TITUS 3

1Tienmi ba ye ba siak na'anam ne gomena kpi'emnam noya, ka niŋ ban yel si'el, ka siake niŋ line a tuumsuma wusa. 2Ka ba da pian' be'ed so' yelaa, ka da bood zaba, ka a suguru dim bane na'asid nidib wusa. 3Ka saŋsi'en la tinam meŋ da ane zon, ka pu siakid yelugo, ka dol suebe'ednam, ka ti ya'amleog ne niŋgbina boodim nyaŋe ti, ka ti beilim wusa ka ti mor poten'ebe'ednam ka nen nidib, ka nidib kisi ti ka ti me kisi taaba. 4Ka Wina'am one a ti faangid la suŋir ne noŋilim nie la, 5o faann ti ka li ka' ti tuumsuma zugo, amaa li ane o meŋ nimbaanlzoor la yela, ka o faandi ti ne o Siig Suŋ, line piedi ti ka li aa du'ampaal ne nyovurpaal la. 6O tisidi ti o Siig Suŋ la bedego Yesu Kiristo ti faangid la zug, 7ye ti a popielim dimi o tuon ka li yi o meŋ popielimin ka ti mor ti'ir ye ti di'e nyovur line ka' naare. 8Ne'eŋa a yelsida. M bood ye fu pa'ali ba yelbama ne kpi'euŋ, ka bane siak Wina'am la na gu'usid ka tum tuumsuma saŋa wusa. Yelbama a su'um ka tisid nidib nyood. 9Amaa basimi bu'osyeed ne yaanam yuda yela ne noŋgban nwa'ar ne zaba line a Jew dim wada yela, bozugo lin wusa ane zaalim ka ka' nyoode. 10Ka so' ya'a bood ye o weligi ya yanam boom saŋa n sa'al o noor ayinni bee ayi, ka o ya'a zan'as yanam kee o bas. 11Fu mi' ye ninkaŋa buudi tiakne a nimbe'ed ka pu dol suer suŋo. O kadi o meŋ saria be'ed. 12M ya'a tum Artemas bee Tikikus fu sa'an na, fun on kpe'eŋi fu meŋi kenn m sa'an Nikopolis teŋin na, ka m gban'e ye m be anina sapal waad saŋa. 13Kpe'eŋimi fu meŋi n suŋ Zenas one tum wada tuuma la, ne Apollos, ba kena ni, ka si'el da po'ogi baa. 14Kel ka ti nidib la zamis ka tum tuuma line nar ye ba tum ka li suŋi ba, ka ba be zaalim zaalim. 15Bane be ne mam wusa pu'usid uf. Pu'usimi ti yadda niŋidib taaba bane noŋi ti la. Wina'am yelsum na be ne ya wusa.

will be added

X\