ROOM DIM 11

1M ye m bu'osi ya ye, ya ten'es ye Wina'am bas o meŋ nidib ne bee? Ayei, baa bi'elaa. M meŋ ane Israel nid, ka a Abraham yaaŋ, ka a Benjamin buudi, ka Wina'am pu basi ma. 2Wina'am pu bas o nidib bane ka o deŋim gaŋ laa. Ya mi' lin sob Wina'am gbauŋin Elija n yel Wina'am, Israel yela si'em la ye, 3“Zugsoba, ba kuu fu nodi'esidib, ka sa'am fu maan zin'ig la. Ka mam ma'aa kpelim, ka ba mood ye ba ku mam men.” 4Ka Wina'am da lebis o yel ye, “Mam kpelim mor nidib tusa ayopoi ka ba dol m, ka pu dol Baale.” 5Li ane ala nannanna. Nidib bi'ela be ka Wina'am gaŋi ba o popielim zug. 6O gaŋir yine o popielim ni, ka ka'a ba niŋir zugo. Wina'am gaŋir ya'a yiin nidib niŋir ni, o popielim la ku aan sida popielim. 7Aa, to. Israel dim pu nye ban bood si'ela. Li ane ba bi'ela bane ka Wina'am gaŋ la da nyee li. Ka bane kpelim la pu siak Wina'am ka lieb tobpuwumnib. 8Li dolne lin da sob Wina'am gbauŋin ye, “Hale n ti paae zina, Wina'am ke ka ba ya'am a yoogo, ka ba nini pu nyeta, ka ba toba pu wum na.” 9Ka David me yel Wina'am gbauŋin ye, “Wina'am na ke ka lin ka nimbama dol la a bendug ba sa'an ka ba na li ka nye namisug, 10ka ke ka ba nini yo, ka ba ku nyaŋe nyee, ka ke ka yeltoog bane ka ba zeed la wumi ba ka ba ku'usid.” 11Dinzugo, m bu'osi ya ye, ya ten'es ye Israel dim da tu'ugne ye ba lu ka sa'am bee? Ayei, baa bi'elaa. Ban tu'ug ka tum tuumbe'ed la zug, ka bane ka' Jew dim la nye faangir. Wina'am niŋ ala ye Israel dim na mor fufum ne bane ka' Jew dim la. 12Israel dim tuumbe'ed da ke ka dunia dim bane kpelim la nye yelsum bedego. Ka ban ka' Wina'am nidib ya'as la ke ka bane ka' Jew dim la nye Wina'am yelsum bedego. Ka saŋkan ka Israel dim bedego na len lieb Wina'am nidib ya'as la, Wina'am yelsum na a bedego n gaad ala. 13M ye m sob ne' tis yanam bane ka' Jew dim la. Ye Wina'am sadigim ke ka m a Kiristo Tumtum ka tum m yanam bane ka' Jew dim sa'an la, m na'asid tuum kan ka Wina'am tisi m 14ye li ke ka m meŋ buudi mor fufum ne bane ka' Jew dim la. Ka ala ka m na faaenn m meŋ buudi sieba. 15Wina'am n daa bas Jew dim ka ba ka'a o nidib ya'as la, ke ka Wina'am naal ne dunia dim bane kpelim la. Ka li yu'un na a wala, Wina'am di'e ba ka ba aa o nidib ya'asa? Li na ane buntita'ar line a nyovur tis bane kpi la. 16Fu ya'a nok bodobodo kane ka fu gbin'e yiiga la n tis Wina'am, line kpelim la me ane o din. Ka tiig nya'a ya'a a Wina'am din, tiig la wila me ane o din. 17Jew dim la wenne Olive tiig line be yin ne. Ka Wina'am ko' tikaŋa wila sieba, ka nok moogin Olive tiig wil n to'oŋ yin tiig, ka li lieb yinni. Yanam bane ka' Jew dim la wenne moogin Olive tiig wil la, ka ya di'ed Wina'am yelsum line yi ne Jew dim sa'an na wenne moogin Olive tiig wil la di'ed su'um line yi