TITUS 2

1Amaa yelimi ba line dol yelmeŋir pa'alug. 2Kel ka dap kuda da nu daam bedego, ka mor nimmua, ka a poten'er dim, ka a bane siakid pian'ad su'uŋa, ka me mor noŋilim ne modigir su'uŋa. 3Ka po'anya'as me tum line dol na'asi suer, ka da bood yeesugo, ka da ke ka daam kuli baa. Ba pa'alim line a su'um, 4ka sa'al po'ab bane pu kudige, ka ba noŋi ba sidib ne ba biis, 5ka mor ya'am, ka ka' dian'ad dima, ka zot nidib nimbaanlig, ka a yipo'a suma ka siakidi ba sidib noya, ye nidib da ne'es Wina'am labasuŋ laa. 6Ala men, sa'alim dasam, ye ba a poten'esuŋ dim. 7Ka pa'ali ba ne fu tuuma wusa line a tuumsuma ka ba me tu'as fu tuuma, ka pa'ali ba ne poten'esuŋ ne nimmua, 8ne pian'asuŋ line ka ba ku nyaŋe zerige fu, ka bane ki'isidi ti di nyan, ka ku nye taale ti sa'anee. 9Kel ka bane a tumtumnib siakidi ba zugsobnam noya ka da zan'asi baa, ka tumi si'el wusa line na ma'ae ba sunya, 10ka da zuudi ba la'ade ka lee pa'al ye ba sid ane sida dim, ka ba si'el wusa ni, nidib na baŋ ye Wina'am ti faangid pa'alug la a su'uŋa. 11Ka Wina'am popielim nie ye nidib wusa nye faangir 12ka o pa'ani ti ye ti zan'as lin pu dol Wina'am suere, ne dunia boodim, ka ti dol Wina'am suer ne poten'er ne yelsida n be dunia nwa ni. 13Ka ti mor ti'ir suŋ ne Yesu Kiristo, one a ti kpi'euŋ sob Wina'am ti faangid la, na'am ken saŋa la. 14O noki o meŋ tisi ti ye ti nye yolisim ti tuumbe'ed poogin, ka ke ka ti a nyain ka liebi o meŋ nidib bane bood hale ye ba tum tuumsuma. 15Pa'alimi ne'enam ka sa'ali ba, ka kpe'eŋi ba sunya ne fu paŋ wusa. Da ke ka so'o so' po'ogi fu.

will be added

X\