ROOM DIM 10

1M ba'abiise, m bood ne m sunf wusa ka sosid Wina'am ye m meŋ buudi nye faangir. 2M mi' ka yeli ba yela ye ba dol Wina'am ne ba sunf wusa, ka ba dolim la lee pu yi sida mi'ilim nii. 3Ba zi' suer kane ka Wina'am ket ka nidib a popielim dim o tuone, ka bood ba meŋ sueya, ka linzug ba pu noki ba meŋ n lo ne Wina'am suere. 4Kiristo ke ka wada la naae, ka Wina'am na ke ka on mekama niŋ o yadda la, na a popielim daan o tuon. 5Moses da sob popielim line yi wada dolim ni la yela, ye, “One siak wada noyelug la na nye nyovur li dolim poogin.” 6Ka ba da sob popielim line yi yadda niŋir Wina'am ni la yela ye, da yeli fu meŋ ye, ano'on na du arazana ni? (Li gbin ane ye, ano'on na du arazana ni ye o ke ka Kiristo sig na?) 7Bee, da yeli fu meŋ ye, ano'on na sig kpi'imnam teŋin? (Li gbin ane ye o keŋ ke ka Kiristo vu'ug kumin na.) 8Ka li me sob ye, Wina'am pian'uk kpi'e uf ka be fu noorin ne fu sunfin. Li ane Wina'am pian'uk yadda niŋir la yela ka lin la ka ti moon. 9Fu ya'a yel ne fu noor paalo ni ye Yesu ane Zugsob la, ka siaki fu sunfin ye Wina'am da vu'ug o kumin, fu na nye faangir. 10Ti siaki ti sunfin ye Yesu ane Zugsob la, linzug ka ti lieb popielim dim Wina'am tuon, ka yeli li ne ti noor, ka linzug ka ti nye faangir. 11Li sobne Wina'am gbauŋin ye, “On mekama niŋ Kiristo yadda la, ku di nyan o zugo.” 12Gaŋir kae' Jew dim ne bane ka' Jew dim la nii. Zugsob la ane Jew dim Zugsob, ka me a bane ka' Jew dim la Zugsob, ka pesig o yelsum tis bane wusa sos suŋir o sa'an. 13Li sob Wina'am gbauŋin ye, “On wusa sos suŋir Zugsob la sa'an na nye faangir.” 14Nidib ya'a pu niŋ o yaddaa, ba na niŋ wala sos suŋir o sa'ane? Ka ba ya'a pu wum labaar o yelaa, ba na niŋ wala niŋ o yadda? So' ya'a kae' na moon labaar laa, nidib na niŋ wala wumi li? 15Ka Wina'am ya'a pu tum bane moon labaar la naa, labaar na niŋ wala moole? Li sob Wina'am gbauŋin ye, “Bane moon labasuŋ la ken ne malis bedego.” 16Ka li kae' nidib wusa siak labasuŋ laa. Azaya da sob Wina'am gbauŋin ye, “Zugsoba, ba bi'ela siaki ti labaar la.” 17Yadda niŋir yitne labaar la wumug ni, ka Kiristo labaar la yela ket ka nidib wum labaar la. 18M ye m bu'osi ya ne'eŋa ye, ya ten'es ye nidib pu wum labaar laa? Sida ba wumya. Li dolne lin da sob Wina'am gbauŋin si'em la ye, “Nidib wumi ba kukoya ne ba pian'ad dunia zin'is wusa.” 19M na lem bu'osi ya ye, ya ten'es ye, Israel dim pu gban'e Moses n sob si'el la gbin bee? Sida ba da gban'eya. Moses da yel ye, “Wina'am yel Israel dim ye, ‘M na ke ka ba mor fufum ne nidib bane ka'a ba buudi, ka ke ka ba sunf due ne buudi bane a yalimnam ka pu gban'ad yela gbin nee.’ ” 20Ka Azaya mor sukpi'euŋ ka me yel ye, “Wina'am yel ye, ‘Nimbane pu ied m la, nye m, ka m pa'al m meŋ tisi ba.’ ” 21Ka yel Israel dim yela ye, “M bood bedego ye m di'e ya daar wusa ka ya lee ane nimponannib bane pu siakidi m noore.”

will be added

X\