ROOM DIM 3

1M ye m bu'os bu'osa wuu ninsaalib yiti niŋid si'em la ka lebis m meŋ lebisa. Ka bo nyood ka Jew dim la nye n gaad bane ka' Jew dim la? Ka ba baŋo kpen'eb la nyood a bo? 2Li ane bedego. Yiiga daan, Wina'am da gu'uli ba o noor pian'ad. 3Ka ba sieba ya'a da ka'ane yelsida dima li na ke ka Wina'am ku a yelsida sob bee? 4Ayei, baa bi'elaa! Hale nidib wusa ya'a a ziri dim, Wina'am na kpelim a sida sob. Li dol ne lin da sob Wina'am gbauŋin si'em la ye, “Li nar ka Wina'am a yelsida sob. Ka on kat saria si'em la zi'enid.” 5Wina'am tuumsoma la ya'a nie pa'al tinam tuumbe'ede, ti na yel ye Wina'am n tekidi ti tubor la o tum tuumbe'ed bee? Ayei, baa bi'elaa! 6Wina'am ya'a ka'ane sida soba, o naan ku nyaŋen kadin dunia nidib saria. 7Ka m ya'a ane ziri sob ka man ziri la zug ya'a ke ka Wina'am yelsida la paasid, ka tisid Wina'am zun'or, ba mor suer na kad man saria ye m ane tuumbe'ed daana? 8Ka bo ka ti ku tum tuumbe'ed n ket ka bunsuma doli li? Ninsieba tu'ud man n yet ye mane yeli ala. Wina'am na koos ba yela be'ed wuu lin nare ba si'em. 9Aa, to. Tinam bane a Jew dim la a su'um gat bane ka' Jew dim la bee? Ayei. M pun deŋim pa'al ye tuumbe'ed mor paŋ ne Jew dim la'am ne bane ka' Jew dim wusa. 10Li dolne lin da sob Wina'am gbauŋin ye, “Baa nid yinni kae' a popiel soba. 11So' kae' n baŋ Wina'am yelaa, bee bood ye o mi' Wina'am. 12Ninsaalib wusa kedigne ka pu dol Wina'am suere ka me bodig. So' kae' n niŋid line a su'um, hale baa yinni mene. 13Ba kukoya wenne yaug za'anoor line ka ba pu yooda. Ba more ba zilima pian'ad ne dama'ar. Ba noor toe wenne yabigne. 14Ba noor pian'ad ane nopoor ne tu'ud gullim. 15Ba sunya duod to'oto ye ba ku nid. 16Ka zin'ikan ka ba gaad wusa susa'aŋ na be anina. 17Ba zi' sumalisim suere, 18ka me pu zot Wina'am.” 19Ti mi' ye wada la ya'a yel si'el, li yeti tisid bane doli li la. Linzug ka nidib wusa bane mor wada la ne bane ka'a li la, na sini ba noor. Ka ba wusa na tu'asi ba yela Wina'am tuon ka ko'oŋ buod. 20Ninsaal kae' na niŋ wada la yel si'em la, ka a popielim daan Wina'am tuone. Li ane wada la ni, ka ninsaalib baŋ ye ba ane tuumbe'ed dim. 21Ka nannanna Wina'am nie pa'al on niŋid si'em n ke ka ninsaalib a popielim dim o tuon. Ka Wina'am nodi'esidib ne wada la pa'ali ti li yela, ka li lee pu yine wada la dolim ni naa. 22Wina'am ket ka ninsaalib bane wusa niŋ Yesu Kiristo yadda la a popielim dim o tuon ka li yine ba yadda niŋir Yesu Kiristo ni, ka pu mor baragaŋ ye Jew dim nwa, ka bane ka' Jew dimi nwaa. 23Ninsaalib wusa tum tuumbe'ed ka ko'oŋ Wina'am yelsum. 24Ka di'e buod Wina'am tuon line a o piini n tisi ti, ka li yi ne Yesu Kiristo ni na, one faaenn ti la. 25Wina'am zaŋ o n tis ye o kpi, ka o ziim yi, ye o ke ka Wina'am supeen naae ne ti. Ka ti naal noor ne o tinam niŋ o yadda la. O niŋ ala ye o pa'al ye o ane popielim sob. Saŋa kane da gaad la, Wina'am da mor sumbugusum ne ninsaalib, ka pu geligidi ba tuumbe'ede. 26Ka nannanna, o niŋ ne' ye o pa'al ye o meŋ ane popielim sob, ka me ke ka ninkane niŋ Yesu yadda la a popielim sob o tuon. 27Dinzugo, si'el kae' ka ti na nwe'e nyo'og ne lii. Li ka'ane ninsaalib n dol wada la na ke ka ba nyaŋe nwe'e nyo'ogo. Li ane ban niŋ Yesu Kiristo yadda la zug. 28Ti gban'e ye so' yadda niŋir Kiristo ni gullim na ke ka Wina'am ke ka o a popielim sob o tuon, ka ka'ane on dol wada la zugo. 29Ya ten'es ye Wina'am ane Jew dim la Wina'am ma'anee? Ayei, o ane Jew dim ne bane ka' Jew dim la wusa Wina'am. 30Wina'am ane yinni, ka na ke ka Jew dim ne bane ka' Jew dim la me a popielim dim o tuon, ba wusa yadda niŋir ni. 31Ya ten'es ye tinam pa'al ye nidib di'ed popielim ba yadda niŋir zug la, ket ka wada la a zaalim bee? Ayei, baa bi'elaa. Ti lee ke ka wada la zi'e su'uŋa.

will be added

X\