ne yin tiig la ni. 18Dinzugo, da nwe'ed nyo'og ka ne'es bane ka Wina'am ko'ogi ba bas wenne yin tiig wila laa. Da mor tita'alim; ka fu ane wil ma'aa. Nya'a tit uf su'um, ka ka' fu tit nya'a su'um. 19Fu na lebis ye, “Sida, Wina'am da ko' wila la n ke ka paalo naam n tis man.” 20Li a sida. Ban pu niŋ Wina'am yadda la zug ka o kuu ba. Ka fun niŋ o yadda la zug ka fu kpelim to'oŋ ne o. Dinzugo, da more tita'alim. Gu'usimi fu meŋ. 21Wina'am pu ke ka yin tiig wila bane pu niŋ o yadda la kpelim to'oŋ ne yin tiig laa. Fu ten'es ye fun ya'a pu niŋ o yaddaa, o na ke ka fu kpelim to'oŋ bee? 22Gosim Wina'am zot nimbaanlig ka kpi'em ne sida si'em. O a sida sob tis bane li, ka fu ya'a kpelim niŋ o yadda la gullim, o na kpelim zoti fu nimbaanlig. Li ya'a ka' walaa, o me na ko'og fu men n bas. 23Ka Jew dim ya'a tiak ka len niŋ Wina'am yadda, o na ke ka ba me len to'oŋ ne yin tiig la; ka Wina'am na nyaŋe niŋ ala. 24Yanam bane ka' Jew dim la wenne moogin Olive tiig wil, ka Wina'am ko'ogi li ka to'oŋi li ne yin Olive tiig la. Ka lin ka' ban yiti to'oŋ tiis si'em laa. Ka li pu toe ka Wina'am na nok wil bane ka o ko'og yin tiig la ni len to'oŋ ne ba meŋ tiig la ya'asa. 25M ba'abiise, m bood ye ya baŋ yelsua'ada kaŋa, ye ya da ten'es ye ya ane ya'am dima. Li ane ye Israel dim sieba mor zugkpi'euŋ, ka li na be n ti paae saŋkan ka bane ka' Jew dim wusa ka Wina'am gaŋ la kpen' Wina'am so'olimin. 26Ka ala ka Israel dim wusa na nye faangir. Li dolne lin da sob Wina'am gbauŋin ye, “Wina'am yel ye, ‘Ti Faangid la na yi Zion zuer ni kena, ka na yiis Jakob yaas tuumbe'ed wusa. 27Ye ka lin la na a on nonaar ne ba la, saŋkan ka o na yiisi ba tuumbe'ed n bas la.’ ” 28Jew dim la da zan'as labasuŋ la zug, ka ba lieb Wina'am dataas, ka li ane yanam bane ka' Jew dim la su'um nyeeb la zug. Wina'am gaŋ Jew dim buudi ne ba yaanam la zug ka ba me a nimbane ka o noŋ. 29Wina'am pu gaŋid nidib ka tisidi ba o yelsum ka len tiakedi o ya'am. 30Yanam bane ka' Jew dim da zan'as Wina'am, ka nannanna ka o yu'un zoo ya nimbaanlig, Jew dim la zan'as o la zug. 31Ala men Jew dim la zan'asid Wina'am nannanna ye ba na di'e nimbaanlzoor o sa'an. Ka li me a nimbaanlzoor kane ka ya di'e Wina'am sa'an la. 32Nidib wusa zan'as Wina'am, ka Wina'am ke ka li loo ba wuu ba bene sarega ni, ye o na zo nidib wusa nimbaanlig. 33Wina'am yelsum ane bedego, ka o mor ya'am ne mi'ilim bedego. Ano'on na nyaŋe yel o poten'ere, ka na nyaŋe baŋ on niŋid si'ela? 34Li dolne lin da sob Wina'am gbauŋin ye, “So' kae' mi' Zugsob poten'ere, bee na nyaŋe sa'al oo, 35bee na tis o si'el ye o ti lebisi yoo.” 36Wina'am maal si'el wusa. Ka on zug ka si'el wusa kpelim be ye li tis o na'asi. Wina'am na nye na'asi ka li ka' naare. Ami.

will be added

X\