Jesústa wat minñamtu akwa. 37Olivos ɨzara pɨnarawane, Jerusalén pɨpulura piannamtuasmin, kwisha akkwan kammuruzne wat kulamɨzta. Jesús iztasparɨt kal kit aizpa izara akwa, uspane ka tɨnta kaizara: "Diosne kwisha wari." 38Ankana kaizara: "Dios ɨnintamikane kwisha wari. Katsa mikwa i. An chiyuras atmikane aumɨza watsat mɨlnamtu," Dioskasa kalpain uzanapa. Aune chiyura Dios kwisha wari kizmuspas 39Akkwan awane purara. Mɨnpazha Fariseo awaruzne kaizara: —Kamtam. Up kanpamtuza sun pit Diosta paramtu aizpa paraninman, kizara. 40Jesúsne sɨnkanara: —Umɨza kaiznamtus. Ap kammuruz puñain purane, chinkas kizarakine, an katsa ukne kawarain pit kwianshina. 41Jerusalén pɨpulura an kasha at kit iztawane, usne Jerusalén pɨpulura uztuz akwa az kit usparuza kaiznara: 42"U Jerusalén pɨpulura uztuzne ma kimtu aizpa wat piankamasachi. Makima une watsal uzna we pian. Mane wan kimtu aizpa uruza puintɨt i, piankamamanpa. 43Mamaz payura, aliz awane aat kit Jerusalén pɨpulu pianamal uzanazi. Uspane apain uztuza salpɨn titsaanazi. Uspane pɨpulu piannakin waya kianazi. 44Uspane yalkas pɨpulu kalpialkas kiakpɨnanazi. Uspane wan pɨpulura uztuza piantananazi. Wan chiwal uk azpian kit kiakpɨnanazi. Dios an pɨpulura uztuza atkas, une ussa nɨjkularachi, uruza watsat mɨlnanapa. Katmizna na kaizta aizpa kirɨnazi." 45Kwiztane Jesúsne Dios katsa yalta nap kit painintuza pianamal ɨninnara. Kwiztane Jesúsne 46usparuza kaiznara: —Dios pɨnkɨhkin ka parɨt, "Ap yaltain Diosta paikwashina." Apain une ap yalta walkummikawa kulkana saara. 47Pailta payu Jesúsne Dios katsa yalta kamtana ɨra. Katsa pariyaruzkas Moisés kaizta aizpa kamtamtuzkas, Judío pɨpulu ɨnintuzkas ussa piantashiara. 48Wan awa ussa kwisha mɨashimtu akwa, uspane Jesústa piantamanamara.

will be added

X\