ROOM DIM 13

1Nid wusa siakim nimbane so'e teŋ la noya. Bozugo so' pu mor paŋa, asee li yi Wina'am sa'an na. Li ane Wina'am ke ka nimbane so'e teŋ la mor paŋ. 2Ka on mekama zan'as nimbane so'e teŋ la noor, o zan'asne line ka Wina'am zi'el la. Ka on mekama niŋid ala, ba na kad o saria be'ed. 3Nimbane tum be'ed na zo paŋdim, ka ka' nimbane tum su'um laa. Ya ya'a pu bood ye ya zo nimbane mor paŋ la, yanam tum line nar, ka o pian'a ya, 4bozugo o ane Wina'am nidi ya suŋir zug. Ya ya'a tum be'ed yanam zom o; ka o sid mor paŋ kan na tisi ya saansug. O ane Wina'am tumtum, ka di'ed Wina'am supeen n saansid nimbane tum be'ed la. 5Ka linzugo li nar ye ya siak nimbane mor paŋ la noor, ka ka'ane ye ya luak Wina'am supeen ma'anee, ka me ane ye ya mi' ye lin a su'um. 6Ka li me ane din zug ka ya yiti yood lampo. Nimbane tuuma a ye ba so'e nidib la tumme Wina'am tuuma. 7Tisimi ba wusa line nar ye ba di'e. Li ya'a nar ye ba di'e lampo bee araza'as lampo, yanam yoom tisi ba. Ka li ya'a nar ye ba di'e na'asi, yanam na'asimi ba. 8Da more so' samme. Yaname na mor sam si'a ane ye ya noŋ taaba. On mekama noŋ o tiraan, siak Wina'am wada la wusa. 9Wina'am noyelug sieba be, ka ane ye, “Da sa'am po'aba, da ku nidaa, da zuudaa, da more fufumee.” Ka bedego len be ka la'as ne bama a yinni, “Noŋimi fu tiraan wuu fun noŋi fu meŋ si'em la.” 10One noŋ o tiraan ku tum o tiraan be'ede. Dinzugo ya ya'a noŋ taaba, ya siak wada la wusa. 11Niŋimi ala yaname mi' saŋa a si'em la zug. Saŋa paa na ye ya due gbeemin. Ti faangir saŋa yue, ka pu lal wuu tinam daa nam pin'ili niŋ Yesu Kiristo yadda si'em laa. 12Yu'uŋ bood gaadug, ka beog bood nier. Dinzugo ti basim lik tuuma line a be'ed la, ka nok Wina'am zaba la'ad line a tuumsuma. 13Keli ka ti tuuma niŋir a su'um wuu nimbane be nintaŋin ka ti da nu daam kool bee sa'am po'aba, bee zabid ne nidiba bee mor fufume. 14Doli ti Zugsob Yesu Kiristo ka niŋidi wuu on niŋ si'em la, ka bas ka da len ten'es yanam na niŋi ya niŋgbiŋ boodim si'em la ya'asa.

will be added

X\