San Lucas 12

1Kwisha akkwan mil awa wanmakkamtuasmin, uspane usparuzain mittɨkin kulnamɨzta. Suasne Jesúsne kammuruza ka kaiznamɨzta: "Wat uzizanaka. Fariseo awakana namman. Wat paramtukas, uspane wat kiamtuchi. Uspa kaijchune kwail i. 2Awane chiwazha paltarɨt aizpa izanazi. Awane chiwazha puintɨt mɨj aizpa sun ukkat kit piankamanazi. 3U chiwazha amtawara kaizarane, awane payuwara mɨanazi. Chiwazha impara imparain paimpa nankin kaiztane, mamazne yal kwashtas kwiannazi, wan awa mɨanapa." 4"Nane uruza, ap izmuruza, kaiznamtus. Uruza piantamturuza ishkuman. Uruza piantarawane, uspane an kwizta u izpulta an kiasachi. 5Nane umɨza kurunnanash, mazainta, Diosta ishkwanpa. Uruza piantashinamikashakas, u izpul ĩnta kiakpɨnshinamikashakas ishkwarain. Mamasa watcha kaiztus; ussa ishkwarain. 6Cinco chitchu paas pialminkasa painim. Diosne mazain chitchuin mainkain. 7Diosne u wan ash kɨzpura waj aizpa wintɨt. Katmizna une ishkuman, Dios uruza akkwan chitchukin anza pashinamtu akwa." 8"Umɨza kaiznamtus. Mɨnpazha wan awara 'nane Diosta pianish' kiztane, Ampu namtɨtmikane ussa pianish Diospa ángel iztukin kaiznazi. 9Sunkana mɨnpazha wan awara 'nane Diosta pianchish' kiztane, nane ussa pianchish Diospa ángel iztukin kaiznash. 10Mɨnpazha Dios Painkulta kwail kiztane, paiña kwail wat kulnashina. Sunkanain mɨnpazha Dios Izpulta kwail kiztane, paiña kwail wat kulmanazi. 11Awane uruza Dios yalkin kamtamtuzakas, katsa mikwaruzakas, mamaz mikwaruzakas tain mɨlnanazi, uruza naizninnanapa. U miza pakpana minman. U miza kaizna minman. 12Sun urarain Diospa Izpulne uruza sɨnkara aizpa kamtananazi." 13Mazane awaruztas Jesústa kaizta: —Kamtam, ap añara ap pitti su nail mɨlazha kizti. 14Jesúsne ussa kaizta: —Mɨnminkas nawa sun su nailnapa chɨhkatchi. 15Usne usparuza kaiznara: —Iztain. Mamazpa pashiman. Kwazpamika akkwan chiwazha mɨjkas, usne us mɨj akwa an akkwan payukima uzsachi. 16Suasne usne usparuza kamtam kwinta kaiznara: "Paiña sura pippa maltawane, kwazpamikane paktu payura akkwan pippa pakta. 17Usne usmin ka minta: '¿Chima kinpai? Nane mɨnta pippa watsam chinkas mɨjchish.' 18Usmin kaizta: 'Sunkana sanash. Ainki watsam yal azpiantawane, an katsa watsam yal sanash. Suasne wan pippakas wan chiwazha mɨj aizpakas sua watsanash. 19Suasne apminpain kaiznash: "Nane kwisha kwazpa ish. Nane na mɨj aizpakasa akwan añokima uznash. Kwaizkul kit chiwazha kwat kit wat kulnash." ' 20Suasne Diosne ussa kaizta: 'Wat pianchi. Nune tɨmpa awa i. An amtain irɨnazi. Irawane, ¿Mɨnma up watsarɨt aizpa sapmɨlnasa?' 21Sunkanain an ampura kirɨnazi. Kwazpa awane, usmin watsat mɨjmikane, wan kaarɨnazi. Chiwazha Dios pashit aizpa kimtuchimikakas wan karɨnazi." 22Sun kaiztawane, Jesúsne paiña kammuruza kaiznara: "Uruza kaiznamtus: U we kumtu aizpakas chi minman. U we pĩn kuamtu aizpa chi minman. 23Uznane kumirakin anza tɨnta i. Awane pĩnkin anza tɨnta i. 24Katsa chitchuwa mintain. Uspane pippa wakain. Pippa wat pakkain. Uspane ɨranchukas katsa watsam yalkas sakain. Diosne usparuza kwinamtu. Une chitchukin anza tɨnta i. 25Mɨnminkas usmin an aks namninsachi. 26Sun pitchin kisachi akwa, une an akkwan chiwazha minman. 27Wishta mintain. Miza chikkamtu iztain. Wishne pilta kal kikain. Wishne pĩn sakain. Watcha uruza kaiznamtus. Salomónne kwisha watsal pĩn kwarakas, an wishne Salomón pĩnkin anza watsal iztɨt. 28Diosne ma payu pɨtta pilta watsal kwiznintu. Kuntawane, azain nain kit pulchaktat kit ĩnta impaktarɨm. U Diosta we nɨjkulamtukas, Diosne umɨza wishkin anza watsal izninnanazi. 29Katmizna, wanta mintuasmin, ishkuman. Sunkana miman: '¿Chi kumirama kwanpai? ¿Chi kwazima kwanpai?' 