ROOM DIM 16

1M pian'adne ti taunn Foebe yelsum yela tisidi ya. O ane Wina'am nidib bane be Kenkiria teŋin la suŋid. 2Di'emini o wenne lin nar ne Wina'am nidibi di'ed taaba si'em la, ti Zugsob yu'ur zug, ka suŋ o ne on bood si'el ya sa'an; ka o meŋ daa suŋid nidib bedego la'am ne mam. 3Pu'usimi Priska ne Akuila, m tumtum taaba bane tum Yesu Kiristo tuuma la. 4Ba da siak ye ba kpi mam zug. M pu'usidi ba bareka, ka li ka' mam ma'anee, ka me ane bane ka' Jew dim ka a Wina'am nidib la me pu'usidi ba. 5Ka pu'us Wina'am nidib bane la'asedi ba yin la. Ka pu'us m zuasuŋ Epenetus one be Asia teŋin la. One daa deŋim siaki dol Yesu Kiristo yiiga. 6Ka pu'us Meeri one daa tum hale n tisidi ya la. 7Ka pu'us Andronikus ne Junias bane aa m du'adib ka da la'am be sarega ni ne mam la. Ka Kiristo Tumtumnib la mi'i ba su'uŋa. Ka ba me da deŋi dol Kiristo man yiiga. 8Pu'usimi m zuasuŋ Ampliatus one ka m noŋ Kiristo zug la. 9Ka pu'us Urbanus, ti tumtum tiraan one tum Kiristo tuuma la, ne m zuasuŋ Stakis. 10Ka pu'us Apelles on ka nidib bedego baŋ ye o dol Kiristo ne sida la. Ka pu'us Aristobulus yidim. 11Ka pu'us m du'ad Herodion. Ka pu'us Narkissus yidim bane niŋ Zugsob yadda la. 12Ka pu'us Trifaena ne Trifosa bane tum Zugsob tuuma la. Ka pu'us m zuasuŋ Persis one tum bedego tisid Zugsob la. 13Ka pu'us Rifus on ka nidib bedego mi' o tuuma Kiristo zug la, ne on daa noŋ m wuu o biig la. 14Ka pu'us Asinkritus ne Flegon ne Hermes ne Patrobas, ne Hermas ne ba'abiis zan'asa bane be ne ba la. 15Ka pu'us Filologus ne Julia ne Nereus ne o taunn ne Olimpas ne Wina'am nidib wusa bane be ne ba la. 16Pu'usimi taaba ne noŋir. Kiristo nidib wusa pu'usidi ya. 17M ba'abiise, m sa'ali ya ye ya gu'us ne nimbane mor weligir kenne ya sa'an ka maan si'elnam line lubid nidib la, ba zan'as ka pu dol pa'alug kane ka ya di'e laa. Luakimini ya meŋ ne ba. 18Bane niŋidi ala la pu tum ne ti Zugsob Kiristo tuumaa ka lee tum ne ba meŋ ya'amleog tuuma. Ba ma'ad nimbane potenda pu kpi'em la n pian' ne nomalisiŋ. 19Nidib bedego wum yaname siak labasuŋ la si'em la, ka linzug ka m mor sumalisim ya yela. Ka m bood ye ya mor ya'am ne line a su'um, ka da mor poten'er ne line a be'ede. 20Li kpelim bi'ela ka Wina'am one tisidi ti sumalisim na sa'am Sutaana paŋ ka ke ka ya nyaŋ o. Ti Zugsob Yesu Kiristo yelsum na be ne ya. 21M tumtum tiraan Timoti pu'usidi ya. Ka m du'adib Lukius ne Jason ne Sosipater me pu'usidi ya. 22Man Tertius, one sobid lin ka Paul pian'a gbauŋ kaŋa ni la, pu'usidi ya ti Zugsob yu'ur zug. 23Gaius one a m yisigidir daan ne on yin ka Wina'am nidib la'ased la, pu'usidi ya. Erastus one gur teŋ kaŋa ligidi la ne ti ba'abiig Kuartus, pu'usid ya. 24Ti Zugsob Yesu Kiristo yelsum be ne ya wusa, Ami. 25Zun'omi Wina'am one nyaŋe ket ka ya mor paŋ ya yadda niŋir ni la. Ala ka labasuŋ kan ka m pa'ali ya, ne lin ka m mooli tisi ya Yesu Kiristo yela la, ne yelsua'adir line yu'un nie paalo ni la yeli ti. Yelsua'adir la da sua'eya ka li yuma lal, 26ka Wina'am nodi'esidib sob ka li yu'un nie paalo. Ka Wina'am one voe ka ka' naar la tis noor ka buudi wusa baŋi li, ye nidib bedego siak Wina'am ka niŋ o yadda. 27Wina'am one mor ya'am gaad so' wusa la di'em na'asi saŋa line ka' naare Yesu Kiristo yu'ur zug. Ami.

will be added

X\