ROOM DIM 6

1Dinzugo, ti na yel ye bo? Ti na yel ye, ti na kpelim tum tuumbe'ed ye Wina'am popielim piini la nobug bee? 2Ayei, baa bi'elaa. Li wenne ti daa kpi ne, ka linzug tuumbe'ed pu len so'e tii. Dinzugo ti ku kpelim niŋ wuu tuumbe'ed nan so'e tii. 3Ya sid mi' ye tinam bane di'e Wina'am ku'om suub ka lieb yinni ne Yesu Kiristo la, me lieb yinni ne o ku'um la. 4Kiristo da kpiya ka ba mum o, ka Wina'am vu'ug o kumin ne o paŋ. Ka ala men, ti daa di'e ku'om suub, ka li wenne ti daa kpi ka ba mumi ti ne o, ye ti vu'ug n di'e vumpaal ka kpelim bee li ni. 5Li ya'a a sida ye ti daa lieb yinni ne Kiristo n kpi wuu on niŋ si'em, ala men ti sid na a yinni ne o, n vu'ug kumin wuu on me niŋ si'em la. 6Ti mi' ye tinam meŋ daa a be'ed si'em la, ti daa kpi ne o dapuudir zug, ye ti tuumbe'ed ya'amleog paŋ sa'am, ka tuumbe'ed ku len so'e ti wuu ti aa li yamugo. 7Nid ya'a kpi, o nye yolisim ne tuumbe'ed paŋ. 8Ka tiname sadigim kpi ne Kiristo la, ti siak ye ti me na voe ne o. 9Ti mi' ye Wina'am sadigim vu'ug Kiristo kumin la, o kudum ku len kpii. Kum len ka' paŋ o sa'ane. 10O da kpi vuguri ti tuumbe'ed zug ka li ku len daam oo. Ka o nan voe, ka voe ye o na'as Wina'am. 11Ka ala men, ya meŋ ten'esimi ye yaname a yinni ne Yesu Kiristo la zug, ya meŋ kpi ka tuumbe'ed ku len so'e yaa, ka ya me voe ye ya na'as Wina'am. 12Da ke ka tuumbe'ed len so'e ya niŋgbina ye ya siak ya'amleog be'ed bane ka ya niŋgbina bood la. 13Da pesigi ya niŋgbina luas wusa n tis tuumbe'ed ye tuumbe'ed more ba n tum be'ede, ka lee pesigi ya meŋ n tis Wina'am; ka ya ane nimbane ka o more ya yi kumin n keŋ vumin. Pesigimi ya niŋgbina luas wusa n tis Wina'am ye o more ba n tum popiel tuuma. 14Wada la pu so'e yaa, ka Wina'am popielim lee so'e ya. Linzug tuumbe'ed pu so'e yaa. 15Aa to. Wada la pu so'e tii, ka Wina'am popielim lee so'e ti. Linzug ti na kpelim tum tuumbe'ed bee? Ayei, baa bi'elaa. 16Ya ya'a pesigi ya meŋ ka a so' yamis ka siak o noor, ya sid ane one ka ya siak la yamis. Ya ya'a siaki tum tuumbe'ed, ya ane tuumbe'ed yamis, ka lin dol ku'um. Ka ya ya'a siak Wina'am noor, ya ane o yamis, ka lin me ke ka ya a popielim dim Wina'am tuon. 17Ka ti pu'us Wina'am bareka yanam yu'un siak pa'alug kane ka ya di'e la ne ya sunya, hale la'am ne yaname daa a tuumbe'ed yamis la. 18Wina'am daa ke ka ya so'e ya meŋ tuumbe'ed sa'an, ka me ke ka ya a popielim yamis. 19Ya ninsaalib ya'am ka' paŋ la zug, m pian'ad wuu ninsaalib yiti pian'ad ba yela si'em la. Ya daa yiti pesigi ya meŋ n tis tuumyood ne tuumbe'ed ka li nobugid bedego. Ala men, nannanna pesigimi ya meŋ me tis popielim, ye ya niŋ line a su'um nyain. 20Yanam daa a tuumbe'ed yamis la, ya daa so'e ya meŋ popielim sa'an. 21Ka tuumbane ka ya daa tum ka li mor nyan ya sa'an nannanna la, daa tisi ya bo nyoode? Tuumban la dolne ku'um. 22Ka nannanna Wina'am ke ka ya so'e ya meŋ tuumbe'ed sa'an, ka lieb o yamis. Ka li nyood ane ye ya aa o nidib gullim. Ka lin dol nyovur dine ka' naare. 23Tuumbe'ed yood ane ku'um. Ka Wina'am piini ane nyovur dine ka' naare. Ka ti di'e li tinam a yinni ne ti Zugsob Kiristo Yesu la.

will be added

X\