ROOM DIM 15

1Li nar ka tinam bane yadda niŋir Yesu Kiristo ni zu'e la suŋ nimbane ka ba yadda niŋir pood ka ba nye sukpi'em ba yadda niŋir ni. 2Ti yinni yinni niŋim dine na ma'ae o ba'abiig sunf, ka ka' o meŋ sunfo, ka li ane o ba'abiig su'um nyeeb zug ye li suŋ o ka o yadda niŋir kpi'em. 3Ka Kiristo da pu niŋ dine ma'ed o meŋ sunfo, ka lee niŋ ka li dolne lin sob Wina'am gbauŋin ye, “Bane tu'ud Wina'am la tu'udne man.” 4Lin wusa ka ba da sob Wina'am gbauŋin la, da sobne ye li zamisi ti, ye Wina'am gbauŋ la na ke ka ti modig ka mor sukpi'euŋ, ka li na ke ka ti mor ti'ir ye ti na ti be Wina'am sa'an. 5M sos Wina'am one tisidi ti modigir ne kpe'eŋir la ye o na ke ka yaname dol Yesu Kiristo la na ke ka ya mor poten'er yinni, 6ka dinzug ka ya wusa na mor noor yinni n zun'e Wina'am one aa ti Zugsob Yesu Kiristo Ba' la. 7Gban'ami noor yinni ne taaba ka na'as Wina'am, wuu Kiristo da di'e yanam si'em la. 8M yeli ya ye Kiristo da lieb Jew dim la tumtum ye o pa'al ye Wina'am a sida sob, ka me ye o ke ka Wina'am da zi'el ti yaanam noor la lieb sida, 9ka me ye bane ka' Jew dim la na zun'e Wina'am on zoti ba nimbaanlig la zug. Li da sob Wina'am gbauŋin ye, “Dinzugo, m na pu'us fun Wina'am bareka bane ka' Jew dim la ni, ka me na yuum n zun'e fu yu'ur.” 10Ka li len sob ye, “Yanam bane ka' Jew dim la la'am ne Jew dim la, more sumalisim.” 11Ka len sob ye, “Nimbane ka' Jew dim la za'a, zun'omi Zugsob la. Buudi wusa, zun'om o bedego.” 12Ka Wina'am nodi'es Azaya me sob ye, “Jese yaaŋ na kena, ka Wina'am na ke ka o so'e buudi wusa. Ka bane ka' Jew dim la na mor ti'ir o ni.” 13M sos Wina'am one tisidi ti ti'ir, ye o na ke ka ya mor sumalisim bedego, ya yadda niŋir Kiristo ni la zug. Ka Wina'am Siig Suŋ paŋ na ke ka ya ti'ir nobug bedego. 14M ba'abiise, m suunr kpi'em bedego ne yaname a si'em ye ya poten'er nie ya si'el wusa ni ka ya na nyaŋe sa'al taaba. 15- 16Mam mor sukpi'euŋ ka deŋi sob yelsieba ye m tienn ya li yela, Wina'am tisi m popielim piini si'a ka m a Yesu Kiristo Tumtum ye m tum o tuuma bane ka' Jew dimin la zug. M tum wuu maalmaanib yiti tisid Wina'am piini si'em la ka moon Wina'am labasuŋ la ye bane ka' Jew dim la na a piini tis Wina'am line na malis o, ka o Siig Suŋ ke ka ba a su'um nyain. 17Mam a yinni ne Yesu Kiristo la ke ka m nyaŋedi nwe'ed nyo'og ne tuum kan ka m tumme tisid Wina'am la. 18M na nwe'e nyo'og ka pian' ne'e yela ma'aa ye Kiristo ke ka bane ka' Jew dim la siak Wina'am ka li yine mam sa'an. Li ane m pian'ad ne m tuuma 19ne paŋ kane ke ka m nyaŋedi maan bunnyalima ne Wina'am Siig Suŋ paŋ la ke ka Kiristo niŋidi li. Ka ala ka m yi Jerusalem n gilig n keŋ paae Illirikum teŋin ka mool Kiristo labasuŋ la zin'is bama wusa. 20Ka yiti bood hale ye m mool Kiristo labasuŋ zin'is ban ka ba nam pu wum o yela laa, ka ka'a ye m dolis so' nobaa, ka ane mane pin'ili li pa'alug. 21Li dolne lin da sob Wina'am gbauŋin ye, “Nimbane ka ba pu yeli ba o yela la, na baŋi li. Ka bane nam pu wum o yela la na gban'e li gbin.” 22Lina giŋim saŋa bedego ka m pu nyaŋe keenn ya sa'an naa. 23Ka nannanna ka m yu'un naae m tuuma teens bama ni, ka me da bood yuma bedego ye m kena kaae ya, 24ka lin zug ka m mor poten'er ye m na nyee ya, saŋkan ka m ti gati ken Spain teŋin la, ka na be ya sa'an saŋa bi'ela ka li na malis m, ka ya nyaan suŋi m ka m gaad. 25Ka nannanna m ye m keŋne Jerusalem n suŋ Wina'am nidib bane be anina la. 26Wina'am nidib bane be Masedonia ne Akaia teensin, ten'es ye li a su'um ka nok piini n tolim tis tadimnam bane a Wina'am nidib ka be Jerusalem ni la. 27Ba meŋi ten'es ye li a su'um ka niŋ ala. Ka li me nar ye ba sid niŋ ala. Jew dim la da ke ka bane ka' Jew dim la la'am di'e Wina'am yelsum line suŋidi ba siis. Ka lin zug ka li a su'um ka bane ka' Jew dim la suŋ Jew dim ka ba di'e yelsum line na suŋi ba niŋgbina. 28M ya'a tolis ligidi kan ka Wina'am nidib bane be Masedonia ne Akaia la'as la wusa n tis Wina'am nidib bane be Jerusalem la naae, m na kena kaae ya ka naan n gaadi keŋ Spain. 29Ka m mi' ye m ya'a paae ya sa'an na m na mor Kiristo yelsum bedego na. 30M ba'abiise, m belimini ya ne ti Zugsob Yesu Kiristo ma'asim zug ne Siig Suŋ noŋilim zug ye ya la'am ne man mo' sos Wina'am man yela. 31Sosimi Wina'am ka m nyaŋe pons ne bane ka'a Wina'am nidibi n be Juuda teŋin la sa'an, ka tuum kan ka m ye m tum Jerusalem ni la malis Wina'am nidib bane be anina la. 32Ka dinzug ka li ya'a a Wina'am boodim, m na keenn ya sa'an na ne sumalisim, ka nye nimma'asim ya sa'an. 33Wina'am one tisid sumalisim na be ne ya wusa. Ami.

will be added

X\