ROOM DIM 5

1Dinzugo, Wina'am ke ka ti a popielim dim o tuon, ka li yi ne ti yadda niŋir la zug. Ka linzug ka ti naalim ne Wina'am. Ka li ane ti Zugsob Yesu Kiristo ma'asim la zug. 2Kiristo ke ka ti nye Wina'am popielim piini ka more li kiŋ kiŋ, ka me mor ti'ir ye ti na la'am di'e na'asi ne Wina'am. Ka li tisi ti sumalisim. 3Ka ti me mor sumalisim ti namisug la zug, n mi' ye namisug ke ka ti nyaŋe modig. 4Ka ti ya'a modig, li me pa'al ye ti nye kpansug ka a su'um. Ka lin ke ka ti mor ti'ir ye ti na ti be ne Wina'am. 5Ka Wina'am pesigi o noŋire ti sunya ni, ka li yine o Siig Suŋ ni na, on ka Wina'am tisi ti la. Ka linzug ka ti'ir kaŋa ka' ziri ti'ire. 6Wina'am n gaŋ saŋsi'a la, tinam daa nan a tuumbe'ed dim ka ka' suŋir la, ka Kiristo kpi tisi ti. 7Li toe ka so' di'e popiel nid ku'um n kpi. Amaa daasi'ere so' na siaki kpi ninsuŋ yela. 8Ka Wina'am pa'ali ti o noŋir a bedego si'em, tinam daa nan a tuumbe'ed dim ka Kiristo kpi tisi ti la. 9Ka o ziim la ke ka Wina'am ke ka ti a popielim dim o tuon, linzug bi'esug len kae' ye Kiristo na faann ti' ka ti ku nye Wina'am supeene. 10Ti da ane dataas ne Wina'am. Ka o Biig la kum ke ka o naal ne ti. Ka tinam naal ne Wina'am la, ka bi'esug len kae' ye Kiristo nyovur na faann ti. 11Ka line len paas ane ye ti maal sumalisim ne Wina'am n niŋ si'el la. Ka li ane ti Zugsob Yesu Kiristo la zug, on kane yu'un naali ti ne Wina'am la. 12Dau yinni da tum tuumbe'ed, ka nan ke ka tuumbe'ed sig dunia ni na. Ka o tuumbe'ed la zug, ka ku'um kena. Ka linzug ka ku'um lo'omis ninsaalib wusa, ban tum tuumbe'ed la zug. 13Saŋkan ka Wina'am da nam pu tis Moses o wada la, tuumbe'ed da be. Ka wada ya'a kae', Wina'am pu geligid tuumbe'ede. 14Ka Adam saŋa ti paae Moses saŋa, ku'um pun paae nidib wusa, hale ne bane tum tuumbe'ed ka li pu a wuu Adam da zan'as Wina'am noyelug si'em laa. Adam ne Yesu Kiristo one kenn o nya'aŋ na la wenne taaba, 15ka lee ka' bun yinni. Ka Wina'am piini pu wenne Adam tuumbe'ede. Dau yinni tuumbe'ed la ke ka nidib bedego kpiid. Ka Wina'am popielim gaad ala bedego. Ka o piini line yit dau yinni one a Yesu Kiristo la popielim ni, zu'eya n tis nidib bedego. 16Dine dol Wina'am piini pu wenne line dol dau yinni la tuumbe'ede. Saria kadib line dol tuumbe'ed yinni la ane koosbe'ed. Ka Wina'am piini line dol tuumbe'ed bedego ane ye Wina'am ke ka ti a popielim dim o tuon. 17Dau yinni tuumbe'ed la zug, ka kum paae nidib wusa, ka li yi dau kaŋa ni. Ka line dol Yesu Kiristo tuuma la gaad ala. Nidib bane wusa di'ed Wina'am popielim line zu'e ne o piini dine a popielim la, na nye na'am ne nyovur. Ka li yi ne dau yinni one a Yesu Kiristo la ni. 18Aa to. Tuumbe'ed yinni la ke ka nidib wusa nye saria kadib be'ed Wina'am sa'an. Ala men Yesu Kiristo popielim tuum yinni ke ka Wina'am ke ka nidib wusa a popielim dim o tuon, ka tisi ba nyovur. 19Nid yinni la zan'as Wina'am noor la ke ka nidib bedego a tuumbe'ed dim Wina'am tuon. Ala men ka nid yinni la siak Wina'am noor la ke ka Wina'am ke ka nidib bedego a popielim dim o tuon. 20Wada la da kena ye li ke ka wadasa'uŋ nobug. Ka tuumbe'ed n nobug la Wina'am popielim piini nobug bedego gaad ala. 21Tuumbe'ed nyaŋed nidib wusa ka ba kpiid. Ala men Wina'am ke ka ti a popielim dim o tuon la zug ka o popielim so'e ti ka tisi ti nyovur line ka' naare, ka li yine ti Zugsob Yesu Kiristo ni.

will be added

X\