30Wan an sura uzturuzne chiwazha wan wa aizpa sayamtu. U Dios Taittane u we aizpa pian. 31Sun akwa, une an ñancha Diosta sayarawa, uruza ɨninnanapa. An kwizta Diosne u we aizpa uruza mɨlananazi." 32"Uruz ap pɨrikukana namarɨt akwa, ishkuman. U Taitta Diosne uruza kiwainnanazi, uskasa ɨninna. 33Chiwazha mɨj aizpa painintain. Puizaruza mɨlanarain. Sunkana kimturuzne chiyura kwazpa kulanazi. Suane u pial tuh watsarawa. Suane walkumtuzne asachi. Suane kɨriyukas tuh tɨtsachi. 34Chiyura kwazpa kulturuzne chiyuwa minñanazi, sua uzshiamtu akwa." 35"Wan pĩn kwat kit watsarain, kal kin. Alampara put unatpa. 36Une wat kiwainmikakanain uztain. Anpat pishtaras amtuasmin, une tɨriz kit ussa izarawa. At kit pɨjtakin piannapkane, masain wan pɨjta chɨhshina. 37Kiwaintuzne izarawa, uspa anpatta izna. Sun kitne, wat kulanazi. Watcha kaiznamtus. Sun kapal sarɨttuzne, ussa izmuruzne, anpatpa uzmura uzanazi. Uspa anpatne usparuza misharɨ kumira nailnanazi. 38Anpatta tɨrizamtuasmin, watsarɨt izmuruzne wat kulanazi, kakwamtakima tɨlawainkimakas tɨrizarakas. 39An piankamtain. Walkum akane, yalpamikane sun urara piankamsachi. Sun ura piankamtane, izkul kit yal watsashina, walkum napmanpa. 40Kawarain, une wan kapal sarain. Ampu namtɨtmikane u tɨrizamtuchi payura anazi." 41Pedrone ussa mɨmara: —Anpat, ¿Aumɨza sun kamtam kwinta kaiznamtukish? ¿Wan awaruza kaiznamtukish? 42Anpatne kaiznara: "Une wat kiwaintuza namtain, yalpamika ɨnintu aizpa kianapa. Yalpamikane wat kiwainmumikasha wan kal chɨhkamtu, wantuza kumira nailnana. 43Kiwainmikane wat kulnazi, yalpamika kaizta aizpa sarane. Akane, yalpamikane us ka kimtu aizpa iznazi. 44Watcha kaiznamtus. Kwiztane yalpamikane wan mɨj aizpa ussa chɨhkanazi. 45Sunkana kiwainmumikane usmin ka min kit kaiznazi: 'Ap anpatne azain kailtuchi.' Suasne usne ampu kiwaintuzakas ashampa kiwaintuzakas aim kiamɨztu. Usne akkwan kumira kwat kit chappi kumɨztu, pinakima. 46Kiwainmikane anpat kailtu payura pianchi. Anpatne sun kiwainmika tɨriztuchi payura anazi. Katmizna yalpamika akane, yalpamikane ussa tɨnta ilnazi, mɨmtuchiruzkasa puranpa. 47Kiwainmikane anpat ɨnintu aizpa wat pian. Anpat kaizta aizpa kitchine, wan kapal sarachine, anpatne ussa tɨnta ilnazi. 48Anpat kaizta aizpa pianchimikane an we ilnanazi. Dios mɨnpazhara akkwan mɨlatne, Diosne ussa paikumtu, an akkwan kailninna. Dios mɨnpazhara akkwan chɨhkatne, usne ussa an akkwan paikwannazi." 49"Nane an sura arau, wan awara ilnana. Nane sun awara me naiznamtu pashiras. 50Au sukin uztuza naizarachasmin, nane kwisha naiznash, wan kinkima. 51Une ka minñamtu: 'Nane an sura arau, wan awa kalpain uzanapa.' Sunpa akwa atchish. Nane arau, awaruza nailnana. 52Makismin maza kwalne usparuzain waya kianazi. Kutñaruzne paaskasa waya kianazi. Paasne kutñaruza waya kianazi. Cincoruzne paimpa naiyanazi. 53Papihshne painkulta waya kinazi. Painkulne papihshta waya kinazi. Akkuhshne pashura waya kinazi. Pashune akkuhshta waya kinazi. Suegrane pashu kiznara waya kinazi. Pashu kiznane suegrara waya kinazi." 54Jesúsne akkwan awaruzakas kaiznara: "Wanish sɨpkane, ma payu alu kinazi. Suasne alu kimɨztu. 55Inkwa pakane, pãn malkane, i kinazi. Suasne i kimtu. 56U 'au piankamtumakpas' kizamtukas, une wat piankamtuchi. Une suwakas chiyuwakas iznin kit wat pian. Sunkana mane une Dios ukin kimtu aizpa wat piankamamtuchi." 57"Une uruzpain nil min kit nil aizpa narawa. 58Sunkana kirain. Katsa mikwara miwara ɨntazasmin, nune nammɨlatmikasha pui aizpa kailnintawa. Pui aizpa kailnintukine, nammɨlatmikane nua katsa mikwara tain ɨnazi. Katsa mikwane nua policíawara chɨhkanazi. Policía awane nua kajchira sɨpnazi. 59Watcha kaiznamtus. Nune kajchiras puzmanazi, wan pui aizpa tanakima."

will be added

X\