1 Dinzugo, m ba'abiise, Wina'am zoo ti nimbaanlig ka li yu'un zu'e la zug, ka m sa'ani ya ye ya noki ya meŋ, ka ke ka li a maan line voe n tis Wina'am n a su'um nyain ka ma'ae Wina'am sunf. Ne'eŋa a sida zun'or n tis Wina'am. 2 Da tu'asidi line wusa ka dunia dim niŋid laa. Keli ka Wina'am tisi ya ya'am paal, ka li na tiake ya beilim. Ka ya na nyaŋe baŋ Wina'am boodim, bun line a su'um ne line ma'ed Wina'am sunf. 3 Wina'am popielim piini kan ka o tisi m la zug, ka m yeti ya wusa, ye ya da ten'es ye ya zu'e gaad ya meŋ a si'em laa, ka lee ten'es ne sida ye ya ane yanam kpelim a si'em la, ka li dolne yadda niŋir line ka Wina'am tisi ya a si'em la. 4 Nid mor niŋgbiŋ yinni, ka li mor luas bedego. Ka luas za'a more ba tuuma gun gun. 5 Ala men, ti a yinni ne Kiristo ka wenne niŋgbiŋ yinni ne, la'am ne tinam a bedego la. Ka ti wusa to'oŋ taaba wuu niŋgbiŋ yinni luas n to'oŋ taaba si'em la. 6 Ti di'ed piini kon'ob kon'ob, ka li yine Wina'am popielim ni. Dinzugo ti nokim piini la n suŋ taaba. Ka one piini a nodi'esug, on di'em Wina'am noor pian'ad n tis nidib ka li dolne ti yadda niŋir a si'em. 7 Ka one piini a ye o suŋ nidib, on suŋim. Bee one piini a ye o pa'al nidib Wina'am yela, on pa'alim. 8 Bee one piini a ye o kpemis nidib, on kpemisi ba sunya. One piini a tisib, on tis ne o sunf wusa. Ka one piini a ye o a tuon gat, on tumi li su'uŋa. Ka one piini a nimbaanlzoor, on maalimi li ne sumalisim. 9 Keli ka ya noŋir a sida noŋir, ka kisi bunbe'ed, ka gban'e line a su'um ne ya nu'us ayi, 10 ka noŋ taaba su'uŋa yaname kpelim a ba'abiis ne taaba Kiristo sa'an la, ka tia' ye ya tis taaba na'asi, 11 ka tum bedego n tis Wina'am ka da zoti gbanya'am, ka pesigi ya meŋ n tum Wina'am tuuma ne nimmua, 12 ka ya ti'ir ke ka ya mor sumalisim, ka modigi ya yeltood poogin, ka pu'us Wina'am saŋa wusa, 13 ka suŋ Wina'am nidib bane bood suŋir, ka di'e saam ya yaan. 14 Sosim Wina'am ye o tis bane namisidi ya la yelsum. Sida, sosim o ka o tisi ba yelsum, ka da tisi ba nopoore. 15 Maalim sumalisim ne bane mor sumalisim. Ka mor susa'aŋ ne bane me mor susa'aŋ. 16 More poten'er yinni ne taaba. Ka da more tita'alim, ka lee siaki la'as ne tadimnam. Ka da ten'es ye ya nif nienee. 17 Da lebis be'ed, be'ed zugo. Kpe'eŋimi ya meŋ n tum line ka nidib wusa gos ka li a su'um. 18 Ka li ya'a nyaŋedin ya sa'an, yanam mor sumalisim ne nidib wusa. 19 M ba'abinoŋa, kudin da lebis be'ed, be'ed zugo, ka lee ke ka Wina'am supeen niŋi li. Li sob Wina'am gbauŋin ye, “Zugsob na lebis yo sam.” 20 Niŋimi wuu lin sob Wina'am gbauŋin ye, “Fu dataa ko'om ya'a zabid, fun diisim o, ka ku'onuud ya'a mor o, fun tisim o ku'om ka o nu; ka fu ya'a niŋ ala, yeltita'ar ka fu noke zi'il o.” 21 Da ke ka tuumbe'ed di yaa, ka lee noke tuumsuma n nyaŋ tuumbe'ed.
