ROOM DIM 8

1- 2Wina'am Siig Suŋ one tisidi ti vum, ka li yit Yesu Kiristo ni la na, so'e m, ka ke ka tuumbe'ed ne kum pu len so'e ma. Dinzugo, nannanna nimbane a yinni ne Yesu Kiristo ku nye saria kadib be'ede. 3Wina'am tum o meŋ Biig, ka o lieb ninsaal, ka wenne ninsaalib bane a tuumbe'ed dim, ka kpi ti tuumbe'ed zug. Ka o ku'um poogin Wina'am kad tuumbe'ed saria ka sa'am li paŋ, line tum ti ninsaal boodim ni. Ti ninsaal boodim ket ka wada la ka' paŋ la zug, wada la ku nyaŋe sa'am tuumbe'ed paŋa. 4Wina'am niŋi li ye tinam bane belim dol Wina'am Siig Suŋ boodim la, ka li ka' ti ninsaalib boodim la, na siaki niŋ wada la noyelug line a sida la su'uŋa. 5Nimbane beilim doli ba ninsaalib boodim la, noki ba ya'am niŋ ninsaalib boodim ni. Ka nimbane beilim doli Wina'am Siig Suŋ boodim la, noki ba ya'am niŋ Siig Suŋ la boodim ni. 6Fu ya'a noki fu ya'am niŋ ninsaalib boodim ni, li ane ku'um. Ka fu ya'a noki fu ya'am niŋ Siig Suŋ la boodim ni, li ane nyovur ne sumalisim. 7Fu ya'a noki fu ya'am niŋ ninsaalib boodim ni, fu ane Wina'am dataa, ka pu siakid Wina'am wada laa, ka sid ku nyaŋe siaki lii. 8Nimbane doli ba ninsaalib boodim la ku nyaŋe ma'ae Wina'am sunfo. 9Wina'am Siig Suŋ sadigim bee ya sa'an la, ya beilim pu doli ya ninsaalib boodim, ka lee doli Siig Suŋ la boodim. On mekama pu mor Kiristo Siig Suŋ la, ka'a Kiristo nida. 10Ka Kiristo ya'a bee ya sa'an, ya siis mor nyovur yaname lieb popielim dim Wina'am tuon la zug, hale ne ya niŋgbina na kpi tuumbe'ed zug la. 11Ka Wina'am one vu'ug Yesu kumin la Siig Suŋ ya'a bee ya sa'an, on one vu'ug Yesu Kiristo kumin la, me na tisi ya ninsaalib niŋgbina nyovur paal, ka li yine o Siig Suŋ line bee ya sa'an la. 12Aa to, m ba'abiise, ti di Wina'am sam, ka pu di ninsaalib boodim sam ye ti beilim doli lii. 13Ya ya'a doli ninsaalib boodim ya na kpi. Ka ya ya'a kuu ya tuumbe'ed tuuma ka basi li ne Siig Suŋ paŋ, ya na voe. 14Nimbane dolisid Wina'am Siig Suŋ la ane Wina'am biis. 15Siig Suŋ kane ka Wina'am tisi ya pu ke ka ya a yamis ka zot dabiem, ka lee ke ka ya a Wina'am biis ka buon Wina'am ye, “Ti Ba'.” 16Wina'am Siig Suŋ meŋ ke ka ti meŋ siis mi' su'uŋa ye ti ane Wina'am biis. 17Tiname sadigim aa o biis la, ti na di'e yelsum bane ka o digil ye o tis o nidib la, ka me na di'e li ne Kiristo. Tiname sadigim namis ne Kiristo la, ti me na di'e na'asi ne o arazana ni. 18M ten'esid ye namisug line ka ti nyet nannanna la ane bi'ela, ka ti ku nyaŋe maki li ne na'asi line na ti nie ka ti nye laa. 19Dunia bun wusa ka Wina'am maal la gur saŋkan ka Wina'am na ke ka o biis la nie na n boodi li bedego. 