ROOM DIM 2

1Fu ya'a kati fu taaba saria ka koosi ba be'ed, fun pun koos ne fu meŋ be'ed bozugo fun me tum ne ala. 2Ti mi' ye Wina'am ane yelsida sob ka na kad nimbama nwa tuumbe'ed saria n koos. 3M zua, fu ya'a yel sieba bane tum tuumbe'ed bama ye ba niŋ be'ed, ka fu meŋ tum ala, fu ten'es ye fu na nyaŋe pons Wina'am n kad tuumbe'ed saria la bee? 4Ka fu ne'es Wina'am n niŋ si'em n na'asi ti su'uŋa ka mor sumotir bedego ne ti la bee? Ka zi' ye Wina'am na'asi ti ye o ke ka ti tiak ka bas tuumbe'ed la bee? 5Fu mor zugkpi'euŋ ka zan'as ye fu tiake bas tuumbe'ed. Dinzugo fu paasi fu meŋ ne namisug line ka fu na ti nye daar kan ka Wina'am na kad saria ne yelsida, ka o supeen na nie paalo ni la. 6Wina'am na tis so' mekama nyood wuu on tum si'em la, 7ka na zaŋ nyovur line ka' naare n tis bane modig n tum tuumsuma, ka bood na'asi Wina'am sa'an ne nyovur line ka' naar la. 8Ka o supeen na lu bane boodi ba meŋ, ka zan'as yelsida, ka siak tuumbe'ed la zut. 9O na zaŋ namisug ne daamug n tis ninsaalib bane wusa tum tuumbe'ed. Jew dim la na nyee li yiiga, ka bane ka' Jew dim la me tia'al. 10Ka o na zaŋ na'asi ne sumalisim n tis nimbane wusa tum tuumsuma. Jew dim na nyee li yiiga men, ka bane ka' Jew dim la tia'al. 11Wina'am pu mor baragaŋ ne nidibaa. 12Nimbane ka' Jew dim la pu mor wada line ka Moses di'e Wina'am sa'an laa. Amaa ba tuumbe'ed la zug ka ba na kpi, la'am ne ban pu mor wada laa. Jew dim la mor Moses wada la, ka lee tum tuumbe'ed. Ka Wina'am na kadi ba saria ne wada la. 13Li ka' bane wum wada la a popielim dim Wina'am tuone, ka lee ane bane niŋid wuu wada la yel si'em la. 14Nimbane ka' Jew dim la pu mor Moses wada laa. Ka li ya'a aa ba meŋ boodim ka ba niŋid wuu wada la yel si'em la, ba meŋ ten'esug ane wada ba sa'an, la'am ne ban pu mor Moses wada la. 15Ba niŋir pa'al ye wada la yel si'el la be ba sunfin, ka ba poten'er line mi' su'um ne be'ed la me pa'al ye li a sida. Ka ba ten'esug yiti yeli ba daasi'er ye ba pu niŋ su'um, ka yiti lem yiisi ba. 16Li na ane anwa. Daakan ka Wina'am na kad nidib poten'esua'ada saria, ka li yi Yesu Kiristo ni na. Ala ka labasuŋ kane ka m moon la pa'an. 17Ka fun kane buol fu meŋ ye Jew dim yinni la, fu yela a bo? Fun mor Moses wada la zug, ka fu ten'es ye Wina'am na di'e uf bee? Fu nwe'ed nyo'og ye fu ane Wina'am nid, 18ka mi' Wina'am boodim. Ka wada la pa'al uf fun na gaŋ line a su'um. 19Ka fun mor wada line ke ka fu baŋ mi'ilim ne sida wusa la zug, ka fu ten'es ye fu ane ninkane na nyaŋe zamis bane zi' Wina'am wada, ne bane be likin, 20ka ten'es ye fu na zamis bane a zon la, ne bane a biis, ka pa'ane fu taaba, 21bo ka fu pu zamisi fu meŋa? Ka moon ye nidib da zuuda, ka fu meŋ lee zuuda? 22Fun kane yel ye ba da sa'am po'ab la, fu meŋ sa'am po'ab bee? Ya pu siak ye ba maalim ba'are, amaa ya meŋ zuud ba'ar la'ad. 23Ka nwe'ed nyo'og ne Wina'am wada, ka me sa'ami li ka diis Wina'am nyan. 24Li dolne lin da sob Wina'am gbauŋin ye, “Yanam Jew dim zug, ka bane ka' Jew dim la pian'ad be'ed n sa'amid Wina'am yu'ur.” 25Fu ya'a siak wada la, fu baŋo kpen'eb line pa'al ye fu ane Wina'am nid yinni la mor nyood. Ka fu ya'a sa'am wada la, fu baŋo kpen'eb la ane zaalim. 26Ka bane ka' Jew dim, ka pu kpen'e baŋo la, ya'a siak wada la noyelug, Wina'am na gosi ba wuu bane kpen'ed baŋo. 27Yanam Jew dim mor wada la gbauŋin, ka kpen'ed baŋo, ka lee sa'am wada la. Ka bane pu kpen'e baŋo ba niŋgbina ni, ka lee siak wada la, na pa'al yanam yela ye ya tum tuumbe'ed. 28- 29Li ka'ane niŋkane mor Jew dim zanbin o niŋgbina ni sid a Jew nida. Li ane one dol Wina'am o sunfin. Ka baŋo kpen'eb line a sida la, ka' o niŋgbina ni, ka lee be o sunfin. Ka Wina'am Siig Suŋ maali li. Ka li ka'ane wada la maali lii. Ninkane sid a Jew nid la, di'e zun'or Wina'am ni, ka ka' ninsaalibinee.

will be added

X\