ROOM DIM 9

1M ane Kiristo nid ka pu ma'ada. Ka Wina'am Siig Suŋ so'e m poten'er, ka li me yeti m ye m pu ma'ada. Man ye m yel si'el la ane sida, 2ye m mor susa'aŋ bedego m meŋ buudi zug. 3Li ya'a naan keen ka m buudi nyeen su'um ka Wina'am poon noor tisini m ka m bakin ne Kiristo, m naan boodine li. 4Ba ane buudi ban ka Wina'am da gaŋ la. O da ke ka ba aa o biis ka nye o na'am paŋ. Ka o naa noor ne ba ka tisi ba o wada la ne o suer ye ba doli li ka zun'e o. Ka ba di'e o noorzi'elug, 5ka ane Abraham ne Isaak ne Jakob yaas. Ka Kiristo n da lieb ninsaal la, o ane ba buudi. Wina'am one so'e si'el wusa la, na nye zun'or ka li ka' naare. Ami. 6M pu yet ye, Wina'am pu dol on yet si'el laa. Li ka'ane Israel dim wusa a nimbane ka Wina'am gaŋ laa. 7Ka li ka'ane Abraham yaas wusa sid tuunn o tituunlii. Wina'am da yel ye, o na gos Isaak biis gullim ka ba a Abraham yaas. 8Dinzugo biis bane ka Abraham du'a wuu ninsaalib yiti du'a biis si'em la, ka'a Wina'am biise. Ka bane ka ba du'a ka li yine Wina'am noorzi'elug ni wenne Isaak la, sid ane Abraham yaas ne Wina'am biis. 9Wina'am da zi'el noor n yel ye, “Saŋkan ka m na leb na la, Sara na du'a biig.” 10Ka li ka' za'a nwaa. Ti yaapo'a Rebeka da zaŋ liiba puug, ka ba mor saam yinni, one a Isaak. 11- 12Ka saŋkan ka ba daa nam pu du'a ba la, ba nam pu niŋ si'el ka li a su'um bee be'ed la, ka Wina'am da yel ye, “Kpeenm la na lieb o pitu la tumtum.” Ka yel ala ye o boodim la na keŋ tuon. O boodim la ane ye o gaŋ nidib, ka li ka' ban niŋ si'el la ke ka ba aa o nidiba, ka lee ane o gaŋir zug. 13Li sob Wina'am gbauŋin ye Wina'am yel ye, “M daa noŋ Jakob ka kis Esau,” ban wusa ane Isaak biis. 14Dinzugo, bo ka ti na yele? Ti na yel ye, Wina'am ka'a sida daan bee? Ayei, baa bi'elaa. 15Wina'am da yel Moses ye, “M na zo nimbane ka m gaŋ ne m boodim la nimbaanlig.” 16Ka li pu dol ninsaalib boodim bee ba niŋire, ka lee dolne Wina'am nimbaanlzoor. 17Li da sob Wina'am gbauŋin ye, Wina'am yel Egipiti na'ab Faaro ye, “M ke ka fu a na'ab ye m pa'ali m paŋ zem si'em, ka ke ka dunia wusa baŋ m yela” 18Dinzugo, Wina'am zot nimbane ka o gaŋ ne o boodim la nimbaanlig, ka ket ka nin sieba bane ka o gaŋ ne o boodim la mor zugkpi'euŋ. 19Aa to. Ya yinni na bu'osi m ye, “Li ya'a a wala, bo ka Wina'am nyet nidib taale? Ano'on na nyaŋe zan'as Wina'am boodim?” 20M zua, fu a ano'on na nyaŋe lebis Wina'am pian'ade? Duk ku bu'os one ya'ab o la ye, bo ka fu ya'ab man wala? 21One ya'abid la mor suer n na nok ya'agbil n ya'ab on bood si'el ka me mor suer na ya'ab duk kan ligidi zu'e ne one ligidi pu zu'e ne ya'agbil yinni. 22Ala men ka Wina'am da tum. O da bood ye o pa'al o supeen ka ke ka nidib wusa baŋ o paŋ. Dinzugo o da gban'e o meŋ ka modig ne bane ka o supeen na luu ba zug ka nar ye o sa'ami ba la, 23ka me bood ye o nie pa'al paalo ni o na'am paŋtita'ar, dine ka o pesigi tinam bane ka o zo nimbaanlig ka da ti'ebi ti ye ti ti di'e o na'am la. 24Li ane tinam bane ka o gaŋ la, ka ka' Jew dim la ni gullimnee, ka ane bane ka' Jew dim la ni men. 25Li dolne Hosea da sob Wina'am gbauŋin si'em la ye, Wina'am yel ye, “Nimbane da ka' m nidib la, ka m na noki ba ka ba aa m nidib. Ka buudi kan ka m pu noŋ la, ka m na gaŋi ba ka ba lieb buudi kan ka m noŋ la.” 26Ka “Zin'ig kan ka m yeli ba ye, ‘Ba ka' m nidib la,’ anina ka m na gaŋi ba ka ba a man, Wina'am one voe la biis.” 27Wina'am nodi'es Azaya da yel paalo ni Israel dim yela ye, “Hale ne Israel yaas a bedego wuu titanbi'isug line dig mo'ar noorin la, ba bi'ela ma'aa na nye faangir. 28Zugsob na kad dunia saria to'oto.” 29Li dolne Azaya me da deŋi yel si'em la ye, “Zugsob one so'e si'elnam wusa la ya'a da keen yaas bi'ela tisini tii, ti naan liebin wuu Sodom ne Gomorra teens dim, bane ka' yaas la ne.” 30Aa to. Bo ka ti na yele? Buudbane ka' Jew dim la da pu mood ye ba a popielim dim Wina'am tuone, ka Wina'am lee ke ka ba a popielim dim o tuon ba yadda niŋir poogin. 31Ka Israel dim bane bood wada kane na ke ka ba a popielim dim Wina'am tuon la, lee pu nyee lii. 32Bo ka ba pu nyee li? Li ane ba boodim la pu la'as ne ba yadda niŋir la zug, ka ba lee ten'es ye ba na di'e li ba tuuma zug. Ba tu'ug kugir n lu, kugkane ka ba sobi li yela Wina'am gbauŋin ye, 33“Wina'am yel ye, ‘Gosima. M digil kugir Zion Zuer zug, line na ke ka nidib tu'ug ka lu. Li ane kugtita'ar ka ba na bilig n lu.’ Kiristo nwaasne kugir la. Ka one niŋ o yadda la, ku di nyan o zugo.”

will be added

X\