ROOM DIM 7

1M ba'abiise, ya wusa mi' wada la yela. Dinzugo ya na gban'e man ye m yel si'el la gbin. Wada la so'ene nid, o vum saŋa ma'aa. 2Dinzugo, wada la poogin, li mugusne ye po'a la'as ne o sid, o sid vum saŋa. Ka o sid ya'a kpi, po'a la so'e o meŋ ne sid kulug wada la. 3Dinzugo, o ya'a la'as ne dau so', ka o sid la nan voe, ba na yel ye o sa'am dau. Ka o sid ya'a kpi, o so'e o meŋ ne sid kulug wada la. Ka o ya'a kul dau so', o pu sa'am dau. 4M ba'abiise, yanam me ane ala. Yaname a Kiristo niŋgbina lua la zug, ya daa kpi ka wada la pu len so'e yaa. Ka nannanna Kiristo one ka Wina'am vu'ug o kumin ye ti niŋ line ma'ae Wina'am sunf la, yu'un so'e ya. 5Saŋkan ka ti daa yiti dol ti ninsaalib boodim la, ka wada ke ka ti ya'amleog be'ed due ka li tum ti niŋgbina ni ye ti niŋ line dol kum. 6Ka nannanna ti so'e ti meŋ wada la sa'an. Ti daa kpi, ka wada la pu len so'e tii. Linzug ti dol Wina'am ne vumpaal line ka o Siig Suŋ tisi ti la, ka li ka'ane wadakudug line da sob la ke ka ti dol oo. 7Ti na yel ye bo? Ti na yel ye wada la ane bunbe'ed bee? Ayei, baa bi'elaa. La'am ne lin a sida ye wada la ane bunsuŋ la, wada la ya'a da ka'anee, m naan ku baŋin tuumbe'ede a si'ela. Wada la ya'a da pu yelin ye, “Da mor fufume,” m naan ku baŋin fufum a si'ela. 8Ka tuumbe'ed nyee li suer noyelug la ni, ka ke ka fufum buudi bedego due m sunfin. Wada la ya'a ka'anee, ti naan ku mi'in tuumbe'ede. 9Kudum sa ka m da voe, ka da zi' wada la gbin ne, ka yu'un baŋ noyelug la gbin, ka tuumbe'ed yu'un due m sunfin ka m kpi. 10Ka wada kane da ken ne vum la, m nye ka li mor ne ku'um na. 11Tuumbe'ed nyee suer wada la ni, ka ma' m, n kpen'esi m kumin. 12Wada la meŋ ane su'um nyain. Ka noyelug la me a sida, ka a su'um nyain. 13Ka li ane line a su'um la mor ku'um na tisi m bee? Ayei, baa bi'elaa. Li ane tuumbe'ed la niŋi li, ka nok noyelug line a su'um la n kuu m ye li nie ye li sid ane tuumbe'ed. Ka linzug ka tuumbe'ed yu'un lieb line a bunbe'ed tita'ar. 14Ti mi' ye wada la ane Wina'am Siig Suŋ din. Ka man ane ninsaal, ka wenne yamug one ka ba kuosi tis tuumbe'ed. 15Man pu gban'e man niŋid si'el la gbin ne. M pu niŋ man bood si'ela, ka lee tum man pu bood si'el la. 16M ya'a tum man pu bood ye m tum si'el la, li pa'al ye m siak ye wada la a su'um. 17Dinzugo, li ka'ane mane niŋid ne'eŋa, ka lee ane tuumbe'ed line bee m ni la. 18M mi' ye bun line a su'um ka' m nii. M ye m yel ye, bun line a su'um ka'a man ninsaal boodim sa'ane. La'am ne tuumsuma ya'amleog bee m sa'an la, m pu nyaŋedi niŋidi lii, 19ka pu niŋid su'um wuu man bood ye m niŋ si'em laa, ka lee tum tuumbe'ed line ka m pu bood ye m niŋ la. 20M ya'a tum line ka m pu booda, li pa'al ye li ka'ane mane niŋidi lii, ka lee ane tuumbe'ed line bee m ni la. 21Dinzugo, m nyet ka mugusug kaŋa be. Li ane ye, m ya'a bood ye m niŋ dine a su'um, m ku nyaŋe. Asee line a be'ed ma'aa ka m na tun'e niŋ. 22Wina'am wada la ket ka m sunf ma'ed. 23Ka m nyet wada si'a line tum m niŋgbina ni ka zabid ne wada line ka m poten'er bood la, ka loo m wuu m ane sarega nid ye m siak tuumbe'ed line kuli m niŋgbina la. 24Oi, bo susa'aŋu nwa ka m nyeta! Ano'on na faaenn m, ka m niŋgbina nwa ku doli m n keŋ kumine? 25Wina'am gullim na faaenn m, ka li yi ne ti Zugsob Yesu Kiristo ni. M pu'us Wina'am bareka. M mi' line a su'um ye m tum Wina'am boodim, amaa m niŋgbina boodim nyaŋe m ka m tum line ka'a su'um.

will be added

X\