San Lucas 17

1Jesúsne paiña kammuruza kaiznara: "Mɨnpazha mamazta kwail kininanazi. Sunkana mamazta kwail kininmikane kwisha naiztɨnazi. 2Mamazta kwail kininmikane an watshimasa inna. Katsa kɨmu ukkasa tɨmpukin kuhtawane, awane ussa katsa ñam pira kiakpɨntawa, Dios pit we mɨmtumikasha kwail kimanpa. 3Uruzpain kwiraruin. Aimpihsh kwail kitne, ussa 'kwail kimun,' kiztain. Paiña kwail kirɨt aizpa maiztane, nune paiña kwail kirɨt aizpa wat kultawa. 4Mɨnpazha nua siete pijikima kwail kirɨtne, us puij kit nua 'ap kwail kit aizpa min kit chɨhkamtus' kiztane, nune paiña kwail kit aizpa wat kulnintawa." 5Jesúspa ɨnintaruzne Anpatta kaizta: —Aumɨza kiwainchain, Diosta an akkwan nɨjkulana. 6Anpatne kaiznara: —Dios kaizta aizpa nɨjkul kit kitpa. Pitchinmin nɨjkultane, une an katsa tɨra ka parashina: "Piltas puhsnin kit pi pɨnta wari." Sun kaiztawane, an tɨne nu kaizta aizpa mɨshina. 7"Kiwainmika nantas akane, pil kɨhtawane, pɨriku iztawane, anpatne ka ussa kaizmanazi: 'Azain at kit misharɨ kwan uzti.' 8Anpatne ussa sunkana ka kaiznazi: 'Up kamisha maiztawane, ap kumira sari. Suasne nawa kumira nail kit kwincha, ap kumira pailnakima. An kwizta nuin kumira kwashina.' 9Usne kiwainmikasha aishtaish kaizkain, us anpat kaizta aizpa kirɨt akwa. 10Kawarain u Dios ɨninta aizpa kiarawane, une ka kizarawa: 'Aune watchi kiwainmika makpas. Aune au anpat kaizta aizpain kitmakpas.' " 11Jerusalén pɨpulura ɨmtuasmin, Jesúsne Samaria suwarakas Galilea suwarakas pɨnta. 12Pɨpulura naptuasmin, diez aya pɨttɨt ishturuzne kunat kit attishtas Jesústa izara. Ussa paikuara: —Jesús. Au Kamtam. Aumɨza iznat kit kiwainnaka. 14Usparuza iznarawane, Jesúsne kaiznara: —Pariyara ɨrain, uruza iznanapa. Miwara ɨamtuasmin, uspane kakultɨt. 15Wat parɨt nɨjkultawane, mazain usparuztas kail kit ka tɨnta kwianta: "Diosne kwisha wari." 16Usne Jesúspa mittɨkin wakpuj wain kit kaizta: "Aishtaish." An ampune Samaria sura uzta. 17Suasne Jesúsne mɨmara: —Diez aya pɨttɨt ishturuza kakulninnarau. ¿Mamaz nueve ampu mɨntama purai? 18An Samaria suras awain kailta, "Diosne wari" kizna. Au Israel kwalne "Diosne wari" kizashitchi. 19Jesúsne ussa kaizta: —Kuhs kit ɨri. Na kaizta aizpa nɨjkulta akwa, nune kakultɨt. 20Fariseo awane Jesústa mɨmaara: —¿Miza urama Dios ansa, awaruza ɨninna? Jesúsne usparuza sɨnkanara: —Mɨnminkas miza Dios ɨnintu izamanazi. 21Awane "Apain pura, sua pura," kizamanazi. Dios ɨninakane, usne uruza, u kaijchura, ɨninnanazi. 22Suasne usne kammuruza kaiznara: —Akkwan payukima apain uzamtuasmin, une Dios Painkul kailtu payura izshianazi. Une sun amtu payura ussa izamanazi. 23Awane uruza ka kiznanazi: "Sua iztain. Sua tui. Apain iztain. Apain tui." Ka kizarane, usparuza kanpaman. 24Amta ippa aztune, ĩn kwan kikimtu. Ippa kwan kikim. Kawarain Ampu namtɨtmikane ippakanain azain anazi. 25An ñancha usne akkwan naiztɨnazi. Ma payu uztuzne ussa kwayarɨnazi. 26Noé uzasmin, wan awane tɨrakukas kumirakas kuara. Ampukas ashampakas kasara kit kit uzara. Noé kanuara warawane, Diosne alu kinin kit pi pɨnninta, wan awa ianakima. Ampu namtɨtmika mamasa akane, awane sunkana uzanazi. 28Kawarain Lot uzasmin, wan awane tɨrakukas kumirakas kuara. Uspane pait kit paininara. Pippa waara. Yal saara. 29Sunkana an payura Lot Sodoma pɨpuluras puzkane, Diosne ĩnkas uk ĩnkanakas chiyuras taizninnara, wan awa ianapa. 30Dios Painkul akane, wan awane sunkana uzanazi. Sun payura uspane ussa izananzi. 31Sun naizmu payura mɨnpazha yal ɨsalta puraruzne yal ayukta napman, chiwazha ukkana. Kawarain mɨnpazha nanta kal kitne, yalta kailman. 32Lotpa ashampa nɨjkultain. Us puij iztuasmin, usne ñam wan namta. 33Us akwa uzshimtumikane wan karɨnazi. Na akwa imtumikane uznazi. 34An kaiznamtus. Sun amtane paas ampu kamarain pitpailnazi. Diosne mazara chiyura nuninnazi. Mazara tɨwij ɨnazi. 35Paas ashampane sulmin pia kɨilnazi. Diosne mazara chiyura nuninnazi. Mazara tɨwij ɨnazi. 36Paas ampune nanta kal kiilnazi. Diosne mazara nuninnazi. Mazara tɨwij ɨnazi. 37Suasne uspane ussa mɨmaara: —¿Anpat mɨnta sun kirɨnsa? Jesúsne usparuza sɨnkanara: —Kalpa irɨttukin pɨkumne kuana wanmakkanazi. Kawarain mɨnpazha kwail kikane, suain paiña kwail akwa naiztɨnazi.

will be added

X\