ROOM DIM 14

1Di'em ninkane yadda pood, ka da nwa'asid ne o, o ten'esug la yelaa. 2Ninso' yadda niŋir tun'e ke ka o di si'el wusa, ka one yadda pood la kis ni'im. 3Ka niŋkane dit si'el wusa la da ne'es niŋkane kis ni'im laa. Ka one pu kis si'ela da yel one kis si'el ye o niŋ line ka'a su'um, bozugo Wina'am di'e o. 4Fu a ano'one na kadi so' tumtum saria? O ya'a zi'e bee lu ne, li ane o meŋ Zugsob na yel ye o di buod bee o luya. Ka o sid na di buod ka zi'e kiŋ kiŋ, Zugsob la n na tun'e ke ka o zi'e kiŋ kiŋ la zug. 5Ninso' gosid ka dabis si'a a su'um gaad dabis sieba. Ka so' gosid ka dabisa wusa zem ne. So' wusa kel ka o poten'er a yinni. 6On mekama gosid ka dabis si'a a su'um, niŋidi li ye o na'as Zugsob la. Ka on mekama pu kis si'ela, diti li ye o na'as Zugsob la, on pu'usid Wina'am bareka diib la yela la zug. Ka one me kis disieba diib la, niŋid ala ye o me na'as Zugsob la, ka me pu'usid Wina'am bareka. 7So' kae' voe o meŋ yela, bee kpiid o meŋ boodim ma'anee. 8Ti ya'a voe, ti vone ye ti tum Zugsob boodim. Ka ti ya'a kpi, li ane ti Zugsob boodim ka ti kpi. Aa to, ti ya'a voe bee ti ya'a kpi ne, ti ane Zugsob la nidib. 9Kiristo da kpi ka len vu'ug kumin la ye o a bane kpi ne bane voe la Zugsob. 10Ka fune, bo ka fu kati fu ba'abiig saria? Bee bo yela ka fu ne'esidi fu ba'abiiga? Ti wusa na zi'en Wina'am tuon ka o kadi ti saria. 11Li sob Wina'am gbauŋin ye, “Zugsob yel ye, ‘Man voe nwa, nidib wusa na igin man tuon, ka zilim wusa na tu'as tis Wina'am.’ ” 12Aa to, ti yinni yinni na tu'as o meŋ yela wusa n tis Wina'am. 13Dinzugo, keli ka ti bas, ka da kati ti ba'abitaaba saria, ka lee gban'e ka da nok si'el niŋ ti ba'abiig sueren line ta'asid o luuga. 14Mam a yinni ne ti Zugsob Yesu la ke ka m baŋ sida ye diid kae' a dian'ade. Amaa so' ya'a ten'es ye diid be a dian'ad, li ane dian'ade o sa'an. 15Fu ba'abiig sunf ya'a sa'am fun dit disi'a la zug, fu pu len tum noŋilim tuuma. Da ke ka diib kane ka fu di la sa'am fu ba'abiig one ka Kiristo kpi o zug laa. 16Ka da ke ka line ka fu gos ka li a su'um la lieb be'ed nidib pian'adinee. 17Diib bee nuub ka' dine pak Wina'am so'olim nii, ka lee ane popielim ne sumalisim kan ka Wina'am Siig Suŋ tisid la. 18Ka on mekama dol Kiristo anwa na malisne Wina'am ka nye na'asi nidibin. 19Dinzugo ti moomi ka yiti niŋ dine na mor sumalisim ka na suŋi ti ba'abitaaba. 20Da sa'am line ka Wina'am niŋ la diib zugo. Diib wusa nare ba di. Amaa li ka'a su'um ka fu di si'el line na ke ka fu taaba lu tuumbe'edinee. 21Lini a su'um ye fu niŋ ane ye fu da di nimme bee nu daam bee niŋ si'el line na ke ka fu ba'abiig luu. 22Mori fun ten'es ne'e yela si'em fu ni ne Wina'am sa'an ma'aa. Niŋkane niŋ si'el line ka o gos ka li a su'um, ka pu ten'es ye o mor gba'ar li zug la mor sumalisim. 23One bi'esid si'el yela ka dii li la, tum taal. Bozugo o pu di li ne yadda. Ka lin wusa pu dol ne yadda ane tuumbe'ed.

will be added

X\