20Wina'am da ke ka dunia ku nyaŋe niŋ lin ka o pun da maali li ye li niŋ laa, ka li ka' dunia meŋ boodim ka lee ane Wina'am boodim ka li a ala. Hale ne ala, ka ti'ir kaŋa da be, 21ye, Wina'am na ke ka dunia meŋ so'e li meŋ li ya'a ti pun'e. Wina'am biis na mor yolisim ne na'asi. Ka dunia me na di'e li ne ba. 22Ti mi' ye saŋkan n ti paae zina, ka dunia wusa unsid ne toog wenne po'a yiti sa' bood du'ab la. 23Ka li ka' dunia la ma'anee, ka me ane tinam bane mor Wina'am Siig Suŋ line aa o piini yiiga la. Tinam me unsid ti sunya ni, n gur saŋkan ka Wina'am na nie pa'al paalo ni ye ti aa o biis, ka ke ka ti niŋgbina nye yolisim li ya'a ti pun'e. 24Ti'ir kaŋa ni ka ti nye faangir. Ka ti ya'a nye line ka ti mor li ti'ir la, lin ka'a ti'ire. Ano'on mor ti'ir ne lin ka o pun nye? 25Ka ti ya'a mor ti'ir ne lin ka ti pu nyee, ti modigidne ka guri li. 26Ala men, Wina'am Siig Suŋ la kena ye o suŋi ti, ti tadimis ni. Ti zi' lin nar ye ti pu'us Wina'am si'em. Wina'am Siig Suŋ meŋ sosid Wina'am tisidi ti ka ke ka ti unsid ka sosidi ti sunya ni ka zi' tinam yet si'ela. 27Ka Wina'am one mi' ninsaalib sunya la, mi' Siig Suŋ la poten'er, on sosid Wina'am n tisid o nidib ka li doli Wina'am boodim la zug. 28Ti mi' ye si'el mekama ya'a ti niŋ, Wina'am tumi li ni ka maan su'um n tit nimbane noŋ o ka o gaŋi ba ne o meŋ boodim la. 29O da gaŋ nin sieba ka ba na aa o nidib, ka dunia nam pu maale ka o da gban'e ye o na ke ka ba wenne o Biig, ye o Biig la na a kpeenm o pitib bedego sa'an, 30ka buol nimbane ka o da gban'e ye o na ke ka ba wenne o Biig la o sa'an, ka ke ka ba a popielim dim o tuon, ka me tisi ba na'asi. 31Dinzugo, bo ka ti na yele? Wina'am ya'a be ne ti, ano'one na nyaŋe niŋe ti si'ela? 32Ka Wina'am ya'a pu ke ka o meŋ Biig la pons ku'um, ka zaŋ o Biig la ka o kpi ti wusa zugo, o me ku tisi ti si'el wusa zaalim bee? 33Ano'on na nyaŋe pian' nimbane ka Wina'am gaŋ la yela be'ede? Li ane Wina'am meŋ n koos ye ba mor buod. 34Ano'on na nyaŋe kadi ba saria ka koosi ba yela be'ede? Li ka'a Yesu Kiristo one da kpi ka me vu'ug kumin ka zin'i Wina'am datiuŋ, ka nwe'ed nu'ug ti yela la, na koosi ti yela be'ede. 35Bo na nyaŋe baki ti Kiristo noŋilim ne? Daamug bee yelpakir bee namisug bee ko'om bee noŋ bee yeltoog bee ku'um na nyaŋe baki ti bee? Ayei. 36Li niŋne wuu lin da sob Wina'am gbauŋin si'em ye, “Wina'am dolim zug, ka ku'um namisidi ti daar wusa. Ka maane ti wenne bunkonbid ka ba ye ba kodig ne.” 37Yel bama ku baki tii. La'am ne yelbama wusa keenn ti sa'an na la, Kiristo one noŋi ti la ke ka ti nyaŋe ba wusa ka kee ba bas. 38M mi' su'uŋa ye si'el kae' na nyaŋe baki ti Kiristo noŋirin nee. Ku'um bee nyovur bee maleknam bee si'elnam line so'e nidib bee si'elnam line mor paŋ bee line niŋid nannanna bee line na ti niŋ bee 39si'elnam line be agol bee teŋin bee si'el mekama wusa dine be dunia nwa ni wusa kudum ku nyaŋe baki ti Wina'am noŋirin nee, noŋir dine yine ti Zugsob Yesu Kiristo ni la.

will be added

X\