San Lucas 15

1Wan Roma gobierno pial sapmuruzkas wan kwail kimtuzkas Jesústa kashara wanmakkara, ussa mɨana. 2Fariseo awakas Moisés parɨt aizpa kamtamtuzkas Jesústa kwail kizat kit kaizara: —An ampune kwail kimturuza akwanamtu, uspakasa kwan. 3Suasne Jesúsne an kamtam kwinta kaiznara: 4"Mɨnpazha cien pɨriku mɨjazi. Maza pɨrikune ɨnkalpara karɨt. Noventa y nueve pɨriku chɨhkarawane, pɨrikuwamikane ɨmtu, pɨriku karɨtta sainakima. 5Pɨrikura sairawane, usne watsal kul kit sail waktamta tanak kit mumtu. 6Yalta pianatpane, usne izmuruzakas makis uzturuzakas akwanat kit kaiznamtu: 'Nakasa wat kularawa. Nane an pɨriku karɨtta sairau.' 7Kawarain kaiznamtus. Kwail kimmika paiña kwail kirɨt aizpa maizta akwa, chiyura uztuzne an wat kulanazi. Akkwan awa uspa kwail kiarɨt aizpa maizashimtuchine, chiyura uztuzne wat kulasachi." 8"Maza ashampane diez pial mɨjazi. Maza pial karɨtne, usne impil put kit yal pishkat kit pial saimtu, wanmalnakima. 9Pial wanmaltawane, usne izmuruzakas kasha uztuzakas akwanat kit kaiznamtu: 'Nakasa wat kultain. Nane sun pial karɨt aizpa wanmaltau.' 10Kawarain kaiznamtus. Diospa ángeltuzne wat kulanazi, kwail kitmika paiña kwail kirɨt aizpa maiztane." 11Jesúsne mamaz kamtam kwinta kaiznara: "Maza ampune paas painkulkasa uzta. 12An ainkimikane papihshta kaizta: 'Taitta. Nawa paimpa su mɨlazha. Papihshne uspa paasta sukas chiwazha saptu aizpakas mɨlanara.' 13Akkwan payu chikima an ainkimikane paiña wan su painin kit attish sura ɨmɨzta. Kwail kimtu uztuasmin, pane usne paiña su painintɨt pial wan pailta. 14Wan pial mɨj aizpa pailtawane, chinkas mɨjchi kirɨt. Pane kumtu mɨjchi akwa, akkwan awakas yak kiara. 15Uskas yak kimtu akwa, usne sun su awara ɨt kit kal saira. Sun anpatne ussa paiña sura ɨninta, kuzu kwira kinpa. 16Usne kuzu kum kumira kwashira. Sunkana mɨnminkas ussa kwintachi. 17Usmin min kit nɨjkul kit kaizta: 'Ap taittane kwisha akkwan kiwaintuza ɨninnamtu. Uspane akkwan kumira mɨj, tizawal. Nain akkin inapain ish, kumtuchi akwa. 18Nane ap taitta uztukin kailtɨnash. Sua ka ussa kaiznash: Taitta. Nane Dios iztakinkas nu iztakinkas kwail kirɨt ish. 19Nane wat chi ish. Nawa ap painkul i kizmun. Up kiwainmikakana kal kishimtus,' minta. 20Suasne usne kuhs kit papihshpa yalta kailta. Painkul amtuasmin, papihshne attishta ussa izta. Usne us akwa tayal kit ussa kiwainta. Papihshne ussa ãĩn ɨt kit saiyakwaat kit putchunta. 21Painkulne ussa kaizta: 'Taitta. Nane Dios iztakinkas nu iztakinkas kwail kirɨt ish. Nane wat chi ish. Nawa ap painkul i kizmun,' kizta. 22Papihshne kiwaintuza kaiznara: 'Azain an watsal pĩn karatpa, us kwanapa. Sultikashkas paiña chihtɨ tɨppura nuktawa. Zapatokas paiña mittɨkin nuktawa. 23Pɨntɨt ainki wakara karat kit piantari. Kuwizsan. Pishta sawizsan. 24Na ap painkul irɨtka mintakas, usne uztu. Usne mamaz sumal ɨt kit karɨt. Manta wanmal ish.' Suasne pishta saamɨzta. 25Painkul ɨlapamikane nanmal kal kimtuazi. Tas kail kit yalta kasha akane, usne música mɨra. Kukiamtu izta. 26Usne maza kiwainmumikasha akwat kit ka mɨmara: '¿Sun awane chima kiamtui?' 27Usne ussa sɨnkara: 'Up aña ainki kailtai. Watmin kailta akwa, up taittane pɨntɨt wakara nakta.' 28Painkul ɨlapamikane aliz kul kit yalta napshitchi. Suasne papihshne ustukin ɨt kit kwisha akwara, napnapa. 29Usne papihshta sɨnkara: 'Izti. Akkwan añokima nua kiwaintuarau. Wan nu kaizta aizpa kirɨtkas, nune nawa pɨriku pashpa mɨlamash, ap izmuruzkasa pishta sana. 30Sunkana mane up painkul, kwail ashampakasa pittɨtmika, u pial kwairɨtmika piannakane, nune us akwa pɨntɨt ainki wakara nakta.' 31Papihshne ussa kaizta: 'Ap painkul, mɨri. Nune wan payukima nakasa uztu. Wan na mɨj aizpa up i. 32Sunkana kwisha wari pishta sana, wat kulana. Aune up aimpihsh irɨtka mintamakpas. Ma uztu. Usne mamaz sumal ɨt kit karɨt. Manta wanmal ish,' " kizta.

will be added

X\